ក្រចេះ: អាជ្ញាធរខេត្តក្រចេះ កំពុងរកដំណោះស្រាយដោយសន្តិវិធីក្នុងជម្លោះដីធ្លីរវាងប្រជាពលរដ្ឋ និងក្រុមហ៊ុនឯកជនមួយ ដែលទទួលបានដីសម្បទានសេដ្ឋកិច្ចពីរាជរដ្ឋាភិបាល ដើម្បីធ្វើការវិនិយោគ និងដាំដុះ ខណៈភាគីទាំង ២ អះអាងថា ជាម្ចាស់កម្មសិទ្ធិរៀងៗខ្លួនលើដីមានទំនាស់នោះ។
អភិបាលរងខេត្តក្រចេះលោក គង់ គឹមនី កាលពីថ្ងៃទី ១៣ ខែកក្កដា បានដឹកនាំក្រុមការងារចម្រុះចុះពិនិត្យទីតាំងដីទំនាស់របស់ប្រជាពលរដ្ឋ និងក្រុមហ៊ុន មេហ្គាស្តារ អ៊ីនវេសមេន ហ័ររេស្ទ្រី ឌីវេឡុបមេន ដែលមានទីតាំងស្ថិតនៅក្នុងឃុំចង្ក្រង់ ស្រុកចិត្របុរី ខេត្តក្រចេះ ដើម្បីស្វែងរកដំណោះស្រាយរួមមួយ។
យោងរបាយការណ៍ស្តីពីការចុះពិនិត្យរបស់មន្ទីរព័ត៌មានខេត្តក្រចេះឱ្យដឹងថា ខណៈពេលដំណើរការចុះពិនិត្យនោះដែរ ក៏បានជួបជាមួយប្រជាពលរដ្ឋប្រមាណ ១៦០ នាក់ ដែលបានចូលមកស្នើសុំយោបល់ និងលើកជាបញ្ហាសំណូមពរមួយចំនួនដល់អាជ្ញាធរ ដើម្បីមានវិធានការដោះស្រាយដីធ្លីជូនពួកគាត់។
របាយការណ៍បន្តថា ជាលទ្ធផលប្រជាពលរដ្ឋបានទទួលយកតាមការកំណត់របស់អាជ្ញាធរ ដោយតម្រូវឱ្យបញ្ឈប់សកម្មភាពចូលកាប់ទន្ទ្រានដីរបស់ក្រុមហ៊ុនត្រឹមនេះ ហើយចូលរួមសហការជាមួយក្រុមហ៊ុន ដែលមានអាជ្ញាធរជាអ្នកសម្របសម្រួលដោះស្រាយ។
របាយការណ៍បញ្ជាក់ថា៖ «ចំពោះសំណូមពរដែលពលរដ្ឋបានលើកឡើង ក្រុមការងារបានទទួលយកដើម្បីពិនិត្យពិភាក្សាបន្តរកដំណោះស្រាយ និងអនុវត្តជាមួយប្រជាពលរដ្ឋ និងក្រុមហ៊ុនវិនិយោគ ឱ្យស្របទៅតាមនីតិវិធី និងការយោគយល់ ដើម្បីបន្តដំណើរការដាំដុះអភិវឌ្ឍន៍របស់ក្រុមហ៊ុន និងជីវភាពប្រចាំថ្ងៃរបស់ប្រជាពលរដ្ឋ»។
អភិបាលស្រុកចិត្របុរី លោក យិន វណ្ណៈ ប្រាប់ ភ្នំពេញ ប៉ុស្តិ៍ថា បន្ទាប់ពីបានចុះពិនិត្យជាក់ស្តែងក្រុមការងារថ្នាក់ខេត្តកំពុងសិក្សា និងស្រាវជ្រាវរកពលរដ្ឋ ដែលរងគ្រោះពិតប្រាកដ។
លោកបានថ្លែងថា៖ «ចន្លោះពេលនេះស្ថិតក្នុងដំណាក់កាលសិក្សានៅឡើយទេ ឥឡូវនេះយើងកំពុងសិក្សាថា តើពិតជាប៉ះពាល់ដីស្រែពលរដ្ឋដែរឬទេ ហើយមានប៉ុន្មានគ្រួសារ ដែលទៅទន្ទ្រានដីខុសច្បាប់ ហើយបងប្អូនប៉ុន្មាននាក់ដែលចាញ់បោកមេខ្យល់ ដូច្នេះក្រុមការងារនឹងពិនិត្យមើល រកមូលហេតុឱ្យឃើញច្បាស់លាស់សិនទើបយើងរាយការណ៍ជូនថ្នាក់ដឹកនាំដើម្បីដោះស្រាយ»។
លោកបានឱ្យដឹងថា តាមការសិក្សាបឋមមានពលរដ្ឋតិចតួច ដែលរងផលប៉ះពាល់ពិតប្រាកដជាមួយក្រុមហ៊ុន ដែលទទួលបានដីសម្បទានសេដ្ឋកិច្ច ខណៈពលរដ្ឋមួយផ្នែកធំ មកពីស្រុកផ្សេងបានកាប់ទន្ទ្រានដីខុសច្បាប់។
លោកបញ្ជាក់ថា៖ «ក្នុងនោះប្រជាពលរដ្ឋមួយចំនួនអះអាងថា មានដីស្រែនៅទីនោះ ប៉ុន្តែបងប្អូនដែលជាពលរដ្ឋក្នុងភូមិនោះមានចំនួនតិចតួចទេ ប៉ុន្តែមានបងប្អូនក្នុងចំនួនច្រើន មកពីខាងស្រុកសម្បូរ ហើយគាត់លើកឡើងថា ដោយសារអត់មានដីធ្លីសម្រាប់ធ្វើស្រែតកូន តចៅ។ នេះជាហេតុផលពួកគាត់មកកាប់ទន្ទ្រាន»។
លោកបានបញ្ជក់ថា៖ «តាមការចុះពិនិត្យជាក់ស្តែងក៏មានមេខ្យល់លក់ដីនោះឱ្យប្រជាពលរដ្ឋគឺមេខ្យល់ចុះទៅវាស់វែងដីលក់ឱ្យពលរដ្ឋក្នុងតម្លៃថោក ហើយពលរដ្ឋគាត់គិតថា ធូរថ្លៃទៅកាប់ឆ្ការតាមគេចង្អុលបង្ហាញ ទាំងនេះជាបញ្ហាដែលកំពុងស្វែងរកដំណោះស្រាយ»។
លោកបានលើកឡើងទៀតថា៖ «បងប្អូនប្រជាពលរដ្ឋគាត់អត់យល់ពីផ្លូវច្បាប់ ឱ្យតែឃើញដីទំនេរ គាត់ចេះតែចូលកាប់ឆ្ការរស់នៅដល់ពេលក្រុមហ៊ុនដែលទទួលបានការវិនិយោគគាត់កាយធ្វើរបង ធ្វើផ្លូវ ក៏មានប្រជាពលរដ្ឋមករារាំងដល់ពេលមានចលនារាំងខ្ទប់ មិនឱ្យក្រុមហ៊ុនធ្វើការអភិវឌ្ឍ ដោយសារក្រុមហ៊ុនមិនមានលទ្ធភាពការពារបាន គាត់ស្នើសុំអាជ្ញាធរដែនដីជួយអន្តរាគមន៍»។
មន្ត្រីសម្របសម្រួលសិទ្ធិមនុស្សនៃសមាគមអាដហុកប្រចាំខេត្តក្រចេះលោក ធីម ហ៊ន បានថ្លែងថា លោកពុំទាន់បានប្រមូលទិន្នន័យនេះបានគ្រប់ជ្រុងជ្រោយនៅឡើយទេ ដោយលោកនឹងចុះអង្កេតដោយផ្ទាល់បន្ថែមទៀត នៅឆាប់ៗខាងមុខ។
យ៉ាងណាក្តីលោកថា យន្តការដោះស្រាយដោយសន្តិវិធីរវាងប្រជាពលរដ្ឋ និងអាជ្ញាធរមូលដ្ឋាន ជារឿងល្អប្រសើរ។ ប៉ុន្តែលោកជំរុញដល់អាជ្ញាធរពាក់ព័ន្ធសូមពន្លឿនដំណើរការដោះស្រាយ ដើម្បីឱ្យពលរដ្ឋដែលជាម្ចាស់កម្មសិទ្ធិពិតប្រាកដអាចប្រកបរបរដាំដុះបាន។
លោកបញ្ជាក់ថា៖ «នៅពេលពលរដ្ឋទទួលការដោះស្រាយដោយសន្តិវិធី និងការសម្របសម្រួលពីអាជ្ញាធរ គឺជាយន្តការមួយក្នុងការដោះស្រាយដោយសន្តិវិធី ដោយមិនប្រើអំពើហិង្សា។ ប៉ុន្តែអាជ្ញាធរគួរតែមានការអនុវត្តច្បាប់ជួយដោះស្រាយបញ្ហាជូនប្រជាពលរដ្ឋឱ្យបានលឿន»។
តំណាងសហគមន៍នៅឃុំចង្ក្រង់លោក ព្រំ ឌឿន បានថ្លែងថា ជម្លោះដីធ្លីនេះបានកើតឡើងតាំងពីឆ្នាំ ២០១២ មកម្ល៉េះ។ ប៉ុន្តែដោយសារមិនទាន់មានដំណោះស្រាយសមរម្យ ទើបនាំឱ្យមានការតវ៉ាជាថ្មី។
លោកបញ្ជាក់ថា៖ «ក្រុមហ៊ុនគេដាក់គ្រឿងចក្រឈូសឆាយ ក្រោយដីចម្ការ ក្រោយផ្ទះប្រជាពលរដ្ឋតាំងពីឆ្នាំ ២០១២ មក។ ក្រោយមកមានសភាពស្ងប់ស្ងាត់ បន្ទាប់ពីអាជ្ញាធរថា ដោះស្រាយរហូតផ្ទុះការតវ៉ាជាថ្មីនៅពេលនេះ»៕
វីដេអូ៖