.jpg)
សាច់សត្វខូចគុណភាពដែលត្រូវបានមន្ត្រីរឹបអូស។ រូបថត នគរបាល
ភ្នំពេញៈ សាច់សត្វខូចគុណភាពជាច្រើនប្រភេទ សរុបជិត ៩ តោនដែលត្រូវបានក្រុមឈ្មួញនាំចូលពីប្រទេសថៃដោយខុសច្បាប់ត្រូវបានមន្ត្រីជំនាញបង្ក្រាប និងរឹបអូស នៅខេត្តបន្ទាយមានជ័យនាថ្ងៃទី ១៤ កក្កដា។ នេះបើតាមការអះអាងពីមន្ត្រីជំនាញ។
លោក ហ៊ុយ ទូច ប្រធានការិយាល័យផលិតកម្ម និងបសុព្យាបាលសត្វខេត្តបន្ទាយមានជ័យប្រាប់ ភ្នំពេញ ប៉ុស្តិ៍ ពីម្សិលមិញថា ផលិតផលសាច់សត្វខូចគុណភាពទាំងនោះត្រូវបានកម្លាំងរបស់លោកសហការជាមួយកម្លាំងនគរបាលប្រឆាំង បទល្មើសសេដ្ឋកិច្ចនៃស្នងការដ្ឋាននគរបាលខេត្តបន្ទាយមានជ័យ បង្ក្រាប និងចាប់រឹបអូសពីទីតាំងស្តុកផលិតផលសាច់សត្វដ៏ធំមួយស្ថិតក្នុងភូមិក្បាលស្ពាន ១ សង្កាត់-ក្រុងប៉ោយប៉ែតកាលពីព្រឹកថ្ងៃទី ១៤ ខែកក្កដា។
លោកប្រាប់ថា ម្ចាស់អាជីវកម្មដែលនាំចូលផលិតផលសាច់សត្វ ទាំងនោះជាជនជាតិថៃ ប៉ុន្តែមានតំណាងចែកចាយ ២ នាក់នៅកម្ពុជា គឺឈ្មោះ ឡៃ ឡាយ និងឈ្មោះ សុខ តារា។
លោកបញ្ជាក់ថា៖ «ផលិតផលសាច់សត្វខូចគុណភាពដែលត្រូវបានចាប់រឹបអូសនោះ រួមមាន សាច់ និងគ្រឿងក្នុងជ្រូក សាច់ និងឆ្អឹងមាន់ ព្រមទាំងក្បាលត្រី សរុប ៨ ៨៥០ គីឡូក្រាម។ ផលិតផលសាច់សត្វទាំងនេះត្រូវបានគេនាំចូលពីប្រទេសថៃ ដោយគ្មានវិញ្ញាបនបត្របញ្ជាក់គុណភាព និងសុខភាពអនាម័យពីអាជ្ញាធរជំនាញនៃប្រទេសថៃ និងពីស្ថាប័នជំនាញនៃប្រទេសកម្ពុជានោះទេ»។
បើតាមលោក ហ៊ុយ ទូច ការនាំចូលសាច់សត្វគ្មានលិខិតបញ្ជាក់គុណភាព និងសុខភាព អនាម័យពីសមត្ថកិច្ចជំនាញនៃប្រទេសនាំចេញ ឬសមត្ថកិច្ចជំនាញនៃប្រទេសនាំចូលគឺជាអំពើ «ល្មើសច្បាប់»។ ម្យ៉ាងទៀត ផលិតផលសាច់សត្វទាំងនោះវេចខ្ចប់ និងដឹកជញ្ជូនមិនបានត្រឹមត្រូវតាមបទដ្ឋានបច្ចេកទេសនោះទេ ដែលបង្កឱ្យស្អុយ ខូចគុណភាពដែលអាចបង្កផលប៉ះពាល់ដល់សុខភាពអ្នកបរិភោគ។
លោកថ្លែងថា៖ «ផលិតផលសាច់សត្វខូចគុណភាពទាំងនោះត្រូវបានគេច្រកក្នុងថង់ប្លាស្ទិក និងការុងអង្ករ ហើយដឹកតាមរថយន្តទ្រុងដោយដាក់សង្កត់គរពីលើគ្នា ដែលផ្ទុយពីបទដ្ឋានបច្ចេកទេស ដែលតម្រូវឱ្យមានការវេចខ្ចប់ និងដឹកតាមរថយន្ត ដែលមានបំពាក់ទូក្លាស្សេសម្រាប់បង្កក ដើម្បីសម្លាប់មេរោគ និងរក្សាគុណភាពសាច់»។
លោកថា ដោយមានការសម្របសម្រួលផ្នែកច្បាប់ពីលោក កើត សុវណ្ណារ៉េត ព្រះរាជអាជ្ញាអមសាលាដំបូងខេត្តបន្ទាយមានជ័យ ផលិតផលសាច់សត្វខូចគុណភាពទាំងនោះ ត្រូវប្រមូលយកទៅដុតកម្ទេចចោល ចៀសវាងផលប៉ះពាល់ដល់សុខភាព និងបរិស្ថាន។
ប៉ុន្តែមុនដុតកម្ទេចចោលនោះ ក្រុមការងាររបស់លោកបានដកហូតសំណាកផលិតផលសាច់សត្វមួយចំនួនផ្ញើទៅមន្ទីរពិសោធន៍នៃអគ្គនាយកដ្ឋានផលិតកម្មសត្វ និងបសុព្យាបាលសត្វក្នុងរាជធានីភ្នំពេញ ដើម្បីវិភាគរកសារធាតុគីមីដែលបំផ្លាញសុខភាព និងមេរោគជំងឺប៉េស្តជ្រូកអាហ្វ្រិកដែលអាចបង្កការរាតត្បាត ដល់ផលិតកម្មសត្វនៅប្រទេសកម្ពុជា។ ប៉ុន្តែមិនទាន់ទទួលបានលទ្ធផលតេស្តនៅឡើយទេ។
លោក ហ៊ុយ ទូច បញ្ជាក់ថា៖ «ប្រសិនបើលទ្ធផលពិសោធរកឃើញមានវិជ្ជមាននូវសាធាតុគីមីពុល ឬមេរោគអ្វីមួយដែលបង្កហានិភ័យដល់អ្នកបរិភោគ ឬអ្នកចិញ្ចឹមសត្វនៅក្នុងស្រុកនោះយើងនឹងកោះហៅម្ចាស់ទំនិញ ឬអ្នកទទួលខុសត្រូវលើមុខទំនិញទាំងនោះមកសាកសួរ និងកសាងសំណុំរឿងដោយយោងតាមមាត្រា ១១៥ នៃច្បាប់ស្ដីពីសុខភាពសត្វ និងផលិតកម្មសត្វ ដើម្បីបញ្ជូនទៅឱ្យតុលាការចាត់វិធានការបន្តតាមនីតិវិធីច្បាប់»។
យោងមាត្រា ១១៥ នៃច្បាប់ស្ដីពីសុខភាពសត្វ និងផលិតកម្មសត្វ ជនដែលពាក់ព័ន្ធក្នុងការនាំចូលដោយចេតនានូវសត្វ ឬផលិតផលសត្វដែលមានជំងឺឆ្លង ឬផ្ទុកមេរោគបង្កជំងឺ ខូចគុណភាព ឬបង្កគ្រោះថ្នាក់ដល់សុខភាពមនុស្ស សត្វ មកក្នុងព្រះរាជាណាចក្រកម្ពុជានឹងត្រូវផ្ដន្ទាទោសដាក់ពន្ធនាគារពី ២ ឆ្នាំ ដល់ ៥ ឆ្នាំ និងពិន័យជាប្រាក់ពី ១០ លានរៀលដល់ ៥០ លានរៀល។
ករណីនេះលោក សុខ តារា តំណាង ម្ចាស់អាជីវកម្មឃ្លាំងស្តុកផលិតផលសាច់សត្វ សម្រាប់លក់បន្តនៅប្រទេសកម្ពុជាមិនអាចទាក់ទងសុំការបញ្ជាក់ជុំវិញការនាំចូលសាច់សត្វខូចគុណភាពទាំងនោះបានទេពីម្សិលមិញ។ ប៉ុន្តែតំណាងម្នាក់ទៀត គឺ លោក ឡៃ ឡាយ ប្រាប់ថា ក្នុងចំណោមទំនិញ ដែលសមត្ថកិច្ចបានចាប់រឹបអូសនោះ ទំនិញមួយចំនួនត្រូវបានសមត្ថកិច្ចប្រគល់ជូនវិញ។
លោកថា៖ «សមត្ថកិច្ចបានប្រគល់ទំនិញមួយចំនួនដូចជាក្បាលត្រី និងឆ្អឹងមាន់មកឱ្យយើងវិញ ក្រោយពីអ្នកបញ្ជាទិញបានចេញ-មុខមកទទួលខុសត្រូវបង់ពិន័យលើការនាំចូល ដោយអះអាងថា ទំនិញទាំង ២ ប្រភេទនេះ គេយកទៅសម្រាប់ជាចំណីសត្វក្រពើរបស់គេប៉ុណ្ណោះ»។
លោកថា៖ «ខ្ញុំទទួលខុសត្រូវតែលើទំនិញដែលនាំចូលស្របច្បាប់ហើយត្រូវបាត់បង់ប៉ុណ្ណោះ។ ចំណែកទំនិញនាំចូលមិនស្របច្បាប់ គឺជាបន្ទុករបស់ម្ចាស់អាជីវកម្ម ដែលជាជនជាតិថៃ»៕
វីដេអូ៖
