ស្វាយរៀង/កំពង់ស្ពឺៈ រដ្ឋបាលខេត្តស្វាយរៀងសម្រេចបន្តផ្អាកការលក់ដូរគ្រឿងស្រវឹងគ្រប់ប្រភេទរយៈពេល ៧ ថ្ងៃបន្ថែមទៀត គិតចាប់ពីថ្ងៃទី ១២ កក្កដា ដល់ថ្ងៃទី ១៨ ខែកក្កដា ដើម្បីទប់ស្កាត់ការឆ្លងរាលដាលជំងឺកូវីដ ១៩ ខណៈស្ថានភាពនៃការឆ្លងជំងឺកូវីដក្នុងខេត្តនេះនៅមិនទាន់ទប់ស្កាត់បានទាំងស្រុង ស្របពេលដែលខេត្តកំពង់ស្ពឺមានការផ្អាកការផ្ដល់សេវាផ្នែកបរិស្ថាន ដោយសារបារម្ភពីការឆ្លងជំងឺកូវីដ។
ការសម្រេចនេះធ្វើឡើងតាមរយៈសេចក្ដីណែនាំរបស់លោក ម៉ែន វិបុល អភិបាលខេត្តស្វាយរៀង ដែលបានចេញផ្សាយកាលពីយប់ថ្ងៃទី ១១ ខែកក្កដា ឱ្យបន្តផ្អាកការលក់ដូរគ្រឿងស្រវឹងគ្រប់ប្រភេទបន្ថែមចំនួន ៧ ថ្ងៃទៀតគិតចាប់ពីថ្ងៃទី ១២ ដល់ថ្ងៃទី ១៨ ខែកក្កដា ដើម្បីទប់ស្កាត់ការឆ្លងរាលដាលជំងឺកូវីដ ១៩ និងជំងឺឆ្លងកាចសាហាវផ្សេងៗទៀតក្នុងភូមិសាស្ត្រខេត្តស្វាយរៀង។
នៅក្នុងលិខិតនោះ លោក ម៉ែន វិបុល បានឱ្យដឹងថា ស្ថានភាពនៃការឆ្លងរាលដាលនៃជំងឺកូវីដ ១៩ “ក្នុងព្រឹត្តិការណ៍សហគមន៍ ២០ កុម្ភៈ” នៅក្នុងខេត្តស្វាយរៀង នៅមិនទាន់ទប់ស្កាត់បានទាំងស្រុងនៅឡើយ។ ពេលនេះកំពុងមានការឆ្លងរាលដាលជាបន្តបន្ទាប់ទៀត ទើបរដ្ឋបាលខេត្តស្វាយរៀងសម្រេចបន្តវិធានការនេះបន្ថែម ដើម្បីធានាការពារអាយុជីវិតបងប្អូនពលរដ្ឋ សុខភាពសាធារណៈ ក៏ដូចជាសណ្តាប់ធ្នាប់សង្គម។
លិខិតដដែលបញ្ជាក់ថា «គ្រប់ផ្សាររដ្ឋ ផ្សារឯកជន ផ្សារម៉ាត ភោជនីយដ្ឋាន អាហារដ្ឋាន តូបលក់អាហារ ហាងកាហ្វេ ហាងភេសជ្ជៈ ទីតាំងអាជីវកម្មផ្នែកអាហារ ភេសជ្ជៈ និងដេប៉ូចែកចាយគ្រឿងស្រវឹង ត្រូវផ្អាកនូវការលក់ដូរគ្រឿងស្រវឹងគ្រប់ប្រភេទជាបណ្តោះអាសន្ន ចាប់ពីថ្ងៃទី ១២ ខែកក្កដា ដល់ថ្ងៃទី ១៨ ខែ កក្កដា ឆ្នាំ ២០២១»។
ជាមួយនេះដែរ អភិបាលខេត្តស្វាយរៀងបានបញ្ជាឱ្យរដ្ឋបាលក្រុង ស្រុក ឃុំ សង្កាត់ត្រូវផ្សព្វផ្សាយ និងណែនាំដល់ពលរដ្ឋចំពោះការជួបជុំប្រមូលផ្តុំគ្នាច្រើនពីផ្ទះ ១ ទៅផ្ទះ ១ ដើម្បីពិសាគ្រឿងស្រវឹងគឺត្រូវបានហាមឃាត់ជាដាច់ខាត។
លោកបានបញ្ជាក់ក្នុងលិខិតនោះថា៖ «គណៈបញ្ជាការឯកភាពរដ្ឋបាលខេត្ត មន្ទីរអង្គភាពពាក់ព័ន្ធ និងរដ្ឋបាលក្រុង ស្រុក ឃុំ សង្កាត់ ត្រូវធ្វើការណែនាំស្តីពីការហាមឃាត់ និងទប់ស្កាត់ការជួបជុំការលក់ដូរ និងពិសាគ្រឿងស្រវឹងគ្រប់ប្រភេទ ក្នុងករណីបងប្អូនប្រជាពលរដ្ឋ អ្នកគ្រប់គ្រងផ្សារ ម្ចាស់ដេប៉ូចែកចាយ ម្ចាស់ហាង ម្ចាស់តូបលក់ដូរ ក៏ដូចជាម្ចាស់ទីតាំង អាជីវកម្មពាក់ព័ន្ធនឹងការលក់ដូរគ្រឿងស្រវឹង មិនអនុវត្តតាមការណែនាំនេះនឹងត្រូវទទួលទណ្ឌកម្មស្របតាមវិធានការរដ្ឋបាល»។
ប្រធានមន្ទីរសុខាភិបាលខេត្តស្វាយរៀង លោក កែរ រដ្ឋា បានថ្លែងពីម្សិលមិញថា អភិបាលខេត្តស្វាយរៀងបានបញ្ជាឱ្យផ្អាកការធ្វើដំណើរចេញ-ចូលរបស់ពលរដ្ឋជាមួយប្រទេសវៀតណាម ដោយទុកឱ្យដំណើរការតែការដោះដូរទំនិញប៉ុណ្ណោះ។
លោកថ្លែងថា៖ «ឥឡូវឯកឧត្តមអភិបាលខេត្ត លោកពង្រឹងឱ្យយើងត្រួតពិនិត្យតាមព្រំដែន ច្រករបៀងក៏យើងត្រួតពិនិត្យដែរ ហើយប្រសិនបើមានការលួចចូលតាមចន្លោះដែលមិនមានការត្រួតពិនិត្យហ្នឹងក៏ពេលមកដល់អាជ្ញាធរគាត់ចាប់បាន យកទៅធ្វើចត្តាឡីស័ក ព្រោះពេលនេះយើងមានមណ្ឌលចត្តាឡីស័កនៅគ្រប់ស្រុកទាំងអស់ នៅឃុំក៏មានដែរ។ អ្នកដែលមានការប៉ះពាល់ផ្ទាល់គឺត្រូវតែយកមកចត្តាឡីស័កនៅមណ្ឌលចត្តាឡីស័កនៅថ្នាក់ស្រុក»។
បើតាម លោក កែរ រដ្ឋា គិតមកទល់ថ្ងៃទី ១២ ខែកក្កដានេះ ខេត្តស្វាយរៀងមានអ្នកឆ្លងជំងឺកូវីដ ១៩ សរុបជិត ៣ ៥០០ នាក់ហើយ ខណៈអ្នកស្លាប់ដោយសារជំងឺនេះមាន ៣៥ នាក់ និងអ្នកស្លាប់ដោយជំងឺផ្សេង ប៉ុន្តែមានផ្ទុកកូវីដ ១៩ មានចំនួន ១៣ នាក់។
ដោយឡែកនៅខេត្តកំពង់ស្ពឺ មន្ទីរបរិស្ថានខេត្តបានប្រកាសជាសាធារណៈពីការផ្អាកដំណើរការជាបណ្តោះអាសន្នក្នុងការផ្តល់សេវាគ្រប់ប្រភេទពាក់ព័ន្ធនឹងវិស័យបរិស្ថាន ជូនដល់ពលរដ្ឋ និងសាធារណជនទាំងអស់ចាប់ពីថ្ងៃទី ១២ ដល់ថ្ងៃទី ២៦ ខែកក្កដាផងដែរ។
ក្នុងសេចក្តីជូនដំណឹងរបស់មន្ទីរបរិស្ថានខេត្តកំពង់ស្ពឺថ្ងៃទី ១២ ខែកក្កដាសរសេរថា «មន្ទីរបរិស្ថានខេត្តកំពង់ស្ពឺត្រូវត្រួតពិនិត្យ តាមដាន និងអនុវត្តវិធានការទប់ស្កាត់ការឆ្លងរាលដាលជំងឺកូវីដ ១៩ ដែលអាចប្រឈមនឹងហានិភ័យដល់បងប្អូនប្រជាពលរដ្ឋ និងសាធារណជន ដែលអញ្ជើញមកទទួលសេវា»៕