ភ្នំពេញៈ ក្រសួងបរិស្ថានសម្រេចយកឈើប្រមាណ ១ ៣៤៧ ម៉ែត្រគុប ដែលរឹបអូសបានពីការទប់ស្កាត់ និងបង្ក្រាបបទល្មើសធនធានធម្មជាតិពីឆ្នាំ ២០២០ ដល់ឆ្នាំ ២០២១ ដើម្បីផលិតក្ដារមឈូសសម្រាប់អ្នកទទួលមរណភាព ដោយសារជំងឺកូវីដមឈូសផ្តល់ជូនអាជ្ញាធរពាក់ព័ន្ធប្រើប្រាស់សម្រាប់តម្កល់សពអ្នកជំងឺកូវីដ ១៩ ដែលបានទទួលមរណភាព។
ការសម្រេចយ៉ាងដូច្នេះគឺដើម្បីចូលរួម និងអនុវត្តតាមអនុសាសន៍របស់លោកនាយករដ្ឋមន្ត្រី ហ៊ុន សែន កាលពីថ្ងៃទី ១ កក្កដា ដោយបានបញ្ជាឱ្យប្រមូលទិញក្ការមឈូសដែលមានដាក់លក់ទាំងអស់នៅលើទីផ្សារឱ្យបាន ៨០ ភាគរយ ដើម្បីស្ដុកទុកតាមមន្ទីរពេទ្យក្នុងរាជធានីភ្នំពេញ និងតាមបណ្ដាខេត្តសម្រាប់ដាក់សពអ្នកស្លាប់ ដោយសារជំងឺកូវីដ ១៩។
លោក នេត្រ ភក្ត្រា អ្នកនាំពាក្យក្រសួងបរិស្ថានបានប្រាប់ ភ្នំពេញ ប៉ុស្តិ៍ កាលពីម្សិលមិញថា ក្រសួងបរិស្ថានបានយកឈើដែលមន្ត្រីឧទ្យានុរក្សបង្ក្រាបរឹបអូសបានពីការបង្ក្រាបបទល្មើសធនធានធម្មជាតិ ដើម្បីធ្វើក្តារមឈូសផ្តល់ជូនគណៈកម្មការជាតិប្រឆាំងនឹងជំងឺកូវីដ ១៩ ដើម្បីប្រើប្រាស់ដាក់តម្កល់សពអ្នកជំងឺកូវីដ ១៩ ដែលបានទទួលមរណភាព។
លោកបានបន្តថា គម្រោងនេះនឹងយកឈើសរុបប្រមាណ ១ ៣៤៧ ម៉ែត្រគុប ដែលរឹបអូសបានមកពីការបង្ក្រាបបទល្មើសធនធានធម្មជាតិពីឆ្នាំ ២០២០ និងឆ្នាំ ២០២១ នេះ មកផលិតជាក្តារមឈូស ហើយតាមការប៉ាន់ស្មាន ឈើដែលស្ថិតក្នុងក្របខ័ណ្ឌក្រសួងបរិស្ថានអាចផលិតក្តារមឈូសបានប្រមាណជាង ១ ០០០។
លោកបានបញ្ជាក់ថា៖ «គិតត្រឹមថ្ងៃទី ១១ ខែ កក្កដា ឆ្នាំ ២០២១ មន្ទីរបរិស្ថានខេត្តចំនួន ១២ ដែលមានឈើស្រាប់បានផលិតក្តារមឈូសបានចំនួន ៤០៥ និងបានកំពុងបន្តការផលិតបន្ថែមទៀត។ បច្ចុប្បន្ននេះក្តារមឈូសដែលផលិតបានត្រូវបានយកទៅប្រើប្រាស់ខ្លះៗហើយ»។
លោក នេត្រ ភក្ត្រា បានឱ្យដឹងថា ក្តារមឈូសដែលផលិតរួច ត្រូវបានប្រគល់ជូនអនុគណៈកម្មការគ្រប់គ្រងសពអ្នកជំងឺកូវីដ ១៩ ដើម្បីចាត់ចែង និងចែកចាយទៅអនុគណៈកម្មការប្រឆាំងនឹងជំងឺកូវីដ ១៩ ថ្នាក់ខេត្ត ដើម្បីប្រើប្រាស់ដាក់សពអ្នកជំងឺកូវីដ ១៩។
លោកបានបន្ថែមថា៖ «នេះគឺជាការយកចិត្តទុកដាក់ខ្ពស់របស់សម្តេចតេជោនាយករដ្ឋមន្ត្រីរបស់រាជរដ្ឋាភិបាលចំពោះសុខទុក្ខប្រជាពលរដ្ឋខ្មែរ ហើយនេះគឺជាការរក្សាកិត្តិយស និងតម្លៃជាមនុស្សរបស់រាជរដ្ឋាភិបាលកម្ពុជា ចំពោះពលរដ្ឋខ្មែរហើយជាប្រពៃណីទំនៀមខ្មែរក្នុងការគោរពចំពោះសព និងការជូនដំណើរជាចុងក្រោយចំពោះពលរដ្ឋអ្នកជំងឺកូវីដ ១៩ ដែលជាអកុសលបានស្លាប់បាត់បង់ជីវិតក្នុងបរិបទនៃការឆ្លងរីករាលដាលជំងឺកូវីដ ១៩ នេះ»។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានថ្លែងប្រាប់ ភ្នំពេញ ប៉ុស្តិ៍ កាលពីម្សិលមិញថា ទាំងនេះគឺជាការចូលរួមចំណែក និងបន្ថែមជាមួយគណៈកម្មការប្រយុទ្ធប្រឆាំងនឹងជំងឺកូវីដ ១៩។
លោកស្រីបានចាត់ទុកការចូលរួមនេះថា៖ «នេះជាការខិតខំរកដំណោះស្រាយ ដើម្បីទុកដាក់សពដែលមានវីរុសកូវីដ ១៩ បានត្រឹមត្រូវដែលជាភារកិច្ចរបស់អនុគណ:កម្មការគ្រប់គ្រងសពផងដែរ»។
គិតមកទល់ថ្ងៃទី ១១ ខែកក្កដាឆ្នាំ ២០២១ មានអ្នកជំងឺកូវីដ ១៩ ចំនួន ៩០២ នាក់ហើយ ដែលបានបាត់បង់ជីវិតចាប់តាំងពីកម្ពុជាមានករណីផ្ទុះជំងឺកូវីដ ១៩ ខណៈ បច្ចុប្បន្នអត្រាស្លាប់ប្រចាំថ្ងៃនៅក្នុងប្រទេស គឺមានចន្លោះពី ២០ ទៅជាង ៣០ នាក់។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជាបានថ្លែងថា ការត្រៀមក្ការមឈូសសម្រាប់អ្នករងគ្រោះដល់ជីវិត ដោយសារជំងឺកូវីដ ១៩ គឺជាកាយវិការមួយក្នុងការយកចិត្តទុកដាក់បំពេញកាតព្វកិច្ចរបស់រដ្ឋាភិបាល និងអាជ្ញាធរពាក់ព័ន្ធ។
ក៏ប៉ុន្តែលោកថា បើមើល ១ ជ្រុងទៀត ការប្រកាសយ៉ាងដូច្នេះ ហាក់ដូចជាយន្តការមួយក្នុងការបំភ័យ និងការបំបាក់ទឹកចិត្តពលរដ្ឋមួយផ្នែកដែរ ដែលបញ្ហានេះ រដ្ឋាភិបាល និងអាជ្ញាធរពាក់ព័ន្ធ គួរតែរិះរកគ្រប់មធ្យោបាយ ជាពិសេសយុទ្ធសាស្ត្រ ឬយន្តការថ្មីៗ ដើម្បីទប់ស្កាត់ការរីករាលដាល និងការព្យាបាលពលរដ្ឋឱ្យមានប្រសិទ្ធភាពជាងមុន។
ចំណែកករណីក្រសួងបរិស្ថានប្រើប្រាស់ឈើដែលរឹបអូសបានយកមកធ្វើជាក្ដារមឈូសនេះ លោក ប៉ា ច័ន្ទរឿន បានថ្លែងថា នេះក៏ជាដំណោះស្រាយមួយដែរ ក៏ប៉ុន្តែវាមិនមែនជាការល្អ និងជាចំណាត់ការដ៏មានប្រសិទ្ធភាពផ្នែកសេដ្ឋកិច្ចនោះទេ ប្រសិនបើយកឈើប្រណីតដែលរឹបអូសបានទៅធ្វើមឈូស។
លោកបានបញ្ជាក់ថា៖ «ខ្ញុំជឿថា ឈើដែលរឹបអូសភាគច្រើន គឺសុទ្ធតែជាឈើប្រណីត ប្រសិនបើយកឈើធម្មតាទៅធ្វើមឈូសនោះ គឺមិនចោទជាបញ្ហា ឬខុសអីទេ។ ប៉ុន្តែបើយកឈើប្រណីត ដែលរឹបអូសបានយកទៅធ្វើមឈូសគឺខ្ញុំគិតថាជាការខាតបង់មួយ។ គួរតែយកឈើប្រណីតទាំងនោះទៅប្រើប្រាស់ជាប្រយោជន៍សង្គមអ្វីផ្សេង ដូចជាការសាងសង់សាលារៀននៅតាមតំបន់ដាច់ស្រយាលជាដើម»។
ជាមួយនឹងការត្រៀមក្ដារមឈូសនេះដែរ លោក ប៉ា ច័ន្ទរឿន បានលើកឡើងថា តាមលទ្ធភាពរបស់កម្ពុជាក្នុងពេលនេះ គឺអាចធ្វើបានដោយខ្លួនឯង គ្រាន់តែផលិតក្ការមឈូស សម្រាប់ផ្គត់ផ្គង់តម្រូវការក្នុងប្រទេស ដោយពុំចាំបាច់បញ្ជាទិញ ឬនាំចូលពីប្រទេសជិតខាងនោះទេ៕