.jpg)
កម្មករកំពុងប្រមូលសំរាមក្នុងខណ្ឌពោធិ៍សែនជ័យ។ ហេង ជីវ័ន
ភ្នំពេញៈ ប្រជាពលរដ្ឋនៅរាជធានីភ្នំពេញមួយចំនួនបង្ហាញ ការពេញចិត្តចំពោះសេវាប្រមូលសំរាមរបស់ក្រុមហ៊ុនថ្មី ដែលមានលក្ខណៈល្អប្រសើរជាងមុន ខណៈពួកគេនៅតែទទូចឱ្យក្រុមហ៊ុនទាំងនោះ បន្តយកចិត្តទុកដាក់ក្នុងការប្រមូលសំរាមឱ្យបានល្អជាងនេះបន្ថែមទៀត កុំធ្វើបានតែដំបូង។
ប្រតិបត្តិករប្រមូលសំរាមថ្មីចំនួន ៣ បានចាប់ផ្តើមសម្អាត ប្រមូល និងដឹកជញ្ជូនសំរាម សំណល់រឹង នៅតាមតំបន់ចំនួន ៣ នៃខណ្ឌទាំង ១៤ របស់រាជធានី-ភ្នំពេញ ដោយឡែកពីគ្នាចាប់តាំងពីថ្ងៃទី ១ កក្កដា បន្ទាប់ពីពួកគេបានឈ្នះការដេញថ្លៃ និងត្រូវបានសាលារាជធានីភ្នំពេញ វាយតម្លៃពីកម្រិតគុណភាពក្នុងចំណោមក្រុមហ៊ុន ដែលបានចូលរួមដេញថ្លៃដទៃទៀត។
ប្រតិបត្តិករថ្មីទាំង ៣ នេះ រួមមាន ក្រុមហ៊ុន 800 Super/Global Action for Environment Awareness Public Limited ត្រូវផ្តល់សេវាក្នុងតំបន់ទី ១ ដែលមាន ៥ ខណ្ឌ គឺខណ្ឌទួលគោក ខណ្ឌឫស្សីកែវ ខណ្ឌសែនសុខ ខណ្ឌជ្រោយចង្វារ និងខណ្ឌព្រែកព្នៅ។
ក្រុមហ៊ុន Mizuda Group Co, Ltd ត្រូវផ្តល់សេវាក្នុងតំបន់ទី ២ ដែលមាន ៥ ខណ្ឌ គឺ ខណ្ឌដូនពេញ ខណ្ឌ៧មករា ខណ្ឌដង្កោ ខណ្ឌពោធិ៍សែនជ័យ និងខណ្ឌកំបូល។ រីឯក្រុមហ៊ុន CINTRI (Cambodia/Everbright (China) ត្រូវផ្តល់សេវាក្នុងតំបន់ទី ៣ មាន ៤ ខណ្ឌគឺខណ្ឌចំការមន ខណ្ឌបឹងកេងកង ខណ្ឌមានជ័យ និងខណ្ឌច្បារអំពៅ។
ក្នុងរយៈពេលប្រតិបត្តិការប្រមាណ ២ សប្តាហ៍មកនេះ លោក មករា ដែលជាអាជីវករបើកលក់ហ្គាសនៅភូមិព្រៃទា សង្កាត់ចោមចៅ ខណ្ឌពោធិ៍សែនជ័យ ប្រាប់ភ្នំពេញប៉ុស្តិ៍ នៅថ្ងៃទី ១៤ កក្កដាថា ការចូលមកបម្រើសេវារបស់ក្រុមហ៊ុនថ្មី គឺមានលក្ខណៈល្អ និងមិនល្អខ្លះៗ។
ចំណុចល្អនោះ គឺលោកសង្កេតឃើញថា ក្រុមហ៊ុន Mizuda នេះ បានប្រមូលសំរាមស្អាតជាងមុន ដោយមិនបង្កឱ្យសំរាមធ្លាក់រាយប៉ាយពេញមុខផ្ទះ និងផ្លូវសាធារណៈនោះទេ។ បន្ថែមពីនេះ លោកថា ចំពោះរថយន្តដឹកសំរាមក៏ថ្មីៗ ដែលមិនបង្កឱ្យទឹកស្អុយនៃសំរាម សាចរាយប៉ាយពេញផ្លូវ បណ្តាលឱ្យស្អុយនោះដែរ។
ប៉ុន្តែលោកហាក់មិនពេញចិត្តចំពោះប្រតិបត្តិការរបស់ក្រុមហ៊ុនថ្មីនេះ ត្រង់ថា តំបន់ដែលលោករស់នៅមានកម្មករច្រើន ហើយការបញ្ចេញសំរាមក៏ច្រើនផងដែរ ប៉ុន្តែប្រតិបត្តិការនៃការមកយកសំរាមរបស់ក្រុមហ៊ុនបែរជាយឺតយ៉ាវទៅវិញធ្វើឱ្យសំរាមកកស្ទះពេញមុខផ្ទះ។
លោកបញ្ជាក់ថា៖ «ក្រុមហ៊ុនថ្មីនេះ មិនសូវឃើញមកយកសំរាមនៅតំបន់ខ្ញុំញឹកនោះទេ ដល់ពេលក្រមកយកបែបនេះ វាកកពេញមុខផ្ទះធ្វើអ្វីមិនកើត។ ព្រោះតំបន់ខ្ញុំធ្លាប់តែឡានសំរាមមកយកសឹងរាល់ថ្ងៃ ដល់ពេលនេះសំរាមដល់តែ ៣ ទៅ ៤ ធុងសំរាម បានឡានសំរាមមកយកម្តង។ យើងរកស៊ីលំបាកដែរដល់អ៊ីចឹង»។
ចំណែកអ្នកស្រី ធុល អក្ខរ៉ា ជាពលរដ្ឋម្នាក់រស់នៅក្នុងខណ្ឌឫស្សីកែវ ប្រាប់ភ្នំពេញប៉ុស្តិ៍នៅថ្ងៃទី ១៤ កក្កដាដែរថា ចំពោះក្រុមហ៊ុនថ្មី ដែលមកប្រមូលសំរាមនៅតំបន់អ្នកស្រីក៏មិនសូវជាខុសគ្នាប៉ុន្មានជាមួយនឹងប្រតិបត្តិករចាស់នោះដែរ។
ប៉ុន្តែបើតាមស្ត្រីរូបនេះ គ្រាន់តែអ្នកស្រីសង្កេតឃើញមានចំណុចល្អៗមួយចំនួនច្រើនជាងមុន ដូចជាការប្រើប្រាស់យានយន្តថ្មី ការប្រមូលសំរាមបានស្អាតជាងមុន។ ប៉ុន្តែអ្នកស្រីបារម្ភថា ថ្ងៃមុខទៅក៏មិនច្បាស់ថាក្រុមហ៊ុននេះអាចនៅតែបន្តប្រតិបត្តិការល្អជាងមុន ឬយ៉ាប់ជាងមុននោះទេ។
អ្នកស្រីបន្តថា៖ «ទៅថ្ងៃមុខទៀតខ្ញុំមិនហ៊ាននិយាយទេ។ ព្រោះអីគេទើបប្រមូលអ៊ីចឹង ដូចមកដំបូងអ៊ីចឹងឃើញថាគ្រាន់បើជាង។ មកប្រមូលទៀងទាត់។ ដល់ទៅថ្ងៃក្រោយទៀតខ្ញុំមិនហ៊ាននិយាយ ថាម៉េចទេ ព្រោះខ្លាចបានតែដំបូង មានតែចាំមើលបន្តទៀត»។
រីឯអ្នកស្រី មួយ គា ដែលជាម្ចាស់ផ្ទះជួលក្នុងសង្កាត់ផ្សារដើមថ្កូវ ខណ្ឌចំការមន ដែលមានក្រុមហ៊ុន ស៊ីនទ្រី ជាអ្នកបម្រើសេវាប្រមូលសំរាម ដដែលនិយាយថា ពីមុន និងពេលនេះ គឺមិនខុសគ្នាទេ ចំពោះប្រតិបត្តិការរបស់ក្រុមហ៊ុនមួយនេះ។
អ្នកស្រីថា ក្រុមហ៊ុននៅតែមកយកសំរាមតាមការកំណត់របស់ខ្លួនដូចពេលកន្លងទៅដដែល។ អ្នកស្រីបន្តថា៖ «មិនមានអ្វីខុសគ្នា គឺឡាន និងមនុស្សដដែល មកយកសំរាមពីមុខផ្ទះខ្ញុំ។ មិនមានអ្វីផ្លាស់ប្តូរច្រើនទេ។ គាត់ប្រមូលសំរាមអស់ៗពីមុខផ្ទះដូចតែពីមុន។ ខ្ញុំគ្រាន់តែសង្ឃឹមថា កុំឱ្យជួបបញ្ហាដូចមុនទៀត នៅពេលកម្មករគាត់ធ្វើបាតុកម្ម កម្មករ អត់មកយកសំរាមតែមួយរយៈ ស្អុយពេញហ្នឹង»។
យោងតាមការបញ្ចេញទស្សនៈរបស់អ្នកប្រើប្រាស់នៅលើទំព័រហ្វេសប៊ុករបស់រដ្ឋាករស្វយ័តគ្រប់គ្រងសំរាម និងសំណល់រឹងរាវនៃសាលារាជធានីភ្នំពេញ មួយរយៈចុងក្រោយនេះសង្កេតឃើញថាមានការបង្ហាញការពេញចិត្តចំពោះ ប្រតិបត្តិការប្រមូលសំរាមទាំងនេះ ច្រើនជាងការរិះគន់ បន្ទាប់ពីពេលកន្លងទៅ បញ្ហាសំរាម គឺតែងតែមានប្រតិកម្ម និងការរិះគន់ពីប្រជាពលរដ្ឋ។
លោក សន ជ័យ ប្រធានអង្គការ សម្ព័ន្ធគណនេយ្យភាពសង្គមកម្ពុជាជំរុញឱ្យរដ្ឋបាលរាជធានីភ្នំពេញបង្កើតសេវាកម្មកាយសំរាមក្នុងលូ ប្រឡាយទឹកស្អុយ ជាប្រចាំបន្ថែមទៀត ព្រោះបញ្ហានេះក៏ជារឿងល្អមួយនាំឱ្យកាត់បន្ថយការកកស្ទះទឹកជន់លិចទីក្រុងបានដែរ។
លោកបានថ្លែងថា៖ «ក្រៅពីនោះ ការបង្កើតជនបង្គោលនៅតាមភូមិដើម្បីត្រួតពិនិត្យការគ្រប់គ្រងសំរាម និងផ្លាស់ប្តូរឥរិយាបថពលរដ្ឋ ដើម្បីបរិស្ថានស្អាត បរិស្ថានបៃតងជាជម្រើសនៅថ្ងៃអនាគត ដែលយើងចង់ឱ្យកើតមាននៅគ្រប់ច្រកល្ហកនៃប្រទេស»៕
វីដេអូ៖
