.jpg)
អគ្គិភ័យឆាបឆេះនៅទីតាំង ១ កន្លែង នៅខណ្ឌសែនសុខ នាថ្ងៃទី ១២ កក្កដានេះ។ រួបថត ប៉ូលិសផ្នែកបង្ការ ពន្លត់អគ្គិភ័យ និងសង្គ្រោះ
ភ្នំពេញៈ មន្ត្រីនគរបាលការិយាល័យបង្ការ ពន្លត់អគ្គិភ័យ និងសង្គ្រោះ នៃរាជធានីភ្នំពេញ និយាយថា នៅព្រឹកថ្ងៃទី ១២ កក្កដា មានគ្រោះអគ្គិភ័យកើតឡើងចំនួន ២ លើកក្នុងរាជធានីភ្នំពេញ ដោយបានបណ្ដាលឲ្យឆេះខូចខាតទាំងស្រុងនូវឃ្លាំងស្តុក គ្រឿងបរិក្ខារអគ្គិសនីចំនួន១និងបន្ទប់ផ្ទះល្វែង ២ ដែលធ្វើពីឈើនៅជាន់ទី៥។
លោក ព្រំ យ៉ន ប្រធានការិយាល័យបង្ការ ពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ ប្រាប់ ភ្នំពេញ ប៉ុស្តិ៍ថា ករណីគ្រោះអគ្គិភ័យលើកទី១ បានកើតឡើងនៅវេលាម៉ោង ៣:៣០ នាទីព្រឹកទៀបភ្លឺ នៅចំណុចឃ្លាំងលេខ ២២៩ ផ្លូវបេតុងក្រុមទី៣ ភូមិអូរបែកក្អម សង្កាត់អូរបែកក្អម ខណ្ឌសែនសុខ រាជធានីភ្នំពេញ។ ឃ្លាំងនោះមានទំហំ ១០ ម៉ែត្រ គុណនឹង ១២ ម៉ែត្រ ជាប្រភេទសំណង់ថ្មបេតុង ប្រក់ស័ង្កសី និងផ្ទុកពេញទៅដោយគ្រឿងបរិក្ខារអគ្គិសនី ជាកម្មសិទ្ធិរបស់ឈ្មោះ លី ប៉ាវ អាយុ ៤៥ ឆ្នាំ។
លោកថ្លែងថា៖ «ទាំងសំណង់ និងគ្រឿងបរិក្ខារអគ្គិសនី ត្រូវបានឆេះខូចខាតទាំងស្រុង ប៉ុន្តែមិនបង្កការឆេះរាលដាលដល់លំនៅឋានដទៃឡើយ ហើយក៏មិនបង្កគ្រោះថ្នាក់ដល់អ្នកណាម្នាក់ឡើយ។ គ្រោះអគ្គិភ័យនេះ បង្កឡើងដោយការផ្ទុះឆ្លងចរន្តអគ្គិសនី»។
លោកបន្តថា ករណីគ្រោះអគ្គិភ័យនេះកម្លាំងសមត្ថកិច្ចការិយាល័យបង្ការ និងពន្លត់អគ្គិភ័យ រាជធានីភ្នំពេញ រួមសហការពីកម្លាំងអន្តរាគមន៍ពន្លត់អគ្គិភ័យនៃក្រុមហ៊ុនស្រាបៀរកម្ពុជា បានចំណាយពេលប្រមាណ១ម៉ោង ទើបអាចពន្លត់អគ្គិភ័យនោះទាំងស្រុងបាន ដោយប្រើប្រាស់រថយន្តពន្លត់អគ្គិភ័យសរុបចំនួន១៦គ្រឿង និងប្រើប្រាស់ទឹកអស់១៣២ម៉ែត្រគុប។
លោក ព្រំ យ៉ន បានបន្តថា នៅព្រឹកថ្ងៃដដែលនេះ គឺនៅវេលាម៉ោង ១០:១៥ នាទីព្រឹកក៏មានគ្រោះអគ្គិភ័យមួយទៀត បានកើតឡើង នៅចំណុចផ្ទះលេខ ១៩ ផ្លូវ ១១៨ ភូមិ ៥ សង្កាត់ដេប៉ូទី៣ ខណ្ឌទួលគោក រាជធានីភ្នំពេញ។ ករណីនេះ បានបណ្ដាលឲ្យផ្ទះល្វែងទំហំ ៤ ម៉ែត្រគុណ ៦ ម៉ែត្រ មាន ២ បន្ទប់ធ្វើពីឈើ នៅជាន់ទី៥ ដែលមានម្ចាស់ឈ្មោះ ឱ សំអាត អាយុ ៦៧ ឆ្នាំ ជាស្ត្រីមេផ្ទះ បានរងការឆេះខូចខាតទាំងស្រុង។
លោកបញ្ជាក់ថា៖ «យោងតាមការរៀបរាប់របស់ពលរដ្ឋដែលរស់នៅក្បែរកន្លែងកើតហេតុ ករណីអគ្គិភ័យនេះ បង្កឡើងដោយផ្ទុះកំប៉ុងហ្គាសដាំស្ល។ ព្រោះអ្នកជិតខាងបានឮសូរសំឡេងផ្ទុះមុនពេលឃើញមានអណ្ដាតភ្លើងឆាបឆេះនៅក្នុងបន្ទប់ផ្ទះល្វែងនោះ។ ករណីនេះក៏គ្មានអ្នកណាម្នាក់រងរបួសនោះដែរ ព្រោះពេលកើតហេតុម្ចាស់ផ្ទះមិននៅ»។
យ៉ាងណាក៏ដោយ ករណីនេះសមត្ថកិច្ចបានប្រើប្រាស់រថយន្តបាញ់ទឹកចំនួន ៥ គ្រឿង ប៉ុន្តែបានបាញ់ទឹកអស់ត្រឹមតែ៣គ្រឿងប៉ុណ្ណោះ ក៏រលត់អស់ទៅវិញ ដោយសារតែអ្នកជិតខាង ដែលនៅអគារខ្ពស់ៗក្បែរនោះ ជួយបាញ់ទឹកពីលើមកពន្លត់ផងដែរ មុនពេលកម្លាំងអន្តរាគមន៍បានទៅដល់៕
