.jpg)
ជនជាតិភាគតិចព្នងក្នុងពេលទៅប្រទេសបារាំងកាលពីកន្លងទៅ។ រូបថត ហ្វេសប៊ុក គ្រើង តុលា
មណ្ឌលគិរីៈ ពលរដ្ឋជនជាតិដើមភាគតិចព្នងនៅឃុំប៊ូស្រា ស្រុកពេជ្រាដា ខេត្តមណ្ឌលគិរីចំនួន ៩៧ គ្រួសារ បានចេញសេចក្តីថ្លែងការណ៍សម្តែងការខកចិត្តចំពោះចៅក្រមនៃតុលាការនៅណង់ទែរនៃទីក្រុងប៉ារីស ប្រទេសបារាំងដែលបានសម្រេចច្រានចោលបណ្តឹងរបស់ខ្លួនកាលពីថ្ងៃទី ២ ខែកក្កដា ឆ្នាំ ២០២១ ពាក់ព័ន្ធនឹងជម្លោះដីធ្លីរ៉ាំរ៉ៃជាមធ្យម ៣ ហិកតា ក្នុងមួយគ្រួសារ ជាមួយក្រុមហ៊ុនបារាំងឈ្មោះ បូឡូរ៉េ។
លោក គ្រើង តុលា តំណាងពលរដ្ឋជនជាតិដើមភាគតិចព្នងប្រាប់ ភ្នំពេញ ប៉ុស្តិ៍ កាលពីម្សិលមិញថា ពាក់ព័ន្ធនឹងបញ្ហានេះ ក្រុមហ៊ុនបារាំងដែលមានឈ្មោះថា បូឡូរ៉េ តាមរយៈក្រុមហ៊ុនសុកហ្វឺនបានឈូសឆាយ និងដាំកៅស៊ូនៅលើដីរបស់ពលរដ្ឋជនជាតិដើមភាគតិចព្នងចាប់តាំងពីឆ្នាំ ២០០៨ មកម្ល៉េះ ហើយពលរដ្ឋបានតវ៉ា តាមរយៈភូមិឃុំ ស្រុក ខេត្ត និងតុលាការថ្នាក់ជាតិ មិនទទួលបានជោគជ័យនោះទេ។
លោកបន្តថា ដូច្នេះហើយទើបបានពលរដ្ឋជនជាតិដើមភាគតិចព្នងទាំងនោះបានសម្រេចចិត្តតវ៉ា និងដាក់ពាក្យបណ្តឹងទៅកាន់តុលាការនៅប្រទេសបារាំងដោយរំពឹងថា នឹងទទួលបានយុត្តិធម៌ ដោយសារប្រទេសបារាំងមានការគោរពច្បាប់ច្រើនជាងនៅកម្ពុជា ប៉ុន្តែនៅតែមិនទាន់ទទួលបានយុត្តិធម៌។
លោក គ្រើង តុលា ថ្លែងថា៖ «យើងតវ៉ានៅពេលនោះ ប្រជាពលរដ្ឋបានលក់មាន់ លក់ជ្រូក និងលក់គោ លក់ក្របីអស់ហើយ ដើម្បីបានទទួលយុត្តិធម៌។ តវ៉ាឆ្អែតឆ្អន់ហើយ ប៉ុន្តែនៅតែមិនទាន់បានយុត្តិធម៌ ទើបលើកចុងក្រោយនេះ ដាក់ទៅបារាំង ពាក់ព័ន្ធនឹង ក្រុមហ៊ុនរំលោភសិទ្ធិរបស់ពលរដ្ឋ ដែលជាជនជាតិដើមភាគតិច ប៉ុន្តែឥឡូវតុលាការបារាំងក៏រំលោភសិទ្ធិពលរដ្ឋដែរ»។
បើតាម លោក គ្រើង តុលា សម្រាប់បណ្តឹងទៅតុលាការបារាំងនេះ ដាក់ទៅតែ ១ ករណីប៉ុណ្ណោះ ប៉ុន្តែត្រូវបានចៅក្រមបែងចែកជា ២ ករណី ដោយករណីទី១ តុលាការបារាំងបានបដិសេធចំពោះពលរដ្ឋដែលរស់នៅក្នុងឃុំប៊ូស្រានេះថាជាជនចំណាកស្រុកមិនមែនជាជនដើមភាគតិច បើទោះជាពលរដ្ឋទាំងនោះមានលិខិតបញ្ជាក់ពីអាជ្ញាធរក៏ដោយ។
រីឯករណីទី២ អះអាងថា ពលរដ្ឋបានដាក់ភ័ស្តុតាងមិនទាន់ដល់ពេលវេលាទៅតុលាការ និងជាពិសេសនោះតុលាការបានសម្រេចឱ្យពលរដ្ឋបង់ប្រាក់ទៅក្រុមហ៊ុនចំនួន ២ ម៉ឺនអឺរ៉ូ បន្ថែមទៀត។
ទោះជាយ៉ាងណា លោក គ្រើង តុលា បញ្ជាក់ថា ពលរដ្ឋបានសម្រេចដាក់ពាក្យបណ្តឹងទៅសាលាឧទ្ធរណ៍របស់បារាំងបន្ថែមទៀតដោយរំពឹងថានឹងទទួលបានយុត្តិធម៌ពីស្ថាប័ននេះដល់ពលរដ្ឋជនជាតិដើមភាគតិចព្នង ដែលខំប្រឹងតវ៉ាអស់រយៈពេលជាច្រើនឆ្នាំមកនេះ។
តាមសេចក្តីថ្លែងការណ៍ដែលបានផ្តិតមេដៃតំណាងពលរដ្ឋជនជាតិដើមភាគតិចព្នងនៅថ្ងៃទី ១៤ ខែ កក្កដា ឆ្នាំ ២០២១ បានបញ្ជាក់ថា ពលរដ្ឋទាំង ៩៧ គ្រួសារ មិនសុខចិត្តនឹងសេចក្តីសម្រេចនេះឡើយ ហើយនឹងប្រគល់សិទ្ធិឱ្យមេធាវីរបស់ពួកគេនៅបារាំងបន្តទៀតតាមបែបបទ និងនីតិវិធីដែលច្បាប់បារាំងអនុញ្ញាតឱ្យប្ដឹងឧទ្ធរណ៍។
សេចក្តីថ្លែងការណ៍បានសរសេរថា «ជាថ្មីម្ដងទៀតយើងខ្ញុំមានការខកចិត្ត និងខឹងចំពោះសេចក្តីសម្រេចពិន័យឱ្យយើងបង់ការខូចខាតនីតិវិធីដល់ទៅ ២ ម៉ឺនអឺរ៉ូ ក្នុងពេលដែលយើងបានបាត់បង់ដី បាត់បង់ការអាស្រ័យផលលើព្រៃ និងសេដ្ឋកិច្ចប្រពៃណី ព្រមទាំងរងនូវបណ្ដឹងនៅតុលាការក្នុងប្រទេសកម្ពុជាទៀតផង»។
សេចក្តីថ្លែងការណ៍បានថ្លែងបន្តថា «យើងខ្ញុំបានតវ៉ាកន្លងមកទៅអាជ្ញាធរគ្រប់លំដាប់ថ្នាក់អស់ហើយ ហើយមិនមានដំណោះស្រាយ ទើបយើងខ្ញុំសម្រេចប្ដឹងទៅតុលាការបារាំងដើម្បីឱ្យក្រុមហ៊ុនបូឡូរ៉េ ទទួលខុសត្រូវសងការខូចខាតលើការសម្រេចរបស់ខ្លួន តាមរយៈក្រុមហ៊ុនសុកហ្វឺននៅតុលាការប្រទេសបារាំង»។
លោក នាង វណ្ណៈ អ្នកនាំពាក្យរដ្ឋបាលខេត្តមណ្ឌលគិរីថ្លែងកាលពីម្សិលមិញថា ពាក់ព័ន្ធនឹងករណីខាងលើនេះលោកមិនសូវជាទទួលបានព័ត៌មានច្បាស់នោះទេ ប៉ុន្តែគ្រាន់តែដឹងថា ពលរដ្ឋដែលអះអាងថាជាជនជាតិដើមភាគតិចព្នងនេះបានទៅឈូសឆាយដីនៅតាមដីចំណីអូរ ឬប្រឡាយផ្សេងៗ ដើម្បីបានធ្វើកសិកម្ម ឬដាំដុះដំណាំផ្សេង។ តាមពិតដីទាំងអស់នេះ ជាដីរបស់រដ្ឋទេ។
ចំពោះករណីពាក់ព័ន្ធនឹងការសម្រេចរបស់តុលាការប្រទេសបារាំងនេះ លោក នាង វណ្ណៈ បានបញ្ជាក់ថា គឺជាការសម្រេចមួយដ៏ត្រឹមត្រូវ ហើយតុលាការកម្ពុជាក៏សម្រេចដូចគ្នានេះដែរ ព្រោះគេមានហេតុផលច្បាស់លាស់របស់គេ មុននឹងសម្រេចថា យ៉ាងម៉េចនោះ៕
