បាត់ដំបងៈ ភ្លៀងយ៉ាងខ្លាំងពេញ ១ យប់ កាលពីយប់ថ្ងៃទី ១៤ ខែ កក្កដា ឆ្នាំ ២០២១ បានធ្វើឱ្យកើតមានជំនន់ទឹកភ្លៀងនៅស្រុកភ្នំព្រឹកដែលបានបណ្តាលឱ្យផ្ទះប្រមាណ ៧០ ខ្នងរងការលិចលង់ និងពលរដ្ឋជាង ៥០ គ្រួសារ រងផលប៉ះពាល់ព្រមទាំងធ្វើឱ្យជន់លិចកំណាត់ផ្លូវមួយចំនួនផងដែរ។
លោក ងួន រតនៈ អភិបាលខេត្តបាត់ដំបង និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្តបានប្រាប់ភ្នំពេញប៉ុស្តិ៍នៅថ្ងៃទី ១៥ កក្កដាថា រដ្ឋបាលខេត្តបានចាត់កម្លាំងចម្រុះ ចុះអន្តរាគមន៍សង្គ្រោះប្រជាជនទាន់ពេលវេលា ដោយមិនមានពលរដ្ឋណាម្នាក់ រងគ្រោះថ្នាក់នោះទេ។ លោក ថា មានប្រជាពលរដ្ឋជាង ៥០ គ្រួសារបានរងផលប៉ះពាល់ក្នុងនោះមានចំនួន ៤០ គ្រួសារ ត្រូវបានជម្លៀសទៅរកទីទួលសុវត្ថិភាព។
ចំណែកសត្វចិញ្ចឹមរបស់ពលរដ្ឋវិញ ក៏មិនមានរងផលប៉ះពាល់នោះដែរ ដោយត្រូវបានជម្លៀស និងរកកន្លែងទីទួលទាន់ពេលវេលា ខណៈដីស្រែចម្ការរបស់ប្រជាពលរដ្ឋមួយចំនួនត្រូវបានជន់លិច។ ប៉ុន្តែព័ត៌មានបឋម លោកនៅមិនទាន់ដឹងច្បាស់អំពីការខូចខាតកម្រិតណានោះទេ ព្រោះទឹកមិនទាន់ស្រកអស់។
លោកបញ្ជាក់ថា៖ «វាគ្រាន់តែភ្លៀង ១ មេ ហើយធម្មតាតែភ្លៀងគំហុក វាហូរមិនទាន់ គឺលិចភូមិអ៊ីចឹងឯង ព្រោះស្ថានភាពដីយើង វាមានភ្នំ មានទួល មានទំនាបអី។ អ៊ីចឹងកន្លែងណាមានជង្ហុក វាហូរទៅកន្លែងហ្នឹងហើយ ជាធម្មតាទេតំបន់ភ្នំនោះ។ បើសិនជាមិនមានភ្លៀងទៀតទេ វាហូរមកក្រោមៗអស់ហើយ»។
យោងតាមរបាយការណ៍បឋមរបស់លេខាធិការដ្ឋាន គ្រប់គ្រងគ្រោះមហន្តរាយខេត្តបាត់ដំបងបានឱ្យដឹងថា ក្រៅពីផលប៉ះពាល់ទាំងនេះ ជំនន់ទឹកភ្លៀងក៏បានធ្វើឱ្យផ្លូវក្រួសក្រហម ១ ខ្សែក្នុងឃុំបួ ប្រវែងប្រមាណ ២ ៥០០ ម៉ែត្រ រងការខូចខាត ខណៈជំនន់ទឹកភ្លៀង បានហូរច្រោះខូចលូកាត់ផ្លូវចំនួន ២ កន្លែង។
លោក លឹម ប៉ោសេង ស្នងការរងនៃស្នងការដ្ឋាននគរបាលខេត្តបាត់ដំបង បានប្រាប់ភ្នំពេញប៉ុស្តិ៍នៅថ្ងៃទី ១៥ កក្កដាថា ភូមិអូរធំ ឃុំភ្នំព្រឹក ត្រូវបានជំនន់ទឹកភ្លៀងធ្វើឱ្យលិចផ្ទះប្រជាពលរដ្ឋចំនួន ៤០ គ្រួសារ សម្ភារ និងដំណាំពោត ដំឡូងមីមួយចំនួន។ លោកបន្តថា ចំណែកឃុំបារាំងធ្លាក់ក៏រងផលប៉ះពាល់ផ្ទះប្រជាពលរដ្ឋចំនួន ១៩ គ្រួសារផងដែរ ក្នុងនោះផលប៉ះពាល់ខ្លាំងមាន ៣ គ្រួសារ។ លោកបញ្ជាក់ថា បើសរុបជាខ្នងផ្ទះនៅទូទាំងស្រុកគឺមានផ្ទះរងផលប៉ះពាល់ទាំងអស់ប្រមាណ ៧០ ខ្នងផ្ទះ។
លោកបានរៀបរាប់ទៀតថា៖ «នេះគឺជាជំនន់ទឹកភ្លៀង ហើយការជន់លិចនេះ ក៏មិនមានអ្វីគួរឱ្យគ្រោះថ្នាក់ធំដុំដែរ ពេលនេះ។ បើគ្មានភ្លៀងធ្លាក់បន្តទៀតទេ ទឹកនឹងស្រកអស់ក្នុងពេលឆាប់ៗ ព្រោះតំបន់នេះ មិនធ្លាប់ជន់លិចកន្លងមកទេ ហើយនេះគឺជាលើកដំបូងហើយ ដែលមានទឹកជន់លិច»។
ដោយសារតែក្នុងរដូវនេះ គឺជារដូវភ្លៀង លោក លឹម ប៉ោសេង អំពាវនាវដល់ប្រជាពលរដ្ឋក្នុងមូលដ្ឋានសូមឱ្យបង្កើនការប្រុងប្រយ័ត្នខ្ពស់ ចំពោះឧបទ្ទវហេតុគ្រោះធម្មជាតិ ដែលអាចកើតឡើងជាយថាហេតុ ជាពិសេសត្រូវយកចិត្តទុកដាក់ចំពោះក្មេងៗដោយមិនគួរបណ្តែតបណ្តាយនោះទេ៕