.jpg)
លោក ស ខេង ក្នុងពិធីដាក់ឱ្យប្រើប្រាស់ផែនការទប់ស្កាត់ការកេងប្រវ័ញ្ចផ្លូវភេទកុមារតាមអនឡាញពីម្សិលមិញ។ រូប ក្រសួងមហាផ្ទៃ
ភ្នំពេញៈ រដ្ឋមន្ត្រីក្រសួងមហាផ្ទៃ លោក ស ខេង ជំរុញឱ្យមន្ត្រីក្រោមឱវាទដាក់បញ្ចូលវិធានការបង្ក្រាប និងការពារកុមារពីការរំលោភបំពានផ្លូវភេទតាមប្រព័ន្ធអនឡាញទៅក្នុងសកម្មភាពបង្ក្រាបបទល្មើសប្រចាំថ្ងៃរបស់ខ្លួន ស្របពេលរូបភាពនៃការរំលោភបំពានផ្លូវភេទលើកុមារតាមប្រព័ន្ធអនឡាញនេះ មានការកើនឡើងខ្លាំង។
ការជំរុញបែបនេះបានធ្វើឡើងនៅថ្ងៃទី ១៤ កក្កដា ក្នុងព្រឹត្តិការណ៍ប្រកាសដាក់ឱ្យប្រើប្រាស់ជាផ្លូវការនូវផែនការសកម្មភាព ដើម្បីបង្ការ ទប់ស្កាត់ និងឆ្លើយតបការកេងប្រវ័ញ្ចផ្លូវភេទលើកុមារ តាមប្រព័ន្ធអនឡាញ ឆ្នាំ ២០២១-២០២៥ តាមរយៈកម្មវិធីអនឡាញ ZOOM។
ក្នុងឱកាសនោះ លោក ស ខេង ដែលក៏ជាឧបនាយករដ្ឋមន្ត្រី មានប្រសាសន៍ថា ស្របពេលនឹងវិបត្តិកូវីដ ១៩ កំពុងរាតត្បាតទូទាំងពិភពលោក ការប្រើប្រាស់ប្រព័ន្ធបច្ចេកវិទ្យាព័ត៌មាន រឹតតែមានសារៈសំខាន់ក្នុងការប្រាស្រ័យទាក់ទង និងដោះស្រាយគ្រប់បញ្ហា រួមទាំងការសិក្សាអប់រំរបស់កុមារ និងយុវជនទាំងនៅទីក្រុងទាំងជនបទ។ ការងារនេះធ្វើឱ្យវិស័យបច្ចេកវិទ្យាព័ត៌មាន រឹតតែទទួលបាននូវការពេញនិយមសម្រាប់ទំនាក់ទំនង និងអភិវឌ្ឍន៍គ្រប់វិស័យ។
ទោះជាយ៉ាងណា លោកលើកឡើងថា ការរីកចម្រើនផ្នែកបច្ចេកវិទ្យាព័ត៌មាន ក៏មានជ្រុងអវិជ្ជមានមួយចំនួនដែលពាក់ព័ន្ធនឹងការប្រើប្រាស់ខុសគោលដៅ។ មានការជ្រៀតចូលពីក្រុមឧក្រិដ្ឋជនឆ្លៀតឱកាសទាញយកផលប្រយោជន៍ដោយខុសច្បាប់ និងប្រាសចាកពីគន្លងសីលធម៌ និងការអភិវឌ្ឍ។ បង្កើតឱ្យមានការកេងប្រវ័ញ្ច និងឧក្រិដ្ឋកម្មគ្រប់រូបភាព រួមទាំងការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ ដែលជាទម្រង់ថ្មីមួយកំពុងរាលដាល និងបង្កហានិភ័យខ្ពស់ដល់កុមារនៅលើពិភពលោក រួមទាំងកម្ពុជាផងដែរ។
ដូច្នេះលោកបង្ហាញនូវការជឿជាក់ថា មន្ត្រីអ្នកអនុវត្តច្បាប់ ទាំងអស់នឹងដាក់បញ្ចូលវិធានការបង្ការ ទប់ស្កាត់ និងស្តារនីតិសម្បទាជនរងគ្រោះ ដោយអំពើកេងប្រវ័ញ្ចផ្លូវភេទតាមប្រព័ន្ធអនឡាញ ទៅក្នុងសកម្មភាពប្រចាំថ្ងៃរបស់ខ្លួន និងអនុវត្តឱ្យមានប្រសិទ្ធភាព ដើម្បីការពារកុមារកម្ពុជាពីការរំលោភបំពានតាមប្រព័ន្ធអនឡាញនេះ។
លោក ស ខេង បញ្ជាក់ថា៖ «គ្រប់ក្រសួង ស្ថាប័ន ព្រមទាំងអាជ្ញាធរមានសមត្ថកិច្ចគ្រប់លំដាប់ថ្នាក់ គប្បីយកចិត្តទុកដាក់បញ្ចូលផែនការសកម្មភាពដើម្បីបង្ការ ទប់ស្កាត់ និងឆ្លើយតបការកេងប្រវ័ញ្ចផ្លូវភេទលើកុមារ តាមប្រព័ន្ធអនឡាញទៅក្នុងផែនការប្រតិបត្តិប្រចាំថ្ងៃរបស់អង្គភាពសាមី។ នេះគឺជាការសំខាន់ណាស់ ដែលបញ្ជាក់ពីការគាំទ្រ និងការចូលរួមគ្រប់ក្រសួងស្ថាប័ន»។
យោងតាមការសិក្សាស្រាវជ្រាវស្តីពីការវិភាគស្ថានភាពដំបូងនៃការកេងប្រវ័ញ្ចផ្លូវភេទកុមារតាមអនឡាញនៅកម្ពុជាឆ្នាំ ២០២០ ដែលក្រុមប្រឹក្សាជាតិកម្ពុជាដើម្បីកុមារ (ក.ជ.ក.) បានដឹកនាំ និងសម្របសម្រួល គឺប្រមាណ ៦០% នៃកុមារកម្ពុជាដែលបានចូលរួមក្នុងដំណើរការអង្កេតត្រូវបានរាយការណ៍ថា ធ្លាប់បានជួបប្រទះហានិភ័យនៃការកេងប្រវ័ញ្ចផ្លូវភេទតាមអនឡាញ នៅពេលពួកគេប្រើប្រាស់អ៊ីនធឺណិតដូចជាការលួងលោមក្នុងគោលបំណងផ្លូវភេទ និងការបង្ខំផ្ញើរូបអាក្រាតរបស់កុមារជាដើម។
បន្ថែមពីនេះ តាមរយៈការរាយការណ៍ពីសាធារណជនមកកាន់សមត្ថកិច្ច និងបណ្តាញរាយការណ៍តាមអ៊ីនធឺណិត (Internet Hotline) ជាមធ្យមមានចំនួនរាយការណ៍ជាង ១៥០ ករណី ក្នុង ១ ឆ្នាំៗ ដែលជាករណីសង្ស័យទាក់ទងនឹងការលួងលោមកុមារតាមអនឡាញ ការផលិត និងចែកចាយរូបភាព សម្ភារអាសអាភាសកុមារ និងការគំរាមខាងផ្លូវភេទជាដើម។
លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លើកឡើងថា ការចូលរួមរបស់ស្ថាប័នពាក់ព័ន្ធ ជាពិសេសតួអង្គ យុត្តិធម៌ព្រហ្មទណ្ឌ អ្នកអនុវត្តន៍ច្បាប់ និងអង្គការដៃគូពាក់ព័ន្ធ តាមរយៈផែនការសកម្មភាពថ្មីនេះនឹងនាំឱ្យកុមារកម្ពុជា ទទួលបាននូវការការពារប្រកបដោយប្រសិទ្ធភាព។
លោកថ្លែងថា៖ «កុមារក៏ត្រូវតែទទួលបានយុត្តិធម៌តាមផ្លូវច្បាប់ ដែលជាផ្នែកមួយក្នុងការជំរុញស្តារនីតិសម្បទាកុមាររងគ្រោះពីការកេងប្រវ័ញ្ចផ្លូវភេទ ឱ្យមានភាពរលូន និងឆាប់ជាសះស្បើយ ទាំងផ្លូវកាយ និងផ្លូវចិត្ត។ ការកេងប្រវ័ញ្ចផ្លូវភេទកុមារតាមប្រព័ន្ធអ៊ីនធឺណិត គឺជាទម្រង់នៃការកេងប្រវ័ញ្ច និងរំលោភបំពានលើកុមារគួរឱ្យភ័យខ្លាច»។
តាមផែនការសកម្មភាពថ្មីនេះបានកំណត់នូវគោលដៅយុទ្ធសាស្ត្រសំខាន់ៗ ដូចជា ការពង្រឹងប្រសិទ្ធភាពការអនុវត្តគោលនយោបាយ និងអភិបាលកិច្ច។ ការលើកកម្ពស់យុត្តិធម៌ព្រហ្មទណ្ឌ ការលើកកម្ពស់វិធានការបង្ការ ទប់ស្កាត់និងស្តារនីតិសម្បទាជនរងគ្រោះដោយអំពើកេងប្រវ័ញ្ចផ្លូវភេទតាមប្រព័ន្ធអនឡាញ និងការពង្រឹងសុវត្ថិភាពសហគមន៍ពីការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញផងដែរ។
តាមអង្គការយូនីសេហ្វប្រចាំកម្ពុជា និងអង្គការជាដៃគូឱ្យដឹងថា ចំនួនថវិកាប៉ាន់ស្មានសម្រាប់អនុវត្តផែនការសកម្មភាព ដើម្បីបង្ការ ទប់ស្កាត់ និងឆ្លើយតបការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញនេះ គឺប្រមាណជាង ៣,៨ លានដុល្លារអាមេរិក សម្រាប់រយៈពេលជាង ៥ ឆ្នាំ ដែលគ្របដណ្តប់ទៅលើវិស័យយុទ្ធសាស្ត្រទាំង ៦។ ថវិកាចំនួន ៣៦ ភាគរយ គឺជាថវិកាផ្តល់ដោយរាជរដ្ឋាភិបាល និងថវិកា ៦៤ ភាគរយទៀតគឺជាការចូលរួមចំណែកពីដៃគូអភិវឌ្ឍន៍នានា៕
