ភ្នំពេញៈ មន្ត្រីជំនាញនៃក្រសួងបរិស្ថានបាននិងកំពុងតែបន្តចុះតាមដានការបញ្ជាក់លិខិតទិញលក់ដីរដ្ឋ ផ្ទេរសិទ្ធិ ឬបញ្ជាក់លើប្លង់បង្ហាញ ទីតាំងដីស្ថិតក្នុងតំបន់ការពារធម្មជាតិ និងរបៀងអភិរក្សជីវចម្រុះ ក្រោយពីអាជ្ញាធរមូលដ្ឋានខ្លះបានចុះហត្ថលេខាកន្លងមក រំលោភចូលដីរដ្ឋ។
កាលពីខែឧសភា ឆ្នាំ ២០២១ ក្រសួងបរិស្ថាន បានចេញលិខិត ១ ច្បាប់ បញ្ជាឱ្យបញ្ឈប់ជាបន្ទាន់នូវការចុះហត្ថលេខាទទួលស្គាល់លើលិខិតផ្ទេរសិទ្ធិ ស្នើសុំកាន់កាប់ ប្រើប្រាស់ដី លិខិតទិញ-លក់ដីរដ្ឋ ឬការបញ្ជាក់លើប្លង់បង្ហាញទីតាំងដីស្ថិតក្នុងតំបន់ការពារធម្មជាតិ និងរបៀងអភិរក្សជីវចម្រុះ។ ក្នុងនោះក៏បានណែនាំឱ្យអាជ្ញាធរថ្នាក់ក្រោមជាតិ ធ្វើមោឃភាពរាល់ហត្ថលេខា ឬលិខិតបញ្ជាក់ ដែលបានធ្វើកន្លងមកផងដែរ។
លោក នេត្រ ភក្ត្រា អ្នកនាំពាក្យក្រសួងបរិស្ថានបានប្រាប់ ភ្នំពេញ ប៉ុស្តិ៍ នៅថ្ងៃទី ៨ កក្កដាថា មួយរយៈចុងក្រោយនេះឃើញថា អាជ្ញាធរថ្នាក់ក្រោមជាតិ ដែលមានតំបន់ការពារធម្មជាតិបានចូលរួមអនុវត្តវិធានការនេះយ៉ាងសកម្ម និងបានចេញការណែនាំ ដល់មន្ត្រីក្រោមបង្គាប់របស់ខ្លួនឱ្យអនុវត្តឱ្យបានខ្ជាប់ខ្ជួនផងដែរ។
បើទោះជាមានការចូលរួមយ៉ាងដូច្នេះលោក នេត្រ ភក្ត្រា ក៏បានអះអាងថា មន្ត្រីបរិស្ថាននៅតែបន្តសកម្មភាពចុះតាមដានសកម្មភាពអាជ្ញាធរដែនដី ដែលស្ថិតក្នុងតំបន់ការពារទាំងនេះ ដើម្បីទប់ស្កាត់ និងមានចំណាត់ការណាមួយនៅពេលពួកគេ នៅតែបន្តប្រព្រឹត្តសកម្មភាពល្មើស។
លោក ព្រមានថា ចំពោះចំណាត់ការនេះ គឺមិនត្រឹមតែជនល្មើសដែលជាមេខ្យល់នោះទេ សូម្បីអាជ្ញាធរដែនដី ដែលជាមេភូមិ មេឃុំផងនោះក៏នឹងត្រូវបញ្ជូនសំណុំរឿងទៅតុលាការផងដែរ។
លោកថ្លែងថា៖ «ក្រសួងបរិស្ថាន សុំអំពាវនាវឱ្យប្រជាពលរដ្ឋ កុំចាញ់បោកមេខ្យល់ ឬអ្នកទិញដូរដីខ្យល់ក្នុងតំបន់ការពារធម្មជាតិ។ គ្មាននរណាម្នាក់អាចលក់ដី នៅក្នុងតំបន់ការពារធម្មជាតិបានទេ ហើយសកម្មភាពនេះ គឺជាអំពើល្មើសច្បាប់ ដែលនាំឱ្យបាត់បង់ ឬប៉ះពាល់ដល់ផលប្រយោជន៍។ យើងកំពុងតែបន្តស៊ើបអង្កេតរកមេខ្លោង ដែលប្រើប្រាស់ប្រជាពលរដ្ឋក្នុងការទន្ទ្រានកាន់កាប់ដីព្រៃ»។
លោក កែវ សុភ័ក្ដ្រ ប្រធានមន្ទីរបរិស្ថានខេត្តមណ្ឌលគិរីបានប្រាប់ភ្នំពេញប៉ុស្តិ៍នៅថ្ងៃទី ៨ កក្កដា តាមរយៈការចុះអង្កេតបានឱ្យដឹងថា អាជ្ញាធរថ្នាក់ក្រោមជាតិទាំងអស់បានចូលរួមអនុវត្តសកម្មភាពបានយ៉ាងល្អ ដោយក្នុងនោះថ្នាក់ខេត្ត ក៏បានចេញលិខិតណែនាំបន្តទៅថ្នាក់ក្រោម ដើម្បីឱ្យបញ្ឈប់សកម្មភាព និងចូលរួមមោឃភាពលិខិតដែលពួកគេបានបញ្ជាក់ផងដែរ។
លោក សុភ័ក្ដ្រ បានអះអាងថា៖ «យើងបន្តចុះឃ្លាំមើល និងស៊ើបអង្កេត នៅក្នុងតំបន់ការពារធម្មជាតិ បន្តទៀត ព្រោះក្រែងនៅតែមានការប្រព្រឹត្តបទល្មើស ចេញលិខិតបញ្ជាក់ ឬចុះហត្ថលេខាណាមួយពីអាជ្ញាធរភូមិ ឃុំ»។
កាលពីខែឧសភា មានមេឃុំ-មេភូមិមួយចំនួនស្ថិតក្នុងខេត្តកំពង់ស្ពឺ ត្រូវបានមន្ត្រីបរិស្ថាន អញ្ជើញឱ្យមកធ្វើកិច្ចសន្យាក្នុងការបញ្ឈប់ការបញ្ជាក់លិខិតទិញលក់ដីរដ្ឋ ផ្ទេរសិទ្ធិ ឬបញ្ជាក់លើប្លង់បង្ហាញទីតាំងដី នៅក្នុងដែនឧទ្យានជាតិ ព្រះសុរាម្រិតកុសុមៈគិរីរម្យ និងឧទ្យានជាតិ ព្រះមុនីវង្សបូកគោ។ សកម្មភាពទាំងនេះក៏កើតមានចំពោះអាជ្ញាធរថ្នាក់ក្រោមជាតិមួយចំនួន ដែលស្ថិតក្នុងតំបន់ការពារធម្មជាតិ និងជីវចម្រុះផងដែរ រហូតដល់ពួកគេ ចេញលិខិតមោឃភាព និងនិរាករណ៍រាល់ហត្ថលេខា និងលិខិតដែលពួកគេបានបញ្ជាក់នាពេលកន្លងមក។
លោក ខៀវ សុភ័គ អ្នកនាំពាក្យក្រសួងមហាផ្ទៃបានប្រាប់ ភ្នំពេញ ប៉ុស្តិ៍ នៅថ្ងៃទី ៨ កក្កដាថា ប្រសិនបើករណីអាជ្ញាធរថ្នាក់ក្រោមជាតិទាំងនោះនៅតែប្រព្រឹត្តល្មើសទៅនឹងបម្រាមនេះ ក្រសួងបរិស្ថាន គួរតែអនុវត្តទៅតាមនីតិវិធីច្បាប់តាមរយៈការដាក់ទោសទណ្ឌតាមផ្នែករដ្ឋបាល ឬក៏មានការបណ្តេញចេញជាដើម បើប្រព្រឹត្តទង្វើធ្ងន់ធ្ងរ។
លោក ខៀវ សុភ័គ បានបញ្ជាក់ថា៖ «ធ្វើទៅតាមច្បាប់ដែលមានទៅ បើមានប្រព្រឹត្តសកម្មភាពល្មើស បើទោះជាក្រសួងមហាផ្ទៃ អាចអនុវត្តវិធានការរដ្ឋបាល ឬក៏ធ្វើការផ្លាស់ប្តូរមន្ត្រីណាមួយ។ ប៉ុន្តែ រដ្ឋមន្ត្រីក្រសួងបរិស្ថានក៏ជាស្ថាប័នខ្សែបណោ្តយរបស់រាជរដ្ឋាភិបាល មានសិទ្ធិសម្រេចផងដែរ ព្រោះអភិបាលខេត្តមួយៗ មិនមែនអភិបាលខេត្តរបស់ក្រសួងមហាផ្ទៃទេ គឺជាអភិបាលតំណាងរបស់រាជរដ្ឋាភិបាល ហើយក្រសួងនីមួយៗ គឺអាចដាក់ចេញវិធានការតាមច្បាប់»៕
វីដេអូ៖