.jpg)
ការទទួលស្បៀងរបស់គ្រួសារសិស្សនៅបាត់ដំបងពីម្សិលមិញ។ រូបថត ហ្វេសប៊ុក
ភ្នំពេញៈ ក្រសួងអប់រំ យុវជន និងកីឡា តាមរយៈកិច្ចសម្របសម្រួលពីអគ្គលេខាធិការដ្ឋានក្រុមប្រឹក្សាជាតិគាំពារសង្គម កំពុងអនុវត្ដកម្មវិធីចែកស្បៀងជាអង្ករដល់សិស្សានុសិស្សចំនួន ១៣ ៧១១ នាក់ និងអ្នកចម្អិនអាហារចំនួន ៥៤៣ នាក់ មកពីសាលាបឋមសិក្សាចំនួន ២០៥ ក្នុងខេត្តគោលដៅចំនួន ៦ ដើម្បីសម្រាលបញ្ហាដែលកើតពីវិបត្តិជំងឺកូវីដ ១៩។
តាមសេចក្ដីប្រកាសព័ត៌មានរបស់ក្រសួងអប់រំកាលពីថ្ងៃទី ៩ ខែកក្កដា បានឱ្យដឹងថា ការចែកស្បៀងជាអង្ករដល់សិស្សមកពីគ្រួសារក្រីក្រ និងអ្នកចម្អិននេះ ធ្វើឡើងក្រោម «កម្មវិធីផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍ ដើម្បីឆ្លើយតបទៅនឹងព្រឹត្តិការណ៍សហគមន៍ ២០ កុម្ភៈ ឆ្នាំ ២០២១»។
សេចក្ដីប្រកាសព័ត៌មានបានឱ្យដឹងថា ការផ្តល់ស្បៀងជាអង្ករដល់ក្រុមសិស្សដែលរស់នៅក្នុងគ្រួសារទាំងនោះ ព្រមទាំងអ្នកចម្អិនអាហារនៅតាមខេត្តគោលដៅចំនួន ៦ នេះរួមមាន ខេត្តសៀមរាប បាត់ដំបង បន្ទាយមានជ័យ ព្រះវិហារ ស្ទឹងត្រែង និងកំពង់ចាម ដែលគ្របដណ្តប់លើស្រុកចំនួន ១៦ ឃុំចំនួន ៨៣ ភូមិចំនួន ២០៤ និងសាលាបឋមសិក្សាចំនួន ២០៥ ។
សិស្សានុសិស្សចំនួន ១៣ ៧១១ នាក់ និងអ្នកចម្អិនអាហារចំនួន ៥៤៣ នាក់ មកពីសាលាបឋមសិក្សា ចំនួន ២០៥ ក្រោមកម្មវិធីផ្ដល់អាហារតាមសាលារៀនដោយប្រើប្រាស់កសិផលក្នុងសហគមន៍ចាប់ពីថ្ងៃទី ១២ ដល់ថ្ងៃទី ១៧ ខែកក្កដាដោយក្នុងម្នាក់ៗនឹងទទួលបានអង្ករចំនួន ២៥ គីឡូក្រាម ។ ដោយឡែកគ្រួសារមានកូនលើសពី ១ នាក់ និងកំពុងរៀនក្នុងសាលាបឋមសិក្សាគោលដៅតែមួយនឹងទទួលបានរបបជាអង្ករ ៥០ គីឡូក្រាម។ នេះបើតាមសេចក្ដីប្រកាសព័ត៌មានដដែល។
សេចក្ដីប្រកាសដដែលបានបញ្ជាក់ថា កម្មវិធីនេះផ្តល់អាទិភាពដល់ក្រុមសិស្សមកពីគ្រួសារក្រីក្រដែលទទួលបានអាហារូបករណ៍ពីរាជរដ្ឋាភិបាល និងក្រុមសិស្សមកពីគ្រួសារមានបណ្ណសមធម៌ (កម្រិត ១ កម្រិត ២) និងបណ្ណអាទិភាពដែលមានសុពលភាព ក៏មានសិទ្ធិទទួលបានការផ្ដល់ជូនជាស្បៀងជាអង្ករនេះផងដែរ។
លោក រស់ សុវាចា មន្ដ្រីនាំពាក្យក្រសួងអប់រំបានឱ្យដឹងកាលពីម្សិលមិញថា កម្មវិធីផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍នេះ ជាការចូលរួមលើកកម្ពស់អាហារូបត្ថម្ភសិស្សនៃគ្រួសារក្រីក្រ និងអ្នកចម្អិន ដែលស្របនឹងកិច្ចសហការរបស់ក្រសួងអប់រំជាមួយគ្រប់ភាគីពាក់ព័ន្ធ ដើម្បីជំរុញគុណភាពអាហារូបត្ថម្ភ និងសុខភាពរបស់អ្នកសិក្សា និងភាគីពាក់ព័ន្ធតាមគ្រប់រូបភាព។
លោកថ្លែងថា៖ «ជារួមក្រសួងអប់រំ បាននិងបន្តលើកកម្ពស់ជីវភាពមាតាបិតា និងកុមារតូចជាពិសេសដើម្បីដោះស្រាយកង្វះអាហារូបត្ថម្ភកុមារមួយចំនួនតូច ដោយធ្វើការអនុវត្តប្រកាសអន្តរក្រសួងស្តីពីការអនុវត្តកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកូនអាយុក្រោម ២ ឆ្នាំនៃគ្រួសារមានបណ្ណសមធម៌ ឬបណ្ណអាទិភាព»។
កម្មវិធីស្បៀងអាហារពិភពលោក (WFP) សហការជាមួយក្រសួងអប់រំកាលពីថ្ងៃទី ២៩ ខែមិថុនា ក៏បានចែកស្បៀងដល់ក្រុមគ្រួសារងាយរងគ្រោះចំនួន ៣៩ ៦៥០ គ្រួសារ ក្នុងនោះមានពលរដ្ឋសរុបដែលទទួលបានជំនួយនេះប្រមាណ ២០០ ០០០ នាក់ ក្នុងខេត្តគោលដៅចំនួន ៥ គឺសៀមរាប ឧត្តរមានជ័យ កំពង់ធំ កំពង់ឆ្នាំង និងពោធិ៍សាត់ផងដែរ។ នេះបើតាមសេចក្ដីប្រកាសព័ត៌មានរបស់ WFP។
លោកស្រី ក្លែរ កូណាន់ តំណាង WFP ប្រចាំនៅកម្ពុជា ថ្លែងតាមរយៈសេចក្ដីប្រកាសព័ត៌មាននេះថា ក្នុងអំឡុងពេលមានតម្រូវការខ្ពស់ជំនួយស្បៀងរបស់កម្មវិធីស្បៀងអាហារពិភពលោក និងក្រសួងអប់រំគឺជាការរួមចំណែកបំពេញបន្ថែមដល់ជំនួយគាំពារសង្គមរបស់រាជរដ្ឋាភិបាលកម្ពុជាដែលបានពង្រីកវិសាលភាពរបស់ខ្លួនក្នុងប៉ុន្មានខែថ្មីៗនេះ។
ជំនួយនេះនឹងរួមចំណែកក្នុងការបំពេញតម្រូវការរបស់ក្រុមគ្រួសារងាយរងគ្រោះ ជាពិសេសនិងធានាថា កុមារនឹងមានអាហារទទួលទានក្នុងពេលមានវិបត្តិ។
បើតាម WFP ប្រចាំកម្ពុជា ជាធម្មតាកម្មវិធីផ្ដល់ស្បៀងអាហារតាមសាលារៀនរបស់កម្មវិធីស្បៀងអាហារពិភពលោក និងក្រសួងអប់រំបានផ្តល់នូវអាហារសុខភាព និងមានជីវជាតិដល់កុមារ ២២៣ ០០០ នាក់ នៅតាមសាលាគោលដៅចំនួន ៩០៨ ក្នុងខេត្តចំនួន ៥ គឺខេត្តសៀមរាប ឧត្តរមានជ័យ កំពង់ធំ កំពង់ឆ្នាំង និងខេត្តពោធិ៍សាត់៕
