ភ្នំពេញៈ ក្រោយចាក់វ៉ាក់សាំងដល់ជនជាប់ឃុំ បានជិត ២ ម៉ឺននាក់ ក្នុងចំណោមជនជាប់ឃុំទូទាំងប្រទេសជាង ៣៦ ០០០ នាក់ អគ្គនាយកដ្ឋានពន្ធនាគារនៃក្រសួងមហាផ្ទៃកំពុងបន្តជំរុញដល់ពន្ធនាគារ តាមបណ្តា-ខេត្ដឱ្យធ្វើលិខិតស្នើទៅរដ្ឋបាលខេត្ដ ដើម្បីសម្របសម្រួលជាមួយគណៈកម្មការចាក់វ៉ាក់សាំងផ្ដល់ការចាក់វ៉ាក់សាំងដល់ជនជាប់ឃុំឱ្យបានគ្រប់ៗគ្នា។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារថ្លែងប្រាប់ ភ្នំពេញ ប៉ុស្ដិ៍ កាលពីម្សិលមិញថា បច្ចុប្បន្នក្នុងចំណោមជនជាប់ឃុំនៅតាមពន្ធនាគារ និងមណ្ឌលអប់រំកែប្រែចំនួន ២៨ ទីតាំងទូទាំងប្រទេសដែលមានជនជាប់ឃុំសរុបជាង ៣៦ ០០០ នាក់ មានជនជាប់ឃុំជិត ២ ម៉ឺននាក់ ហើយបានទទួលការចាក់វ៉ាក់សាំងការពារជំងឺកូវីដ ១៩។
លោកថ្លែងថា៖ «នីតិវិធីឥឡូវ យើងជំរុញឱ្យពន្ធនាគារខេត្ដ ឬមណ្ឌលអប់រំកែប្រែឱ្យគាត់ធ្វើលិខិតស្នើទៅរដ្ឋបាលខេត្ដ ដែលជាទីតាំងដែលគាត់ស្ថិតនៅក្រោមនោះ។ ពន្ធនាគារខេត្ដឱ្យធ្វើលិខិតស្នើទៅរដ្ឋបាលខេត្ដថា មានជនជាប់ឃុំប៉ុន្មានដែលត្រូវចាក់វ៉ាក់សាំង។ លិខិតនេះដាក់ទៅខេត្ដ ដើម្បីឱ្យរដ្ឋបាលខេត្ដសម្របសម្រួលជាមួយគណៈកម្មការចាក់វ៉ាក់សាំង»។
លោកបន្តថា៖ «ខ្ញុំធ្លាប់ជជែកជាមួយឯកឧត្ដមអភិបាលខេត្តសៀមរាបដែររឿងនេះព្រោះសៀមរាបកំពុងប្រឈមដែរ។ យើងក៏មិនដឹងច្បាស់ថា ពេលនេះគណៈកម្មការចាក់វ៉ាក់សាំង សម្របសម្រួលយ៉ាងដូចម្ដេចទេ។ កាលមុនយើងធ្វើតាមយន្តការតាមពេទ្យ ១៦ ឧសភា»។
លោក នុត សវនា ថ្លែងថា ដោយមានការយកចិត្តទុកដាក់ និងផ្តល់ការគាំទ្រ ពីសំណាក់លោកនាយករដ្ឋមន្ដ្រី ហ៊ុន សែន និងការដឹកនាំបញ្ជាផ្ទាល់ពីសំណាក់លោក ស ខេង រដ្ឋមន្ត្រីក្រសួងមហាផ្ទៃ អគ្គនាយកដ្ឋានពន្ធនាគារ បានទទួលវ៉ាក់សាំងជាបន្តបន្ទាប់ ដើម្បីចាក់ឱ្យជនជាប់ឃុំជិត ២ ម៉ឺននាក់ នៅតាមពន្ធនាគារ និងមណ្ឌលអប់រំកែប្រែចំនួន ១១ ទីតាំងក្នុងចំណោមពន្ធនាគារ និងមណ្ឌលអប់រំកែប្រែសរុបចំនួន ២៨ នៅទូទាំងប្រទេស។
លោកលើកឡើងថា តាមផែនការរបស់រាជរដ្ឋាភិបាល បានផ្ដោតការចាក់វ៉ាក់សាំងទៅដល់ប្រជាពលរដ្ឋនៅក្នុងសហគមន៍ជាមុន ពិសេសនៅរាជធានីភ្នំពេញ។
លោកថ្លែងថា៖ «យើងមិនអាចស្មានបានថា ពេលណាអាចចាក់វ៉ាក់សាំងដល់ជនជាប់ឃុំបានអស់ទេ។ ប៉ុន្ដែយើងកំពុងតែព្យាយាមធ្វើម៉េចឱ្យគណៈកម្មការចាក់វ៉ាក់សាំងបញ្ចូលជនជាប់ឃុំទៅក្នុងផែនការចាក់វ៉ាក់សាំងនៅតាមខេត្ដដែរ»។
លោក អំ សំអាត នាយករងអង្គការលីកាដូលើកឡើងថា បច្ចុប្បន្នស្ថានភាពតាមពន្ធនាគារគឺជាបញ្ហាមួយ គួរឱ្យបារម្ភខ្លាំងទាក់ទងនឹងការរីករាលដាល ជំងឺកូវីដ ១៩ ពីព្រោះពន្ធនាគារមានស្ថានភាពចង្អៀតខ្លាំង ដែលមានហានិភ័យខ្ពស់នៃការឆ្លងរីករាលដាលជំងឺកូវីដ ១៩។
លោកថ្លែងថា៖ «អង្គការលីកាដូធ្លាប់បានផ្តល់អនុសាសន៍លើការពិចារណា ដោះលែងអ្នកជាប់ឃុំបណ្តោះអាសន្នចំពោះអ្នកដែលបទល្មើសស្រាល និងពន្លឿននីតិវិធីស៊ើបអង្កេតរបស់ចៅក្រមស៊ើបសួរ ពន្លឿនការជំនុំជម្រះពិនិត្យលើការដោះលែងជនជាប់ឃុំដែលជិតផុតទោស»។
លោកបញ្ជាក់ថា ជាពិសេសពិនិត្យទៅលើអនីតិជនស្ត្រីជាប់ឃុំមានកូន ស្ត្រីជាប់ឃុំមានផ្ទៃពោះជនជាប់ឃុំមានជំងឺរ៉ាំរ៉ៃ ជនជាប់ឃុំជាជនពិការ ដែលអាចអនុញ្ញាតឱ្យពួកគេនៅក្រៅឃុំបាន។
ក្នុងពេលថ្មីៗនេះ ក្រសួងមហាផ្ទៃបានចេញលិខិតជម្រាបជូនគណៈអភិបាលរាជធានី-ខេត្ត ស្ដីពីការចាត់វិធានការបង្ការទប់ស្កាត់ការឆ្លងរាលដាលនៃជំងឺកូវីដ ១៩ នៅតាមមណ្ឌលអប់រំកែប្រែ និងពន្ធនាគាររាជធានី-ខេត្ត។
ក្រោមការជ្រោមជ្រែងពីអាជ្ញាធរសុខាភិបាល អគ្គនាយកដ្ឋានពន្ធនាគារបានសម្របសម្រួលការពិនិត្យសំណាកជនជាប់ឃុំទាំងអស់ចំនួន ៣ លើក បន្ទាប់ពីបានរកឃើញថា មានការឆ្លងរាលដាលជំងឺកូវីដ ១៩ នៅតាមមណ្ឌលអប់រំកែប្រែ និងពន្ធនាគារមួយចំនួន តាមរយៈមធ្យោបាយ PCR (Polymerasa Chain Reaction) និងឧបករណ៍តេស្តរហ័ស (Rapid Test)។ នេះបើតាមសេចក្ដីប្រកាសព័ត៌មានរបស់អគ្គនាយកដ្ឋានពន្ធនាគារ៕