.jpg)
សមត្ថកិច្ចកំពុងត្រួតពិនិត្យសាច់ជ្រូក និងគ្រឿងក្នុងជ្រូកខូចគុណភាពនាំចូលពីថៃ កាលពីថ្ងៃទី ១២ កក្កដា។ រូបថត នគរបាល
បន្ទាយមានជ័យៈ សាច់ជ្រូក និងគ្រឿងក្នុងជ្រូកខូចគុណភាព មានទម្ងន់សរុបជាង ២ តោន ត្រូវបានកម្លាំងសមត្ថកិច្ចចម្រុះខេត្តបន្ទាយមានជ័យ បង្ក្រាបចាប់បាននៅចំណុច ភូមិអូរជ្រៅ សង្កាត់-ក្រុងប៉ោយប៉ែត កាលពីថ្ងៃទី ១២ ខែកក្កដា ខណៈម្ចាស់ទំនិញម្នាក់ ត្រូវបានមន្ត្រីជំនាញកសាងសំណុំរឿងបញ្ជូនទៅតុលាការ។
លោក អ៊ឹម សុភារៈ នាយនគរបាលប៉ុស្តិ៍សង្កាត់ប៉ោយប៉ែត បានប្រាប់ ភ្នំពេញ ប៉ុស្តិ៍ នៅថ្ងៃទី ១៣ កក្កដាថា កាលពីថ្ងៃទី ១២ ខែ កក្កដា ឆ្នាំ ២០២១ កំលាំងសមត្ថកិច្ចចម្រុះ ខេត្តបន្ទាយមានជ័យ បានបើកប្រតិបត្តការចុះបង្ក្រាប និងរឹបអូស សាច់ជ្រូក និងគ្រឿងក្នុងជ្រូក សរុបទម្ងន់ ២១១៣ គីឡូក្រាម ដែលត្រូវបានគេនាំចូលពីប្រទេសថៃ តាមច្រកអន្តរជាតិប៉ោយប៉ែត ដើម្បីលក់ចែកចាយបន្ត នៅលើទីផ្សារក្រុងប៉ោយប៉ែត និងទីផ្សារមួយចំនួនទៀត ក្នុងទីប្រជុំជនខេត្តបន្ទាយមានជ័យ។
លោកបានបញ្ជាក់ថា៖ «ប៉ុន្តែអ្នកដែលបាននាំចូលនូវផលិតផលសាច់ជ្រូក និងគ្រឿងក្នុងជ្រូកទាំងនោះ មិនមានលិខិតធ្វើអាជីវកម្មនាំចូលសាច់ជ្រូក និងគ្រឿងក្នុងជ្រូកពីស្ថាប័នជំនាញនោះទេ»។
បើតាមលោក សុភារៈ ទំនិញសាច់និងគ្រឿងក្នុងជ្រូកទាំងនោះរួមមាន ក្បាលជ្រូកចំនួន ២៨គីឡូក្រាម ជើងជ្រូកចំនួន ៥៦៤គីឡូក្រាម ពោះវៀនតាន់ជ្រូក ចំនួន ២៨៨ គីឡូក្រាម ក្រពះជ្រូកមានទម្ងន់ ៤៥០ គីឡូក្រាម បេះដូងជ្រូកទម្ងន់ ១១៥ គីឡូក្រាម សាច់លាយអណ្ដាត ទម្ងន់ ១៣៦ គីឡូក្រាម និងគ្រឿងក្នុង (ហ៊ុនជ្រូក) លាយសាច់ក្បាលទម្ងន់ ៥៣២ គីឡូក្រាម។ បច្ចុប្បន្នទំនិញទាំងនោះ ត្រូវបានមន្ត្រីជំនាញចាប់រឹបអូសទៅរក្សាទុកជាបណ្ដោះអាសន្ន នៅមន្ទីរកសិកម្មខេត្តបន្ទាយមានជ័យ។
ជុំវិញករណីនេះ តំណាងម្ចាស់ទីតាំងនាំចូល និងលក់ចែកចាយបន្តនូវផលិតផលសាច់ជ្រូក និងគ្រឿងក្នុងជ្រូក គឺលោក ទេព សុភាព អាយុ ៥២ ឆ្នាំ មានទីលំនៅភូមិក្បាលស្ពាន ១ សង្កាត់ប៉ោយប៉ែត ក្រុងប៉ោយប៉ែត ត្រូវបានក្រុមមន្ត្រីជំនាញផ្នែកផលិតកម្មសត្វ និងបសុសត្វ នៃមន្ទីរកសិកម្មរុក្ខាប្រមាញ់ និងនេសាទ ខេត្តបន្ទាយមានជ័យ កសាងសំណុំរឿងបញ្ជូនទៅតុលាការ ដើម្បីចាត់វិធានការបន្តតាមនីតិវិធីច្បាប់។ នេះបើតាម លោក ប៉ាង វណ្ណាសេដ្ឋ ប្រធានមន្ទីរកសិកម្ម ខេត្តបន្ទាយមានជ័យ កាលពីរសៀលថ្ងៃទី ១៣ ខែ កក្កដា ឆ្នាំ ២០២១។
លោក វណ្ណាសេដ្ឋ បានថ្លែងថា៖«ករណីនេះ យើងបានកសាងសំណុំរឿងនេះ បញ្ជូនទៅតុលាការហើយ ដើម្បីចំណាត់ការបន្តតាមនីតិវិធីច្បាប់។ ដោយឡែងវត្ថុតាងដែលត្រូវបានរឹបអូស និងរក្សាទុកជាបណ្ដោះអាសន្ន នៅការិយាល័យផលិតកម្មសត្វ និងបសុសត្វ ដើម្បីរង់ចាំការដុតកម្ទេចចោលនៅពេលក្រោយ ព្រោះសាច់និងគ្រឿងក្នុងជ្រូកទាំងនោះ ខូចគុណភាពហើយ»។
ជាមួយគ្នានេះ លោក វណ្ណាសេដ្ឋ បានអំពាវនាវដល់ពាណិជ្ជករលក់បោះដុំ នូវផលិតផលសាច់សត្វចិញ្ចឹមគ្រប់ប្រភេទ ត្រូវចុះបញ្ជីការធ្វើអាជីវកម្មឲ្យបានត្រឹមត្រូវ និងហាមលក់ដូរនូវផលិតផលសាច់សត្វ ដែលគ្មានការត្រួតពិនិត្យគុណភាព និងសុវត្ថិភាពពីមន្ត្រីជំនាញបសុសត្វ ឬពេទ្យសត្វ ទោះជាផលិតផលសាច់សត្វក្នុងស្រុក ឬនាំចូលពីក្រៅប្រទេសក៏ដោយ។ ការធ្វើអាជីវកម្មដោយគ្មានការអនុញ្ញាត ឬលិខិតបញ្ជាក់ពីស្ថាប័នជំនាញ គឺជាអំពើល្មើសច្បាប់៕
វីដេអូ៖
