ភ្នំពេញៈ ប្រទេសអូស្ត្រាលីកំពុងវិនិយោគទឹកប្រាក់ ១១,៦៥ លានដុល្លារអូស្ត្រាលី នៅក្នុងតំបន់ឥណ្ឌូប៉ាស៊ីហ្វិក រួមទាំងកម្ពុជាផងដែរ ដើម្បីបង្កើននូវចំនួននៃការទទួលបាននូវសេវាធ្វើតេស្ត និងការបង្ការជំងឺអេដស៍ ដើម្បីឆ្លើយតបទៅនឹងបញ្ហាជំងឺអេដស៍ និងដំណើរការឆ្ពោះទៅរកការបញ្ឈប់ជំងឺអេដស៍។ នេះយោងតាមសេចក្តីប្រកាសព័ត៌មានរបស់ស្ថានទូតអូស្ត្រាលីប្រចាំភ្នំពេញចុះថ្ងៃទី ១៥ ខែកក្កដានេះ។
ការវិនិយោគថ្មីនេះនឹងជួយដល់អង្គការដឹកនាំដោយសហគមន៍ ធ្វើឱ្យប្រសើរឡើងនូវសេវាបង្ការ និងការធ្វើតេស្តក៏ដូចជាដោះស្រាយបញ្ហាវិសមភាព ការឈឺចាប់ផ្លូវចិត្ត និង ការរើសអើង ជូនអ្នកដែលកំពុងតែរស់នៅជាមួយជំងឺអេដស៍។
លោក Andreas Zurbrugg អនុប្រធានបេសកកម្មប្រចាំស្ថានទូតអូស្ត្រាលី បានថ្លែងនៅក្នុងសេចក្តីប្រកាសព័ត៌មានថា កម្ពុជាបានដើរតួនាទីជាគំរូមួយក្នុងតំបន់ ដោយក្នុងឆ្នាំ ២០១៧ បានក្លាយជាប្រទេសមួយក្នុងចំណោម ៧ ប្រទេសលើពិភពលោក ដែលសម្រេចបាននូវគោលដៅជាអន្តរជាតិ ក្នុងការធ្វើតេស្ត និងព្យាបាល។
លោក ទៀ ផល្លា អនុប្រធានអាជ្ញាធរជាតិប្រយុទ្ធប្រឆាំងជំងឺអេដស៍បានថ្លែងថា ការប្រយុទ្ធប្រឆាំងនឹងជំងឺអេដស៍នៅកម្ពុជាអស់រយៈកាលរាប់ទសវត្សរ៍ និងភាពជោគជ័យដ៏ត្រចះត្រចង់គឺជាឫសក្នុងការផ្តោតទៅលើនវានុវត្តន៍ ការគោរពសិទ្ធិមនុស្ស និងសមធម៌យេនឌ័រ ដំណោះស្រាយនៅតាមសហគមន៍ និងការប្តេជ្ញាចិត្តផ្នែកនយោបាយក៏ដូចជាភាពដឹកនាំរបស់រាជរដ្ឋាភិបាលកម្ពុជា ដែលត្រូវការពង្រីកកិច្ចប្រឹងប្រែងក្នុងការបញ្ចប់ជំងឺអេដស៍នៅកម្ពុជា។
លោកស្រី Khin Cho Win Htin ប្រធានស្ដីទីកម្មវិធីរួមគ្នារបស់អង្គការសហប្រជាជាតិប្រយុទ្ធជំងឺអេដស៍ថ្លែងថា កម្មវិធីរួមគ្នារបស់អង្គការសហប្រជាជាតិ ប្រយុទ្ធជំងឺអេដស៍កំពុងរង់ចាំសហការជាមួយអូស្ត្រាលី ដើម្បីបង្កើនចំនួន និងការទទួលបានសេវា ធ្វើតេស្ត និងបង្ការមេរោគអេដស៍ ក្នុងចំណោមប្រជាជនគោលដៅក្នុងប្រទេសកម្ពុជា។
នាយកមជ្ឈមណ្ឌលជាតិប្រយុទ្ធប្រឆាំងជំងឺអេដស៍ និងកាមរោគ លោក លី ប៉េងស៊ុន បានថ្លែងថា កម្ពុជាកំពុងតែស្ថិតនៅក្នុងពេលវេលាដ៏ល្អមួយ សម្រាប់ការឆ្លើយតបទៅនឹងបញ្ហាជំងឺអេដស៍ ហើយកំពុងតែដំណើរការឆ្ពោះទៅរកការបញ្ឈប់ជំងឺអេដស៍ ដែលកម្ពុជាកំពុងតែរក្សាសមិទ្ធផលក្នុងការសម្រេចនូវគោលដៅនៃការព្យាបាល ដែលចាំបាច់ត្រូវតែបង្កើននូវសេវាកម្មបង្ការ សម្រាប់ប្រជាជនគោលដៅ តាមរយៈសមត្ថភាពទទួលបាននូវសេវាកម្មបង្ការ ប្រកបដោយសមធម៌»៕