.jpg)
អតិថិជនម្នាក់កំពុងស្វែងរកការបញ្ជាទិញទំនិញតាមអនឡាញ កាលពីថ្ងៃទី ១០ កក្កដា។ ហុង មិនា
ភ្នំពេញៈ ក្នុងអំឡុងពេលនៃការផ្ទុះឡើងនូវជំងឺកូវីដ ១៩ នៅកម្ពុជារយៈពេលជាង ១ ឆ្នាំនេះ នាយកដ្ឋានប្រឆាំងបទល្មើសបច្ចេកវិទ្យានៃក្រសួងមហាផ្ទៃបានរកឃើញ និងបង្ក្រាបករណីឆបោកតាមបណ្តាញសង្គមមាន ១០ ករណី និងករណីមួយចំនួនត្រូវបានបញ្ជូនទៅតុលាការ។
លោក ជា ពៅ ប្រធាននាយកដ្ឋានប្រឆាំងបទល្មើសបច្ចេកវិទ្យានៃក្រសួងមហាផ្ទៃប្រាប់ ភ្នំពេញ ប៉ុស្តិ៍ នៅថ្ងៃទី ១១ ខែកក្កដា ថា ករណីឆបោកតាមបណ្តាញសង្គមមិនមានច្រើននោះទេហើយខាងនាយកដ្ឋានក៏បានធ្វើការផ្សព្វផ្សាយអប់រំដល់ពលរដ្ឋឱ្យមានការប្រុងប្រយ័ត្នខ្ពស់។
ក្នុងអំឡុងនៃការរីករាលដាលនៃជំងឺកូវីដ ពលរដ្ឋភាគច្រើន គឺសម្រាកនៅផ្ទះ និងបានប្រើប្រាស់បណ្តាញសង្គមច្រើនដោយពេលខ្លះ បានបញ្ជាទិញទំនិញតាមអនឡាញ ខណៈការដឹកជញ្ជូនមានភាពយឺតយ៉ាវក៏គាត់គិតថា គេបោកប្រាស់ដែរ ប៉ុន្តែមិនមែនដូច្នោះទេ ព្រោះពេលនោះកម្ពុជាមានការរឹតត្បិតក្នុងការធ្វើដំណើរ ដែលបណ្តាលឱ្យអ្នកដឹកជញ្ជូនទំនិញផ្សេងៗ មានភាពយឺតយ៉ាវ។
ពលរដ្ឋមួយចំនួន បញ្ជាទិញទំនិញ តាមអនឡាញដោយមិនមានភាពច្បាស់លាស់ដោយខ្លួនឯង ហើយបានវេរលុយចូលទៅអ្នកផ្សេងក៏ត្រូវបានចាត់ទុកថា គេបោកប្រាស់គាត់ ប៉ុន្តែនៅពេលដែលមន្ត្រីប្រាប់គាត់ពីមូលហេតុ ពួកគាត់ក៏អស់ចិត្ត និងពេលខ្លះក៏ទទួលបានលុយមកវិញដែរ។
លោក ពៅ បញ្ជាក់ថា៖ «ដូច្នេះ មុននឹងសម្រេចចិត្តទិញទំនិញតាមអនឡាញខ្ញុំស្នើសុំ ថាត្រូវពិនិត្យឱ្យបានច្បាស់លាស់ចំពោះទំនិញ។ មុននឹងវេរលុយជូន ត្រូវតែសួរ ឈ្មោះអ្នកលក់អីវ៉ាន់ ហ្នឹងមែនអត់»។
លោក ពៅ បញ្ជាក់ទៀតថា ចំពោះករណីឆបោកតាមបណ្តាញសង្គម តាមរយៈការបរិច្ចាគសាច់ប្រាក់ ឬសុំខ្ចីលុយក៏មិនសូវកើតឡើងដែរ។ ទោះជាយ៉ាងណា លោកបានស្នើឱ្យពលរដ្ឋ អ្នកប្រើប្រាស់បណ្តាញសង្គមត្រូវពិនិត្យមើលលើទំព័រផេចផ្លូវការរបស់ក្រុមហ៊ុន ផេចផ្លូវការរបស់អង្គការ និងផេចផ្លូវការរបស់ស្ថាប័នរាជរដ្ឋាភិបាលជាដើម មុននឹងបរិច្ចាគធនធានរបស់ខ្លួន។
លោក អ៊ឹម សុធី នាយកប្រតិបត្តិក្រុមប្រឹក្សាយុវជនកម្ពុជា (YCC) ឱ្យដឹងថា តាមលោកពិនិត្យមើលជាក់ស្តែងករណីឆបោកតាមបណ្តាញសង្គមមានច្រើននៅក្នុងប្រទេសកម្ពុជាក្នុងរូបភាពបង្កើតអាខោនក្លែងក្លាយ ស្របពេលដែលពលរដ្ឋកម្ពុជា មិនទាន់មានចំណេះដឹងជ្រៅជ្រះលើការប្រើប្រាស់បច្ចេកវិទ្យា និងបណ្តាញសង្គម។
ក្នុងករណីនេះរដ្ឋាភិបាលតាមរយៈស្ថាប័នជំនាញគួរតែ មានច្បាប់ (Cyber Law) ដើម្បីគ្រប់គ្រងបច្ចេកវិទ្យា ក៏ដូចបណ្តាញសង្គមឱ្យបានត្រឹមត្រូវ ដើម្បីធ្វើយ៉ាងណាកុំឱ្យពលរដ្ឋចាញ់បោកក្រុមឧក្រិដ្ឋជន។ មួយវិញទៀតអាជ្ញាធរក៏គួរតែធ្វើការផ្សព្វផ្សាយក្នុងរូបភាពណាមួយឱ្យពលរដ្ឋបានយល់ដឹងពីការប្រើប្រាស់បណ្តាញសង្គមក៏ដូចជាអ៊ីនធឺណិត ដើម្បីបង្ការ និងទប់ស្កាត់ការកើតឡើងនៃការឆបោកតាមបណ្តាញសង្គម។
លោក សុធី ថ្លែងថា៖ «ករណីបោកប្រាស់តាមបណ្តាញសង្គមនេះ ឮច្រើនមែន...ទាល់តែយើងទៅប្តឹងទៅអាជ្ញាធរ ជាពិសេសអាជ្ញាធរនៅក្រសួងមហាផ្ទៃ គេមានជំនាញ គេគ្រប់គ្រងទៅលើបច្ចេកវិទ្យា គេចាប់បានទាំងអស់ អត់ដូចមុនទេ»៕
