.jpg)
ស្ត្រីនាំកូនទៅពិនិត្យព្យាបាលជំងឺ នៅមន្ទីរពេទ្យគន្ធបុប្ផាក្នុងរាជធានីភ្នំពេញកាលពីថ្ងៃទី ២ ខែមិថុនាឆ្នាំ ២០២១។ ហុង មិនា
ភ្នំពេញៈ មូលនិធិគន្ធបុប្ផាកម្ពុជា បានទទួលថវិកាបរិច្ចាគពីសប្បុរសជនជាង ៤ លាន ៧ សែនដុល្លារ សម្រាប់ឆមាសទី១ ឆ្នាំ ២០២១ នេះ ខណៈមូលនិធិ បន្តលើកទឹកចិត្តដល់សប្បុរជនទាំងក្នុង និងក្រៅប្រទេស បន្តចូលរួមបរិច្ចាគ ដើម្បីទ្រទ្រង់ផ្នែកហិរញ្ញវត្ថុក្នុងការផ្តល់សេវាពិនិត្យ និងព្យាបាលជំងឺកុមារដោយឥតគិតថ្លៃ។
សេចក្តីប្រកាសព័ត៌មានរបស់មូលនិធិគន្ធបុប្ផាកម្ពុជាចុះថ្ងៃទី ១៤ ខែកក្កដា បានឱ្យដឹងថា ថវិកាដែលទទួលបានពីសប្បុរសជនមានចំនួន ៤ ៧១៧ ០៤០ ដុល្លារក្នុងនោះថវិកាបរិច្ចាគចំនួន ៨៦៩ ៧៩៩ ដុល្លារបានមកពីសប្បុរសជន ដែលបានបរិច្ចាគផ្ទាល់នៅមន្ទីរពេទ្យគន្ធបុប្ផាភ្នំពេញ និងនៅមន្ទីរពេទ្យជ័យវរ្ម័នទី៧ (ឬមន្ទីរពេទ្យគន្ធបុប្ផា ខេត្តសៀមរាប), ៤០ ប៊ីលានរៀលពីវិភាគទានប្រចាំឆ្នាំ ២០២១ របស់រាជរដ្ឋាភិបាល, ១ លានដុល្លារពីវិភាគទានប្រចាំឆ្នាំលើកទី៤ ពីកាកបាទក្រហមកម្ពុជា, ១ ២០០ ០០០ ០០០ រៀល (មួយពាន់ពីររយលានរៀល) ពីការបរិច្ចាគប្រចាំឆ្នាំ ២០២១ របស់ធនាគារអេស៊ីលីដា។
ចំណែកថវិកាចំនួន ៨ ៩៦៤ ដុល្លារអាមេរិកបានមកពីការកាត់កម្រៃសំបុត្រចូលទស្សនាតំបន់រមណីយដ្ឋានអង្គរពីគ្រឹះស្ថានអង្គរ សម្រាប់ត្រីមាសទី ១ ឆ្នាំ ២០២១ នេះ និងពីសប្បុរសជនសរុបចំនួន ៦២ ២៨៥ រូប ដែលរួមមានសមាជិកកិត្តិយស ៣៦ រូប, សមាជិកគាំទ្រ ៤ ២៦៤ រូប និងសប្បុរសជនផ្សេងៗទៀតចំនួន ៧១៦ រូប ព្រមទាំងថវិកាដែលបានមកពីហិបមូលនិធិគន្ធបុប្ផាកម្ពុជា នៅតាមគោលដៅនានាផងដែរ។
ស្របពេលជាមួយគ្នានេះដែរ មូលនិធិគន្ធបុប្ផាកម្ពុជាក៏បានផ្ទេរថវិកាចំនួន ៤ ០១៨ ២៦០ ដុល្លារ និង ២០០ ០០០ ០០០ (ពីររយលាន) រៀលជូនមន្ទីរពេទ្យគន្ធបុប្ផា។
តាមរយៈសេចក្តីប្រកាសព័ត៌មាននេះ មូលនិធិគន្ធបុប្ផាកម្ពុជាបានថ្លែងអំណរគុណយ៉ាងជ្រាលជ្រៅជូនសប្បុរសជនទាំងអស់ ចំពោះការបន្តគាំទ្រ និងចូលរួមចលនាកៀរគរអំណាយ ឧបត្ថម្ភធន និងវិភាគទាន ដើម្បីធានាចីរភាពនៃប្រភពចំណូល សម្រាប់ទ្រទ្រង់ផ្នែកហិរញ្ញវត្ថុ ចំពោះមន្ទីរពេទ្យគន្ធបុប្ផាទាំង ៥ ទីតាំងឱ្យអាចដំណើរការជាប្រក្រតី ប្រកបដោយនិរន្តរភាព ក្នុងការបន្តការផ្តល់សេវាពិនិត្យ និងព្យាបាលជំងឺកុមារ ដោយឥតគិតថ្លៃ និងប្រកបដោយគុណភាព ដែលបម្រើដល់គោលនយោបាយលើកកម្ពស់សុខុមាលភាពសង្គមរបស់រាជរដ្ឋាភិបាល ជាពិសេសសុខភាពរបស់កុមារ និងទារកនៅកម្ពុជា។
មូលនិធិគន្ធបុប្ផាកម្ពុជាអំពាវនាវ និងលើកទឹកចិត្តដល់សប្បុរសជនទាំងក្នុង និងក្រៅប្រទេស ឱ្យបន្តចូលរួមបរិច្ចាគជាសមាជិកដែលរួមមាន ១ សមាជិកកិត្តិយស បរិច្ចាគចាប់ពី ៥ ពាន់ដុល្លារអាមេរិក ក្នុង ១ ឆ្នាំឬ សមាជិកគាំទ្រ បរិច្ចាគចាប់ពី ៥ ០០០ រៀល ក្នុង ១ ខែ ស្មើនឹង ៦ ម៉ឺនរៀល ក្នុង ១ ឆ្នាំ ដើម្បីបង្ហាញពីសាមគ្គីភាពក្នុងស្មារតី «ខ្មែរជួយខ្មែរ» ។
សេចក្តីប្រកាសបន្តថា សប្បុរជនអាចបរិច្ចាគ តាមរយៈមធ្យោបាយដោយឥតគិតថ្លៃសេវា ជាមួយបណ្តាធនាគារដៃគូដូចជា ធនាគារ Canadia, ធនាគារ ACLEDA, ធនាគារ ABA, ធនាគារ Chip Mong, ធនាគារ Wing, ធនាគារ Sathapana, ធនាគារ J Trust និងភ្នាក់ងារ True Money ឬតាមរយៈការបរិច្ចាគដោយផ្ទាល់នៅលេខាធិការដ្ឋានមូលនិធិគន្ធបុប្ផាកម្ពុជា ដែលមានទីតាំងនៅទីស្តីការក្រសួងសេដ្ឋកិច្ច និងហិរញ្ញវត្ថុ ឬតាមរយៈលេខទូរស័ព្ទ ០៦១ ៧០ ១១១១៕
វីដេអូ៖
