ភ្នំពេញៈ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី ១២ ខែកក្កដា បានជម្រាបទៅ លោក លោកស្រីប្រធាន ឬតំណាងក្រុមហ៊ុនសម្បទានដីសេដ្ឋកិច្ច ផ្អាកការធ្វើដំណើរចេញ-ចូលក្នុងព្រះរាជាណាចក្រកម្ពុជាជាបណ្តោះអាសន្ន ចំពោះបុគ្គលិកកម្មករជនជាតិវៀតណាមទាំងអស់ ដើម្បីទប់ស្កាត់ការឆ្លងរាលដាលនៃជំងឺកូវីដ ១៩។
លោក វេង សាខុន បានបញ្ជាក់ថា សំណើផ្អាកការចេញចូលនេះ គឺយោងតាមអនុសាសន៍របស់លោកនាយករដ្ឋមន្ត្រី ហ៊ុន សែន កាលពីថ្ងៃទី ១១ ខែ កក្កដា ឆ្នាំ ២០២១ ដែលបានស្នើសុំឱ្យបណ្តាក្រុមហ៊ុនវៀតណាមដែលកំពុងមានវត្តមានធ្វើការវិនិយោគនៅក្នុងព្រះរាជាណាចក្រកម្ពុជា ផ្អាកការធ្វើដំណើរឆ្លងកាត់ពីកម្ពុជាទៅវៀតណាម និងពីវៀតណាមមកកម្ពុជាវិញជាបណ្ដោះអាសន្ន។
ការស្នើនេះ គឺធ្វើចំពោះបុគ្គលិកកម្មករជនជាតិវៀតណាមទាំងអស់ ដើម្បីចូលរួមទប់ស្កាត់ ការរីករាលដាលជាសកលនៃជំងឺកូវីដ ១៩ នៅក្នុងព្រះរាជាណាចក្រកម្ពុជា ក៏ដូចជាពិភពលោកទាំងមូល។
លោករដ្ឋមន្ដ្រីបញ្ជាក់ថា៖ «សូមឯកឧត្តម លោកជំទាវ អ្នកឧកញ៉ា លោកឧកញ៉ា លោក លោកស្រី ដែលជាប្រធាន ឬតំណាងក្រុមហ៊ុនសម្បទានដីសេដ្ឋកិច្ចជ្រាប និងចាត់វិធានអនុវត្តឱ្យមានប្រសិទ្ធភាពបំផុត»។
លោក រស់ ផារិទ្ធ អភិបាលរង និងជាអ្នកនាំពាក្យរដ្ឋបាលខេត្ដស្វាយរៀង បានឱ្យដឹងកាលពីម្សិលមិញថា រដ្ឋបាលខេត្ដបានអនុវត្ដតាមការណែនាំ និងអនុសាសន៍របស់ថ្នាក់ដឹកនាំ ចំពោះការទប់ស្កាត់ការរីករាលដាលជំងឺកូវីដ ១៩ នេះ។
ចំណែកការផ្អាកការចេញចូលចំពោះបុគ្គលិកកម្មករជនជាតិវៀតណាមទាំងអស់នេះ គឺរដ្ឋបាលខេត្ដស្វាយរៀងបានជូនដំណឹងដល់គ្រប់ស្រុកដែលមានច្រកចេញចូលតាមព្រំដែនឱ្យអនុវត្ដតាមបទបញ្ជារបស់ថ្នាក់ដឹកនាំរួចហើយ។
លោកថ្លែងថា៖ «ឥឡូវយើងមិនទាន់មានទិន្នន័យតួលេខច្បាស់ទេ ចំពោះការចេញចូលជាប្រចាំគ្រាន់តែកន្លងមកការចេញចូលតាមច្រកព្រំដែនភាគច្រើន គឺជាការដោះដូរគ្នារវាងទំនិញ និងបន្លែជាដើម ហើយការចេញចូលភាគច្រើនគឺតាមច្រកព្រំដែនអន្តរជាតិបាវិត»។
លោកបញ្ជាក់ថា៖ «រដ្ឋបាលខេត្ដយើង បានអនុវត្ដជាប់ជានិច្ចតាមបទបញ្ជារបស់ថ្នាក់ដឹកនាំ ពិសេសចំពោះការទប់ស្កាត់ការឆ្លងរាលដាលជំងឺកូវីដ ១៩ នេះ យើងមិនអាចធ្វេសប្រហែសបានទេ ក្នុងដំណាក់កាលនេះ ដូច្នេះគឺយើងត្រូវតែរឹតបន្តឹងតាមបទបញ្ជាដែលថ្នាក់ដឹកនាំបានដាក់ចុះ»។
លោក លី សាវេត អភិបាលរង និងជាអ្នកនាំពាក្យរដ្ឋបាលខេត្ដតាកែវ បានឱ្យដឹងថា កន្លងមកទាក់ទងនឹងការចេញចូលតាមច្រកព្រំដែនកម្ពុជា-វៀតណាម នៅក្នុងភូមិសាស្ដ្រខេត្ដតាកែវ គឺភាគីទាំង ២ បានរឹតបន្តឹងជាប់ជាប្រចាំ ហើយបន្ទាប់ពីមានការណែនាំបន្ថែមពីរាជរដ្ឋាភិបាល រដ្ឋបាលខេត្ដនឹងបន្តអនុវត្ដតាមការណែនាំនេះជាបន្តទៅទៀត។
លោកថ្លែងថា៖ «កន្លងមកនៅច្រកអន្តរជាតិតំបន់ ១ គឺយើងបានពង្រឹងលើការចេញចូលសម្រាប់ភាគីទាំង ២ ជាប់លាប់ជានិច្ច។ នៅច្រកព្រំដែនយើងភាគច្រើនគឺចេញចូលដឹកទិន្នផលស្រូវ និងទំនិញប្រើប្រាស់នៅក្នុងខេត្ដមួយចំនួន។ បច្ចុប្បន្ន ការដឹកជញ្ជូនទិន្នផលស្រូវក៏បានផុតរដូវប្រមូលផលទៀត ដូច្នេះមិនសូវមានការចេញចូលឆ្លងកាត់ព្រំដែនទេ»។
លោកនាយករដ្ឋមន្ដ្រីបានថ្លែងក្នុងកិច្ចប្រជុំគណៈរដ្ឋមន្ត្រីតាមអនឡាញ កាលពីថ្ងៃទី ៩ ខែកក្កដា ឆ្នាំ ២០២១ ដោយបានសម្តែងការព្រួយបារម្ភចំពោះការឆ្លងជំងឺកូវីដ ១៩ នៅតាមព្រំដែនប្រទេសវៀតណាម ដោយសារតែជនជាតិវៀតណាមមួយចំនួននៅតែបន្តឆ្លងដែនចេញ-ចូលប្រទេសកម្ពុជា។
កាលពីថ្ងៃទី ១ ខែកក្កដា ឆ្នាំ ២០២១ តាមរយៈការថ្លែងសារពិសេសទៅកាន់ប្រជាពលរដ្ឋ លោក ហ៊ុន សែន បានណែនាំម្តងរួចមកហើយក្នុងការទប់ស្កាត់កុំឱ្យជនជាតិវៀតណាមឆ្លងដែន ចេញ-ចូល។ ប៉ុន្តែនៅក្នុងកិច្ចប្រជុំកាលពីថ្ងៃទី ៩ ខែកក្កដា លោកនាយករដ្ឋមន្ដ្រីបានបញ្ជាក់ថា តាមរបាយការណ៍ គឺនៅតែមានជនជាតិវៀតណាមឆ្លងដែនចេញ-ចូលប្រទេសកម្ពុជា។
លោកនាយករដ្ឋមន្ដ្រីបញ្ជាក់ថា៖ «នៅតាមព្រំដែនវៀតណាម យើងសង្កេតឃើញថា បើយោងទៅតាមរបាយការណ៍ដែលបានបញ្ចូលទៅក្នុងក្រុមប្រឆាំងកូវីដ ១៩ នៅតាមព្រំដែនកម្ពុជា-វៀតណាម អាណិកជនវៀតណាម នៅតែចេញចូល។
អ៊ីចឹងទេ សូមសម្ដេចក្រឡាហោម (ស ខេង) ណែនាំទៅបណ្ដាខេត្ដដែលជាប់ព្រំដែនកម្ពុជា-វៀតណាម ដោយសាររឿងនេះខ្ញុំបានជជែកជាមួយនាយករដ្ឋមន្ដ្រីវៀតណាម នៅហ្សាការតាផង ហើយថ្ងៃមុន ក៏ជួបគ្នាតាមទូរស័ព្ទថា ឱ្យពង្រឹងការគ្រប់គ្រងតាមទល់ដែន។ ពេលដែលខ្ញុំជួបជាមួយអគ្គរដ្ឋទូតវៀតណាម ដែលស្នើសុំលាទៅក៏បានលើកពីបញ្ហានេះ»៕