.jpg)
ប្តីជនជាតិចិន និងប្រពន្ធជនជាតិមីយ៉ាន់ម៉ាជាមួយវត្ថុតាងគ្រឿងញៀនជាង ៥៧ គីឡូក្រាម។ រូបថត នគរបាល
ភ្នំពេញៈ សាលាដំបូងរាជធានីភ្នំពេញ នៅថ្ងៃទី ១៣ ខែ កក្កដា ឆ្នាំ ២០២១ បានបើកសវនាការ ជំនុំជម្រះទោស ប្ដីប្រពន្ធជនជាតិចិន និងមីយ៉ាន់ម៉ា ២ នាក់ បន្ទាប់ពីពួកគេត្រូវបានចាប់ និងឃុំខ្លួនជាបណ្ដោះអាសន្នក្នុងពន្ធនាគារព្រៃសកាលពីថ្ងៃទី ២៩ ខែ មេសា ឆ្នាំ ២០២០ ក្នុងបទល្មើសផលិត និងជួញដូរគ្រឿងញៀនជាង ៥៧ គីឡូក្រោម។
បន្ទាប់ពីជំនុំជម្រះ ចៅក្រមបានប្រកាសថា សាលក្រមនៃសំណុំរឿងគ្រឿងញៀនរបស់ជនបរទេសទាំង ២ នាក់នេះនឹងត្រូវប្រកាសនៅថ្ងៃទី ១២ ខែសីហា ឆ្នាំ ២០២១។
លោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញបានថ្លែងថា ជនជាប់ចោទទាំង ២ នាក់ប្ដីប្រពន្ធក្នុងសំណុំរឿងគ្រឿងញៀននេះ រួមមានឈ្មោះ LEE KWAN FUK អាយុ ៦០ ឆ្នាំ ជាជនជាតិចិន ត្រូវជាប្ដីរបស់ជនសង្ស័យឈ្មោះ THET HLAING អាយុ ៥២ ឆ្នាំ ជាជនជាតិមីយ៉ាន់ម៉ា។
អ្នកទាំង ២ ត្រូវបានកម្លាំងការិយាល័យ (ក១១) នៃមន្ទីរប្រឆាំងបទល្មើសគ្រឿងញៀនចាប់ឃាត់ខ្លួននៅពីថ្ងៃទី ២៩ ខែ មេសា ឆ្នាំ ២០២១ នៅចំណុចទីតាំងផ្ទះគ្មានលេខមួយកន្លែង ស្ថិតក្នុងភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញក្រោយពីឆែកឆេររកឃើញគ្រឿនញៀនប្រភេទ ecstasy សរុបជាង ៥៧ គីឡូក្រាម និងម៉ាស៊ីនផលិតកែច្នៃគ្រឿងញៀនខុសច្បាប់ចំនួន ២ គ្រឿង។
លោក អ៊ី រិន្ទ បានបញ្ជាក់ថា៖ «ក្រោយបញ្ចប់សវនាការសួរដេញដោល និងស្ដាប់សេចក្ដីសន្និដ្ឋានរបស់តំណាងអយ្យការអមសាលាដំបូងរាជធានីភ្នំពេញ និងការស្នើសុំឱ្យមានការបន្ធូរបន្ថយទោសរបស់ជនជាប់ចោទទាំង ២ នាក់ប្ដីប្រពន្ធ រួចលោក សេង សុជាតិ ប្រធានក្រុមប្រឹក្សាជំនុំជម្រះបានសម្រេចលើកពេលប្រកាសសាលក្រមទៅថ្ងៃទី ១២ សីហា ឆ្នាំ ២០២១»។
បើតាមលោក អ៊ី រិន្ទ ជនជាប់ចោទប្ដីប្រពន្ធទាំង ២ នាក់នោះត្រូវបានលោក ចែ សុង តំណាងអយ្យការអមសាលាដំបូងរាជធានីភ្នំពេញបានសម្រេចរក្សាការចោទប្រកាន់ពីបទ «ផលិតកែច្នៃ និងជួញដូរសារធាតុញៀនតាមមាត្រា ៤០ នៃច្បាប់ស្ដីពីគ្រឿងញៀន»។
យោងតាមបទចោទ និងមាត្រា ៤០ នៃច្បាប់ស្ដីពីគ្រឿងញៀន ជនជាប់ចោទទាំង ២ នាក់ប្ដីប្រពន្ធនេះនឹងត្រូវប្រឈមការផ្ដន្ទាទោសជាប់ពន្ធនាគារអស់ ១ ជីវិត៕
