ភ្នំពេញៈ ជនសង្ស័យចំនួន ១៨ នាក់ ត្រូវសមត្ថកិច្ចបង្ហាញមុខក្នុងសន្និសីទកាសែតនាថ្ងៃនេះ ក្រោយពីចាប់ខ្លួនបាន ៣ ថ្ងៃ ពាក់ព័ន្ធនឹងការស្លៀកស្បង់ចីពរក្លែងជាសង្ឃដើររៃអង្គាស លុយពីពលរដ្ឋក្នុងភូមិសាស្ត្រខណ្ឌកំបូល រាជធានីភ្នំពេញ។
លោក ឈឹម សាវុទ្ធ អធិការរងទទួលផែននគរបាលព្រហ្មទណ្ឌនៃអធិការដ្ឋាននគរបាលខណ្ឌកំបូលប្រាប់នៅថ្ងៃទី ១៤ ខែកក្កដា ថា នគរបាលខណ្ឌកំបូលរបស់លោកធ្វើសន្និសីទកាសែតនៅថ្ងៃទី ១៥ កក្កដានេះ ដើម្បីបង្ហាញមុខជនសង្ស័យចំនួន ១៨ នាក់នេះជាសាធារណៈពាក់ព័ន្ធនឹងបទល្មើសរបស់ពួកគេដែលបានក្លែងជាសង្ឃដើររៃអង្គាសលុយពីពលរដ្ឋ។
លោកថ្លែងថា៖ «ក្រុមជនល្មើសបានក្លែងធ្វើជាសង្ឃហើយដើររៃអង្គាសលុយពីប្រជាពលរដ្ឋ។ ពួកគេជាអ្នកជាន់ពន្លិចព្រះពុទ្ធសាសនា ខណៈខ្លួនជាអ្នកកាន់ព្រះពុទ្ធសាសនា»។
បើតាមលោក ឈឹម សាវុទ្ធ កាលពីថ្ងៃទី ១២ កក្កដា ប្រជាពលរដ្ឋបានរាយការណ៍ទៅអធិការដ្ឋាននគរបាលខណ្ឌកំបូលដោយរៀបរាប់ថា មានមនុស្ស ១ ក្រុមបានមកជួលផ្ទះស្នាក់នៅក្នុងបុរីពិភពថ្មី (ទឹកដីខណ្ឌកំបូល)។
លោកថា នៅពេលព្រឹកគេតែងឃើញសង្ឃជាច្រើនអង្គចេញពីផ្ទះជួលនោះទៅបិណ្ឌបាតរៀងរាល់ថ្ងៃ។ បន្ទាប់ពីទទួលបានសេចក្តីរាយការណ៍ពីប្រជាពលរដ្ឋ លោក ហង្ស មុនី អធិការនគរបាលខណ្ឌកំបូលបញ្ជាឱ្យលោកដឹកនាំកម្លាំងស្រាវជ្រាវនៅតាមគោលដៅដែលប្រជាពលរដ្ឋបានរាយការណ៍មកសមត្ថកិច្ច។
លុះនៅវេលាម៉ោងជាង ១១ ថ្ងៃត្រង់ថ្ងៃទី ១២ កក្កដា សមត្ថកិច្ចរបស់លោកបានប្រទះឃើញក្រុមជនសង្ស័យ ៩ នាក់ជាសង្ឃគ្រងស្បង់ចីពរហើយមានបុរសម្នាក់ជាអ្នកបើករថយន្តម៉ាកកូរ៉ូឡា ១ គ្រឿងចាំដើរប្រមូលពួកគេនៅភូមិព្រៃបឹង សង្កាត់កន្ទោក ខណ្ឌកំបូល។
បន្ទាប់ពីសមត្ថកិច្ចឃាត់ពួកគេបាន ១០ នាក់ហើយ ក៏បន្តឃាត់ខ្លួនបក្ខពួកគេបាន ៨ នាក់បន្ថែមទៀត។ លោកបានបន្តថា ក្រោយពីឃាត់ខ្លួនគឺលោកបានយកពួកគេទៅប្រគល់ឱ្យព្រះអនុគណខណ្ឌកំបូលចាប់ដោះស្បង់ចីពរ និងដឹកមកអធិការដ្ឋាននគរបាលខណ្ឌ ដើម្បីសួរចម្លើយ។ ក្នុងចំណោមជនក្លែងជាសង្ឃទាំង ១៨ នាក់ មាន ៧ នាក់ត្រូវបានធ្វើតេស្តរកឃើញមានផ្ទុកសារធាតុញៀនក្នុងខ្លួន។
បើតាមលោក ឈឹម សាវុទ្ធ តាមចម្លើយសារភាពរបស់ក្រុមជនសង្ស័យបានប្រាប់ថា ពួកគេក្លែងជាសង្ឃដើរបិណ្ឌបាតនេះបានធ្វើរយៈពេលជាយូរមកហើយ និងមានបុរសជាមេខ្យល់ម្នាក់ ឈ្មោះ ម៉េង អាយុ ២៥ ឆ្នាំជាអ្នកមេគំនិត។
ពាក់ព័ន្ធនឹងការដើររៃអង្គាសលុយនេះ គឺក្នុង ១ ថ្ងៃៗពួកគេរកលុយបានពី ៨ ម៉ឺនទៅ ១០ ម៉ឺនរៀល ប៉ុន្តែមេខ្យល់ឱ្យពួកគេបង់ម្នាក់ៗពី ៣០ ០០០ ទៅ ៣៥ ០០០ រៀល។ ចំពោះលុយនៅសល់ ពួកគេយកទៅចាយវាយផ្ទាល់ខ្លួន។ ចំណែកមេខ្យល់កំពុងត្រូវបានសមត្ថកិច្ចស្វែងរកចាប់ខ្លួន៕
វីដេអូ៖