.jpg)
មន្ត្រី ក.ប.ប. ចុះត្រួតពិនិត្យទីតាំងបិទស្រាមួយកន្លែងក្នុងខេត្តព្រៃវែង កាលពីខែមិថុនា។ រូបថត កបប
ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) បានចេញរបាយការណ៍កាលពីម្សិលមិញ ឱ្យដឹងថា ប្រជាពលរដ្ឋ ៧០ នាក់បានស្លាប់ដោយសារពុលស្រាស និងស្រាថ្នាំ នៅទូទាំងប្រទេសក្នុងរយៈពេលជាង ១ ឆ្នាំមកនេះ។
លោក ឌឹម ថេង អគ្គនាយករងនៃអគ្គនាយកដ្ឋានការពារអ្នកប្រើប្រាស់ ប្រាប់ ភ្នំពេញ ប៉ុស្តិ៍ នៅថ្ងៃទី ១២ ខែ កក្កដា ឆ្នាំ ២០២១ បានឱ្យដឹងថា តាមការវាយតម្លៃរបស់អង្គការសុខភាពពិភពលោកបានបង្ហាញឱ្យដឹងថា ការប្រើប្រាស់ ស្រាឬ គ្រឿងស្រវឹងបានបង្កឱ្យមានមនុស្សស្លាប់ប្រហែលជាង ៣ លាននាក់នៅលើពិភពលោកក្នុង ១ ឆ្នាំ។
ក្នុងចំណោមអ្នកស្លាប់ទាំងនោះក៏មានផងដែរ បណ្ដាលមកពីការពុលស្រាដោយសារមេតាណុល ដែលកើតចេញពីការផលិតស្រាក្លែងក្លាយដោយមានលាយបញ្ចូលនូវអាល់កុល ដែលមិនមែនជាអេទីលអាល់កុល។
លោក ឌឹម ថេង ថ្លែងថា បញ្ហាពុលមេតាណុលនៅក្នុងស្រាបានកើតមានជាញឹកញាប់នៅតាមបណ្ដាប្រទេសជាច្រើនក្នុងពិភពលោក និងបានបង្កឱ្យមានផលប៉ះពាល់យ៉ាងធ្ងន់ធ្ងរ ដល់សុខុមាលភាព និងសេដ្ឋកិច្ចសង្គម ដោយឡែកករណីពុលស្រានៅក្នុងប្រទេសកម្ពុជាក៏មានកើតឡើងជាញឹកញាប់ផងដែរ ជាពិសេសនៅតាមតំបន់ជាយក្រុង។
លោក ឌឹម ថេង បានឱ្យដឹងថា មានសេណារីយ៉ូចំនួន ២ ដែលអាចបណ្ដាលឱ្យមានស្រាពុល រួមមាន ការប្រើប្រាស់ មេស្រា ដើម្បីលាយធ្វើស្រាសម្រាប់លក់បង្កើនប្រាក់ចំណេញ និង ការចរាចរអាល់កុលក្លែងក្លាយក្នុងបរិបទកូវីដ ១៩។
យោងតាមរបាយការណ៍របស់ ក.ប.ប. ចេញផ្សាយនៅថ្ងៃទី ១២ ខែកក្កដា ឆ្នាំ ២០២១ ដោយគិតចាប់ពីខែមិថុនា ឆ្នាំ ២០២០ រហូតដល់ដើមខែកក្កដា ឆ្នាំ ២០២១ បានឱ្យដឹងថា ក្នុងខែមិថុនា ឆ្នាំ ២០២០ ប្រជាពលរដ្ឋ ៧ នាក់ស្លាប់ នៅក្នុងស្រុកម៉ាឡៃ ខេត្តបន្ទាយមានជ័យ ដោយសារផឹកស្រាថ្នាំតាំងកួយ។ នៅខែវិច្ឆិកា ឆ្នាំ ២០២០ នៅស្រុកទឹកផុស ខេត្តកំពង់ឆ្នាំងមានអ្នកស្លាប់ចំនួន ១៥ នាក់ ដោយសារផឹកស្រាស។
នៅខែឧសភា ឆ្នាំ ២០២១ នៅស្រុកល្វាឯម ខេត្តកណ្ដាល ស្លាប់ ១៤ នាក់ដោយសារផឹកស្រាស និងស្រថ្នាំ។ នៅខែឧសភា ឆ្នាំ ២០២១ នៅស្រុកកំពង់ត្រាច ខេត្តកំពត ក៏មានអ្នកស្លាប់ចំនួន ១០ នាក់ដោយសារផឹកស្រាថ្នាំ។
នៅខែមិថុនា ឆ្នាំ ២០២១ នៅឃុំអន្សាចំបក់ ស្រុកក្រគរ ខេត្តពោធិ៍សាត់ មនុស្ស ៧ នាក់បានស្លាប់ ដោយសារផឹកស្រាស និងស្រាថ្នាំ។ នៅខែមិថុនា ឆ្នាំ ២០២១ ដដែលនេះនៅស្រុកពារាំង ខេត្តព្រៃវែង មានអ្នកស្លាប់ចំនួន ៤ នាក់ ដោយសារផឹកស្រាស និងស្រាថ្នាំ។
នៅដើមសប្តាហ៍ខែកក្កដា ឆ្នាំ ២០២១ ថ្មីៗនេះមានអ្នកស្លាប់ចំនួន ១០ នាក់នៅភូមិកោះជ្វាំង ឃុំស្វាយទងខាងត្បូង ស្រុកកំពង់ត្រាច ខេត្តកំពត និងនៅភូមិលើ ឃុំកោះចូរ៉ាម ស្រុកខ្សាច់កណ្តាល ខេត្តកណ្តាល ក៏កើតមានករណីពុលស្រាសស្រាថ្នាំ បណ្តាលឱ្យស្លាប់បុរសអ្នកផឹកស្រាថ្នាំចំនួន ៣ នាក់ដែរ ដោយសរុបទាំងអស់ ៧០ នាក់។
តាមរបាយការណ៍របស់ ក.ប.ប. កាលពីថ្ងៃទី ៣១ ខែឧសភា ឆ្នាំ ២០២១ បង្ហាញថា ក្នុងរយៈពេលចាប់ពីឆ្នាំ ២០១៦ ដល់ឆ្នាំ ២០២០ មានកើតឡើងករណីពុលស្រាស ជាបន្តបន្ទាប់ចំនួន ៤ លើកនៅខេត្តពោធិ៍សាត់ ក្រចេះ បន្ទាយមានជ័យ និងកំពង់ឆ្នាំង ដែលបង្កឱ្យប្រជាពលរដ្ឋចំនួន ២៨ នាក់ ស្លាប់បាត់បង់ជីវិត និងមានជនរងគ្រោះរាប់រយនាក់ផ្សេងទៀត រងផលប៉ះពាល់ដល់សុខភាពត្រូវសម្រាកព្យាបាលនៅមន្ទីរពេទ្យ។
របាយការណ៍នេះបញ្ជាក់ថា ស្រា គឺជាសារធាតុស្រវឹងដែលបង្កផលប៉ះពាល់ដល់សុខភាពអ្នកបរិភោគជាប្រចាំ និងហួសកម្រិត ពិសេសជាងនេះទៀតនឹងបង្កផលប៉ះពាល់ដល់អាយុជីវិត ប្រសិនបើស្រានោះពុំបានផលិតឱ្យត្រឹមត្រូវតាមលក្ខណៈបច្ចេកទេស ឬយកសារធាតុផ្សេងទៀតមកបន្ថែមមានដូចជាមេតាណុល ឬសារធាតុពុលផ្សេងទៀតជាដើម៕
