ភ្នំពេញៈ ក្រសួងប្រៃសណីយ៍ និងទូរគមនាគមន៍ បានបង្កើតប្រព័ន្ធស្វ័យប្រវត្តិកម្មសម្រាប់បញ្ជាទិញឧបករណ៍តេស្តរហ័ស ដែលមានតំណភ្ជាប់ mptc.gov.kh/rt សម្រាប់ចូលទៅបញ្ជាទិញ ដើម្បីពន្លឿនផ្តល់ភាពងាយស្រួលនិងសម្រួលដល់ការចែកចាយឧបករណ៍តេស្តរហ័សអង់ទីហ្សែនកូវីដ ១៩។ យោងតាមសេចក្តីប្រកាសព័ត៌មានរបស់ក្រសួងប្រៃសណីយ៍ចេញផ្សាយនៅថ្ងៃទី ១១ ខែ កក្កដា ២០២១។
យោងតាមសេចក្ដីប្រកាសព័ត៌មាននេះបានឱ្យដឹងថា ដើម្បីដាក់សំណើបញ្ជាទិញថ្នាក់ដឹកនាំ ឬម្ចាស់ក្រុមហ៊ុន សហគ្រាស រោងចក្រ និងស្ថាប័នពាក់ព័ន្ធ ត្រូវបំពេញឈ្មោះអ្នកទិញ ឈ្មោះស្ថាប័ន ចំនួនបុគ្គលិក ចំនួនឧបករណ៍តេស្តរហ័សគិតជាឯកតា។
សេចក្តីប្រកាសព័ត៌មានបន្តថា៖ «តាមរយៈប្រព័ន្ធនេះអ្នកដាក់សំណើបញ្ជាទិញនឹងទទួលបានព័ត៌មានអំពីការបញ្ជាទិញ បរិមាណអាចទិញបាន របៀបនៃការទូទាត់ និងកាលបរិច្ឆេទមកទទួលឧបករណ៍តាមរយៈតេឡេក្រាម Bot ដោយស្វ័យប្រវត្តិ»។
លោក សូ វិសុទ្ធី រដ្ឋលេខាធិការក្រសួងប្រៃសណីយ៍ និងទូរគមនាគមន៍ ប្រាប់ ភ្នំពេញ ប៉ុស្តិ៍ នៅថ្ងៃទី ១១ ខែកក្កដាថា កន្លងមកក្រសួងទទួលបានការគាំទ្រនិងជាវពីស្ថាប័ន ក៏ដូចជាក្រុមហ៊ុននិងរោងចក្រផ្សេងៗ ដោយហេតុនេះទើប បង្កើតប្រព័ន្ធនេះឡើងគឺដើម្បីងាយស្រួលក្នុងការគ្រប់គ្រងការបញ្ជាទិញ និងធ្វើឱ្យប្រសើរឡើងការជូនដំណឹងដល់អ្នកបញ្ជាទិញ។ សម្រាប់ប្រព័ន្ធបញ្ជាទិញមុន អ្នកបញ្ជាទិញត្រូវរង់ចាំរហូតដល់ឧបករណ៍នេះត្រូវបានបញ្ជាក់ថាមានសិន ទើបក្រសួងទាក់ទងទៅកាន់អ្នកបញ្ជាទិញតាមក្រោយ។
លោកថា៖ «អ៊ីចឹងប្រព័ន្ធថ្មីនេះគឺជូនដំណឹងឱ្យគាត់តែម្តង»។
គេហទំព័រក្រសួងប្រៃសណីយ៍បានបញ្ជាក់ថា ក្រសួងប្រៃសណីយ៍នឹងនាំចូលឧបករណ៍តេស្តរហ័សអង់ទីហ្សែនកូវីដ ១៩ ពីប្រទេសកូរ៉េ ដើម្បីចែកចាយបន្តក្នុងតម្លៃដើម ៣,៧ ដុល្លារ ក្នុងមួយឧបករណ៍។ ក្រសួងក៏បានកំណត់ពេលវេលាសម្រាប់ការមកទទួលយកឧបករណ៍តេស្ត រហ័សនេះពីថ្ងៃចន្ទដល់ថ្ងៃអាទិត្យ ចាប់ពីម៉ោង ៨ព្រឹកដល់ម៉ោង ៦ ល្ងាច។
ទោះជាយ៉ាងណាក៏ដោយ គេហទំព័រដដែលបញ្ជាក់ថា អ្នកទទួលបានការបញ្ជាទិញឧបករណ៍តេស្តរហ័សនេះត្រូវបានហាមដាច់ខាតមិនឱ្យចែកចាយ ឬលក់បន្ត៕
វីដេអូ៖