សៀមរាបៈ ប្រជាការពារភូមិម្នាក់ស្លាប់ ដោយសារស្ទះសរសៃឈាមបេះដូង និងម្នាក់គ្រាន់តែសន្លប់ ពេលដែលកំពុងបំពេញការងារជាសន្តិសុខនៅខាងក្រៅ ទីតាំងចាក់វ៉ាក់សាំងបង្ការជំងឺកូវីដ ១៩ មួយកន្លែង នៅក្នុងភូមិមណ្ឌល ៣ សង្កាត់ស្លក្រាម ក្រុងសៀមរាប។
លោក ម៉ៃ សំកុល មេភូមិមណ្ឌល ៣ បានប្រាប់ ភ្នំពេញ ប៉ុស្តិ៍ថា ហេតុការណ៍នេះបានកើតឡើងនៅវេលាម៉ោងប្រមាណ ៤ រសៀលថ្ងៃទី ១២ ខែ កក្កដា ឆ្នាំ ២០២១ នៅខាងក្រៅរបង នាយកដ្ឋាន និងសហប្រតិបត្តិការ ដែលជាកន្លែងចាក់វ៉ាក់សាំងកូវីដ ១៩ ជូនប្រជាពលរដ្ឋ មានទីតាំងស្ថិតក្នុងភូមិមណ្ឌល ៣ សង្កាត់ស្លក្រាម ក្រុងសៀមរាប។
លោក សំកុល បានបញ្ជាក់ថា ក្រោយហេតុការណ៍ ក្រុមគ្រូពេទ្យពិនិត្យឃើញថា អ្នកដែលស្លាប់នោះ គឺបណ្តាលមកពីស្ទះសរសៃឈាមបេះដូង ចំណែកអ្នកសន្លប់ម្នាក់ទៀតគ្រាន់តែបណ្តាលមកពីអស់កម្លាំង ក្រោយមកក៏ដឹងខ្លួនវិញ។
លោកមេភូមិបានឱ្យដឹងថា ការស្លាប់របស់ប្រជាការពារភូមិម្នាក់នេះមិនជាប់ពាក់ព័ន្ធការឆ្លងជំងឺកូវីដ ១៩ នោះទេ។
លោកមេភូមិបានថ្លែងឱ្យដឹងថា៖ «ព្រោះមុនធ្វើកោសល្យវិច័យ ក្រុមគ្រូពេទ្យគាត់បានធ្វើតេស្តរកកូវីដ ១៩ ដែរ អត់មានផ្ទុកវីរុសកូវីដទេ»។
លោក មេភូមិ ថ្លែងថា ប្រជាការពារម្នាក់ដែលស្លាប់ និងម្នាក់ដែលដួលសន្លប់ ពួកគេទាំង ២ នាក់ត្រូវឈរយាមទីតាំងចាក់វ៉ាក់សាំងការពារជំងឺកូវីដ ១៩ ពីម៉ោង ៧ ព្រឹករហូតដល់បញ្ចប់ការងារប្រមាណជាម៉ោង ៥ ល្ងាច អាចលើសនេះ អាស្រ័យទៅតាមស្ថានភាពជាក់ស្តែង។
លោក ម៉ៃ សំកុល បានឱ្យដឹងថា ប្រជាការពារភូមិដែលស្លាប់ ភេទប្រុស អាយុ ៤៤ ឆ្នាំ ដែលជាប្រជាការពារមកពីភូមិចុងកៅស៊ូ សង្កាត់ស្លក្រាម មានស្រុកកំណើតនៅភូមិអង្គ្រង ឃុំកន្ទ្រាំង ស្រុកប្រាសាទបាគង ខេត្តសៀមរាប។ ប៉ុន្តែបច្ចុប្បន្នរូបគាត់ស្នាក់នៅផ្ទះជួល ក្នុងភូមិតាវៀន សង្កាត់សាលាកំរើក ក្រុងសៀមរាប។
រដ្ឋបាលខេត្តសៀមរាបបានរៀបចំការចាក់វ៉ាក់សាំងបង្ការជំងឺកូវីដ ១៩ ដល់ប្រជាពលរដ្ឋចំនួន ២ ដូសតាមពេលវេលាដែលត្រូវបានកំណត់នៅក្នុងខែកក្កដា នេះ។
រដ្ឋបាលខេត្តសៀមរាបថា ត្រឹមថ្ងៃទី ១២ ខែកក្កដា នេះខេត្តសៀមរាបមានអ្នកវិជ្ជមានជំងឺកូវីដ ១៩ សរុបចំនួន ២ ៥៥៣ នាក់ ព្យាបាលជាសះស្បើយចំនួន ៩២៧ នាក់ ស្លាប់ ២៥ នាក់ និង ១ ៥៩៦ នាក់កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប មណ្ឌលចត្តាឡីស័កគរុកោសល្យ និងវិក្រឹតការខេត្ត វិទ្យាល័យអង្គរ និងវិទ្យាល័យដំដែក៕