ភ្នំពេញៈ តាមលទ្ធផលជំរឿនសត្វត្មាតទូទាំងប្រទេស លើកទី៣ ឆ្នាំនេះ ដែលធ្វើឡើងដោយក្រសួងបរិស្ថាន និងក្រុមការងារអភិរក្សសត្វត្មាតកម្ពុជា បានកត់ត្រាវត្តមានសត្វត្មាតបានចំនួន ១២១ ក្បាល ខណៈការជំរឿននេះនឹងត្រូវធ្វើ ២ លើកទៀត ដើម្បីសន្មត់ពីចំនួនសត្វត្មាតឆ្នាំនេះ តើធ្លាក់ចុះឬកើនឡើង។
យោងតាមរបាយការណ៍ស្ដីពីលទ្ធផលជំរឿន សត្វត្មាតរបស់ក្រសួងបរិស្ថាន ដែល ភ្នំពេញ ប៉ុស្ដិ៍ ទទួលបាននៅថ្ងៃទី ១២ ខែកក្កដា បានឱ្យដឹងថា ក្រុមការងារអភិរក្សសត្វត្មាតកម្ពុជា កាលពីថ្ងៃទី ២០ ខែ មិនថុនា ឆ្នាំ ២០២១ បានធ្វើជំរឿនសត្វត្មាតទូទាំងប្រទេសនៅក្នុងទីតាំងអាហារដ្ឋានត្មាតចំនួន ៤ គឺអាហារដ្ឋានត្មាត ស្ថិតនៅក្នុងដែនជម្រកសត្វព្រៃសៀមប៉ាង ក្នុងខេត្តស្ទឹងត្រែង អាហារដ្ឋានត្មាត ដែនជម្រកសត្វព្រៃឆែបក្នុងខេត្តព្រះវិហារ អាហារដ្ឋានត្មាត ដែនជម្រកសត្វព្រៃសំបូរក្នុងខេត្តក្រចេះ និងអាហារដ្ឋានត្មាតដែនជម្រកសត្វព្រៃស្រែពកក្នុងខេត្តមណ្ឌលគិរី។
ក្រុមការងារអភិរក្សសត្វត្មាតកម្ពុជា បានកត់ត្រាវត្តមានសត្វត្មាតបានចំនួន ១២១ ក្បាល ក្នុងនោះមានត្មាតភ្លើង ២០ ក្បាល ត្មាតផេះ ៦៦ ក្បាល និងត្មាតត្នោត ៣៥ ក្បាល។
ដោយឡែកលទ្ធផលនៃការធ្វើជំរឿន កាលពីថ្ងៃទី ១០ ខែ មិថុនា ឆ្នាំ ២០២១ ក្រុមការងាររាប់ឃើញសត្វត្មាតចំនួន ៨២ ក្បាល ក្នុងនោះ មានត្មាតភ្លើង ១៣ ក្បាល ត្មាតផេះ ៤២ ក្បាល និងត្មាតត្នោត ២៧ ក្បាល។ នេះបើតាមរបាយការណ៍បញ្ជាក់។
លោក នេត្រ ភក្ត្រា មន្រ្ដីនាំពាក្យ ក្រសួងបរិស្ថានបានឱ្យដឹងនៅថ្ងៃទី ១២ ខែកក្កដាថា ជំរឿនសត្វត្មាតកម្ពុជានាថ្ងៃទី ២០ ខែ មិថុនា ឆ្នាំ ២០២១ ជាជំរឿនលើកទី៣ សម្រាប់ឆ្នាំ ២០២១ នេះ ដែលត្មាតចំនួន ១២១ ក្បាល ត្រូវបានកត់ត្រា។
ការធ្វើជំរឿនសត្វត្មាតកម្ពុជា ធ្វើឡើងចំនួន ៥ ដងក្នុង ១ ឆ្នាំ គឺនៅថ្ងៃទី ១០ ខែ មីនា ថ្ងៃទី ១០ ខែ មិថុនា ថ្ងៃទី ២០ ខែ មិថុនា ថ្ងៃទី ២០ ខែកញ្ញា និងថ្ងៃទី ២០ ខែធ្នូ ជារៀងរាល់ឆ្នាំ។
លោកបានថ្លែងថា៖ «នេះគឺជាចំនួនមួយ ដែលមានការកើនឡើង បើប្រៀបធៀបនឹងការធ្វើជំរឿន កាលពីថ្ងៃទី ១០ ខែ មិថុនា ឆ្នាំ ២០២១ កន្លងទៅ មានសត្វត្បាតចំនួន ៨២ ក្បាលត្រូវបានកត់ត្រា»។
សមាសភាពក្រុមការងារអភិរក្សសត្វត្មាតកម្ពុជារួមមាន ក្រសួងបរិស្ថាន ក្រសួងកសិកម្ម រុក្ខាប្រមាញ់ និងនេសាទ អង្គការជីវិតសត្វស្លាបអន្តរជាតិ (Bird Life) អង្គការមូលនិធិសកលសម្រាប់ធម្មជាតិ (WWF) មជ្ឈមណ្ឌលអង្គរដើម្បីអភិរក្សជីវៈចម្រុះ (ACCB) អង្គការសមាគមអភិរក្សសត្វព្រៃ (WCS) អង្គការជីវិតធម្មជាតិកម្ពុជា (NLC) ក្រុមហ៊ុន Rising Phoenix អង្គការ CBGA ក្រុមហ៊ុន SVC Tour និង មជ្ឈមណ្ឌលអភិរក្សជីវៈចម្រុះ (CBC)។
លោក ភក្ត្រា បានថ្លែងអំណារគុណចំពោះក្រសួងស្ថាប័ននិងអង្គការដៃគូដែលបានចូលរួមក្នុងការធ្វើជំរឿនសត្វត្មាតកម្ពុជាឆ្នាំនេះ។ ការធ្វើជំរឿន រាប់ចំនួនសត្វត្មាតនេះ គឺមានសារៈសំខាន់ណាស់ ដើម្បីឱ្យបានដឹងពីចំនួនពិតនៃសត្វត្មាតនៅកម្ពុជា និងស្ថានភាពនៃការវិវត្តជុំវិញចំនួនសត្វត្មាត។
លោកបន្តថា៖ «នេះជាការអង្កេតតាមដានជីវៈចម្រុះនៅក្នុងតំបន់ការពារធម្មជាតិនៅកម្ពុជា ដើម្បីដឹងថា តើនៅក្នុងតំបន់ការពារធម្មជាតិមានវត្តមានសត្វព្រៃ ជីវៈចម្រុះអ្វីខ្លះដើម្បីងាយស្រួលក្នុងការរៀបចំផែនការការពារ និងអភិរក្សឱ្យមានប្រសិទ្ធភាពខ្ពស់ សំដៅថែរក្សាឱ្យបាននូវជីវៈចម្រុះដែលកម្ពុជាមាន»។
បើតាមលោក ភក្ត្រា លទ្ធផលជំរឿនសត្វត្មាតទូទាំងប្រទេសកម្ពុជា កាលពីឆ្នាំ ២០២០ គឺបានកត់ត្រាចំនួនសត្វត្មាតច្រើនបំផុត មានតែ ១២៩ ក្បាលប៉ុណ្ណោះ។
លោក កែន សេរីរដ្ឋា នាយកកម្មវិធីនៃអង្គការសមាគមអភិរក្សសត្វព្រៃកម្ពុជា (WCS) បានឱ្យដឹងថា ប្រភេទសត្វត្មាតជិតផុតពូជបំផុត ដែលមានវត្តមាននៅកម្ពុជា គឺត្មាតផេះ ត្មាតភ្លើង និងត្មាតត្នោត។ អង្គការ WCS បានរៀបចំផ្តល់ចំណីបន្ថែម តាមរយៈការធ្វើអាហារដ្ឋានត្មាត ដើម្បីតាមដានពីចំនួនសត្វត្មាត។
លោកថ្លែងថា៖«អង្គការ WCS សហការជាមួយក្រសួងបរិស្ថាន អនុវត្តនូវសកម្មភាពអភិរក្សនៅតាមតំបន់ការពារធម្មជាតិតាមរយៈការផ្តល់ចំណីបន្ថែម និងការការពារសម្បុកពងកូន អភិវឌ្ឍការយល់ដឹងស៊ីជម្រៅ នៃកត្តាប្រឈមដល់សត្វត្មាតនៅក្នុងខេត្តព្រះវិហារ»។
លោកថ្លែងថា អង្គការ WCS សហការជាមួយក្រសួងបរិស្ថាន និងអង្គការ អភិរក្ស ផ្សេងទៀត អនុវត្តនូវសកម្មភាពអភិរក្សនៅតាមតំបន់ការពារធម្មជាតិ តាមរយៈការផ្តល់ចំណីបន្ថែម និងការការពារសម្បុកពងកូន អភិវឌ្ឍការយល់ដឹងស៊ីជម្រៅ នៃកត្តាប្រឈមដល់សត្វត្មាតនៅក្នុងខេត្តព្រះវិហារ៕