.jpg)
គ្រូពេទ្យនាំជនពិការភ្នែកក្នុងសមាគមដែលឆ្លងកូវីដទៅមន្ទីរពេទ្យពីថ្ងៃ ១០ កក្កដា។ រូបថត ហ្វេសប៊ុក
ភ្នំពេញៈ យ៉ាងហោចណាស់មានជនពិការភ្នែក ៣៦ នាក់ ក្នុងចំណោមគ្នា ៥៨ នាក់ ដែលកំពុងស្នាក់នៅក្នុងសមាគមតន្ត្រីសំនៀងជនពិការបានឆ្លងកូវីដ ១៩ បើទោះជាបានប្រឹងប្រែងអនុវត្តនូវវិធានការ ៣កុំ ៣ការពារយ៉ាងណាក៏ដោយ។ នេះបើតាមការអះអាងរបស់លោក ចាប តូ ប្រធានសមាគមតន្ត្រីសំនៀងជនពិការកាលពីថ្ងៃទី ១១ ខែកក្កដា។
លោកបានបន្តថា៖ «យើងពិតជាមានក្ដីព្រួយកង្វល់ខ្លាំងណាស់នៅពេលដែលលទ្ធផលតេស្តបានបង្ហាញថាសមាជិករបស់យើង ៣៦ នាក់ មានវិជ្ជមានជំងឺកូវីដ ១៩ ហើយក្នុងចំនួននេះមានម្នាក់ជាស្ត្រីមានផ្ទៃពោះ និងមានបុរសម្នាក់មានជំងឺបេះដូង»។
បើតាមលោក ចាប តូ ក្នុងរយៈពេលជិត ២ ឆ្នាំកន្លងមកនេះ គ្មានសមាជិកណាម្នាក់ដែលស្នាក់នៅក្នុងមណ្ឌលរបស់សមាគមតន្ត្រីសំនៀងជនពិការភ្នែក ត្រូវបានអនុញ្ញាតឱ្យចេញទៅច្រៀងនៅខាងក្រៅនោះទេ។ ការសុំទៅលេងបងប្អូននៅផ្ទះត្រូវយកសំណាកទៅតេស្តរកជំងឺកូវីដ ១៩ និងតម្រូវឱ្យធ្វើចត្តាឡីស័ក ១៤ ថ្ងៃ ពេលត្រឡប់ចូលក្នុងមណ្ឌលវិញ។
លោកបានបញ្ជាក់ថា៖ «យើងបានរៀបចំអនាម័យពាក់ម៉ាស់ លាងទឹកអាល់កុល ប្រើម៉ាស៊ីនបាញ់កម្ដៅ និងរក្សាគម្លាតព្រមទាំងហាមឃាត់ការចេញទៅច្រៀងនៅខាងក្រៅម្លឹងហើយ នៅតែមានសមាជិកយើងឆ្លងជំងឺកូវីដ-១៩នេះបានទៀត»។
លោកបានឱ្យដឹងថា ពេលនេះអ្នកមានវិជ្ជមានជំងឺកូវីដ ១៩ ទាំង ៣៦ នាក់នោះ ត្រូវបានដាក់នៅក្នុងអគារស្នាក់នៅមួយដាច់ដោយឡែកដើម្បីការពារការឆ្លងរីករាលដាលដល់អ្នកផ្សេង។
បើតាមលោក ចាប តូ បច្ចុប្បន្ននៅក្នុងសមាគមមានបុគ្គលិកដែលមានកាយសម្បទាមាំមួន និងមិនមែនជាជនមានពិការភាពចំនួន ៥ នាក់ ជាអ្នកមើលថែទាំបងប្អូនជាជនមានពិការភ្នែកទាំងនោះផង និងជាអ្នកបណ្ដុះបណ្ដាលពួកគេឱ្យចេះច្រៀង និងលេងភ្លេងផង។
ទោះជាបែបណាក្ដី លោក ចាប តូ បានប្រាប់ឱ្យដឹងថា៖ «បច្ចុប្បន្នសមាគមយើងខ្ញុំមានការខ្វះខាតស្បៀងអាហារ និងថ្នាំសង្កូវ សម្រាប់ផ្គត់ផ្គង់ដល់បងប្អូនជនពិការ និងកំពុងជំពាក់ថ្លៃទឹក ភ្លើង ព្រោះសមាគមមិនអាចចេញច្រៀងរកប្រាក់ចំណូលដូចមុនបានទេ។ ជីវភាពរបស់បងប្អូនក្នុងសមាគមយើងខ្ញុំនៅពេលនេះគឺពឹងអាស្រ័យលើជំនួយឧបត្ថម្ភពីខាងអាជ្ញាធរមន្ទីរសង្គមកិច្ច ព្រមទាំងសប្បុរសជនមួយចំនួនប៉ុណ្ណោះ»។
ការឆ្លងជំងឺកូវីដ ១៩ ដល់ជនពិការភ្នែកនៅក្នុងមណ្ឌលសមាគមតន្ត្រីសំនៀងជនពិការភ្នែកទាំងនោះត្រូវបានលោកស្រី ញ៉ែម មរកត អនុរដ្ឋលេខាធិការក្រសួងកិច្ចការនារីទទួលបន្ទុកវិស័យពិការភាព អះអាងថា បណ្ដាលមកសាច់ញាតិចេញចូលទៅផ្សារដោយខ្វះការប្រុងប្រយ័ត្នហើយក៏បានចម្លងមេរោគជំងឺកូវីដ ១៩ ពីខាងក្រៅមកដល់ពួកគេ។
លោកស្រីបានបញ្ជាក់ថា៖ «វាពិតជាសង្វេគខ្លាំងណាស់នៅពេលដែលជនពិការភ្នែកស្នាក់នៅតែផ្ទះបានឆ្លងជំងឺកូវីដ ១៩ ពីសាច់ញាតិរបស់ខ្លួនដែលជាមនុស្សភ្នែកភ្លឺ។ ឥឡូវយើងកំពុងបារម្ភស្ត្រីពិការភ្នែក ដែលមានផ្ទៃពោះ និងអ្នកមានជំងឺបេះដូងគ្រប់គ្នាសុទ្ធតែងងឹតភ្នែកហេតុនេះពួកគាត់ភ័យណាស់គ្រាន់តែឮសូរថាមានមេរោគ ក៏នាំគ្នាស្រែកយំតែម្ដង»។
លោកស្រីបានបន្តថា កន្លងមកនេះ ទាំងក្រសួងសុខាភិបាលក្រសួងសង្គមកិច្ច រដ្ឋបាលរាជធានីភ្នំពេញរួមទាំងអាជ្ញាធរមូលដ្ឋានបានជួយព្យាបាលផ្ដល់ស្បៀងអាហារ និងសម្ភារប្រើប្រាស់ ទឹកអាល់កុល ម៉ាស់ ដល់សមាគមតន្ត្រីសំនៀងជនពិការ ដើម្បីផ្ដល់ការលើកទឹកចិត្តដល់ជនមានពិការភាព ពិសេសអ្នកដែលមានវិជ្ជមានកូវីដ ១៩។
ជាមួយគ្នានេះ លោកស្រីក៏បានអំពាវនាវដល់ក្រុមគ្រួសារសាច់ញាតិដែលមានភ្នែកភ្លឺ បង្កើនការយកចិត្តទុកដាក់ដោយអនុវត្តឱ្យបានខ្ជាប់ខ្លួននូវវិធានការទប់ស្កាត់ការឆ្លងរីករាលដាលជំងឺកូវីដ ១៩ គឺ ៣ កុំ ៣ ការពារ ឱ្យបានជាប្រចាំដើម្បីធ្វើយ៉ាងណាកុំឱ្យមានឆ្លងមេរោគដ៏កាចសាហាវនេះដល់សមាជិកគ្រួសារដែលជាជនមានពិការភាព។
យោងតាមទិន្នន័យរបស់សមាគមតន្ត្រីសំនៀងជនពិការភ្នែកបានបង្ហាញថា ជនពិការភ្នែកនៅក្នុងប្រទេសកម្ពុជាមានចំនួន ៦២៨ នាក់ ដែលពួកគេទាំងនោះ គឺជាសមាជិករបស់សមាគមតន្ត្រីសំនៀងជនពិការភ្នែក៕
