ព្រះសីហនុៈ អាជ្ញាធរក្រុងព្រះសីហនុបានដាក់កំហិតដល់អាជីវករលក់ដូរតាមរ៉ឺម៉ក តាមរទេះមិនឱ្យដាក់តុ កៅអី និងឆត្រ លក់ដូរ លើការ៉ូឡាសងខាងផ្លូវ តាមបណ្តោយឆ្នេរ វិថីសម្តេចតេជោ (ផ្លូវឆ្នេរពយតាមូង) ចាប់ពីថ្ងៃទី ១២ ខែ កក្កដា ឆ្នាំ ២០២១ តទៅ បន្ទាប់ពីមានករណីអ្នកលក់ដូរមួយចំនួនបានបាញ់ថ្នាំដាក់សញ្ញាយកជាកម្មសិទ្ធិផ្តាច់មុខរបស់ខ្លួន។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុប្រាប់ ភ្នំពេញ ប៉ុស្តិ៍ កាលពីម្សិលមិញថា ប្រសិនបើពលរដ្ឋលក់ដូរចល័តមិនចោទជាបញ្ហាប៉ុន្មានទេ ប៉ុន្តែចំពោះករណីនេះអាជីវករបានដាក់កៅអីនៅលើការ៉ូឡាដែលជាផ្លូវថ្មើរជើងរបស់ពលរដ្ឋធ្វើដំណើរឆ្លងកាត់ និងហាត់ប្រាណផ្សេងៗ។
លោកបានបន្តថា ដូច្នេះអាជ្ញាធរក្រុងព្រះសីហនុបានចុះទៅរៀបចំសណ្តាប់ធ្នាប់មិនឱ្យអាជីវករទាំងនោះចាប់ទីតាំងយកផ្លូវថ្មើរជើង និងទីសាធារណៈរបស់រដ្ឋធ្វើជាកម្មសិទ្ធិ ដែលបង្កឱ្យមានការបាត់បង់សណ្តាប់ធ្នាប់ និងសោភណភាពក្រុង និងផ្លូវសាធារណៈ។
លោក ភារម្យ ថ្លែងថា៖ «គាត់នាំគ្នាលក់នៅលើផ្លូវថ្មើរជើងផ្លូវសាធារណៈរបស់រដ្ឋ ហើយថែមទាំងបាញ់ថ្នាំបញ្ជាក់ថា មានម្ចាស់ ដែលទង្វើបែបនេះវាហួសហេតុពេក។ អ្វីដែលចង់បញ្ជាក់នៅទីនេះ សមិទ្ធផលទាំងអស់នេះជាទ្រព្យសម្បត្តិសាធារណៈរបស់រដ្ឋ មិនមែនជាកម្មសិទ្ធិឯកជនផ្តាច់មុខរបស់ជនណាម្នាក់នោះទេ»។
ពាក់ព័ន្ធនឹងករណីនេះលោក ស្រេង វ៉ាន់ដេត មន្ត្រីសម្របសម្រួលអង្គការលីកាដូខេត្តព្រះសីហនុថ្លែងពីម្សិលមិញថា នៅតំបន់ឆ្នេរជាធម្មតាតែងតែមានពលរដ្ឋទៅលេងកម្សាន្ត ហើយការលក់ដូរក៏មានដែរ។
ចំពោះករណីពលរដ្ឋយកផ្លូវសាធារណៈដែលជាផ្លូវថ្មីនេះ ធ្វើជាកន្លែងលក់ដូរចំណីអាហារដល់ភ្ញៀវទេសចរ ឬពលរដ្ឋដែលទៅលេងនៅទីនោះវានឹងធ្វើឱ្យបាត់បង់សោភណភាព។ ដូច្នេះ អាជ្ញាធរក្រុងចុះទៅរៀបចំនេះពិតជាត្រឹមត្រូវ។
លោកបានបន្តថា មួយទៀតការចុះទៅណែនាំពលរដ្ឋលក់ដូរឱ្យមានសណ្តាប់ធ្នាប់នេះក៏ស្របតាមការណែនាំរបស់ក្រសួងសុខាភិបាល ឬរដ្ឋបាលខេត្តកុំឱ្យមានការប្រមូលផ្តុំមនុស្សអ៊ូអរ ដែលអាចបង្កឱ្យមានការចម្លងនូវជំងឺកូវីដ ១៩ ផងដែរ។
ទោះជាយ៉ាងណា លោក ស្រេង វ៉ានដេត ក៏បានស្នើដល់អាជ្ញាធរក្រុងព្រះសីហនុ ឬអាជ្ញាធរខេត្តឱ្យរៀបចំទីតាំងណាមួយសមស្របជូនដល់អាជីវករទាំងនោះ ដើម្បីឱ្យពួកគាត់អាចលក់ដូរបាន ហើយក៏អាចឱ្យភ្ញៀវទេសចរដែលទៅលេងនៅទីនោះងាយស្វែងរកទិញចំណីអាហារបរិភោគបានផងដែរ។
លោក អ៊ី សុខឡេង អភិបាលក្រុងព្រះសីហនុកាលពីថ្ងៃទី ១១ ខែ កក្កដា ឆ្នាំ ២០២១ បានចាត់មន្ត្រី និងក្រុមការងារចុះអប់រំការពារបង្ការជំងឺកូវីដ ១៩ ផង និងចុះរៀបចំសណ្តាប់ធ្នាប់ចំពោះអ្នកលក់ដូរតាមបណ្តោយឆ្នេរវិថីសម្តេចតេជោផង (ផ្លូវឆ្នេរពយតាមូង) ក្នុងនោះមន្ត្រីបានជូនដំណឹងដល់អាជីវករលក់ដូរតាមរ៉ឺម៉ក តាមរទេះ មិនឱ្យដាក់តុ កៅអី ឆត្រ លក់ដូរលើការ៉ូឡាសងខាងផ្លូវ និងប្រកាសបញ្ជាក់ថា ការហាមឃាត់នេះនឹងចាប់ផ្តើមអនុវត្ត ពីថ្ងៃទី ១២ ខែ កក្កដា ឆ្នាំ ២០២១ តទៅជាកំហិត។
លោកអភិបាលក្រុងព្រះសីហនុបានបញ្ជាក់ថា ក្នុងករណីមិនអនុវត្តតាមរដ្ឋបាលក្រុងនឹងចាក់វិធានការរដ្ឋបាល ដូចជាពិន័យ ឬដកហូតយកសម្ភារលក់ដូរជាដើម ដើម្បីរក្សាសោភណភាព សណ្តាប់ធ្នាប់តាមផ្លូវធ្វើថ្មីនេះសម្រាប់ការធ្វើដំណើរចេញចូល ឬកម្សាន្តរបស់ពលរដ្ឋ និងភ្ញៀវទេសចរ៕
វីដេអូ៖