.jpg)
ភ្នំពេញៈ រដ្ឋបាលខេត្តមួយចំនួនបន្តរឹតបន្តឹងការអនុវត្តវិធានការរដ្ឋបាលយ៉ាងហ្មត់ចត់ ដោយផ្អាកជាបណ្តោះអាសន្ននូវសកម្មភាពអាជីវកម្ម លក់ដូរអាហារ ភេសជ្ជៈគ្រឿងស្រវឹង ភោជនីយដ្ឋាន និងការជួបជុំ និងត្រួតពិនិត្យអ្នកដំណើរឱ្យបានត្រឹមត្រូវ ដើម្បីទប់ស្កាត់ការឆ្លងរាលដាលជំងឺកូវីដ ១៩ ទៅក្នុងសហគមន៍។
រដ្ឋបាលខេត្តស្ទឹងត្រែងសម្រេចផ្អាកជាបណ្តោះអាសន្នសកម្មភាពអាជីវកម្មលក់ដូរអាហារ ភេសជ្ជៈគ្រឿងស្រវឹង អាហារដ្ឋាន ភោជនីយដ្ឋាន ហាងកាហ្វេ និងការជួបជុំពិសារអាហារ គ្រឿងស្រវឹងក្នុងចន្លោះពីម៉ោង ៨ យប់ ដល់ម៉ោង ៥ ភ្លឺក្នុងភូមិសាស្ត្រខេត្តស្ទឹងត្រែង ដើម្បីទប់ស្កាត់ការឆ្លងរាលដាលនៃជំងឺកូវីដ ១៩។
អភិបាលខេត្តស្ទឹងត្រែង លោក ម៉ុម សាវឿន បានចេញលិខិតសម្រេចផ្អាក ពីថ្ងៃទី ១៤ កក្កដា ដោយបញ្ជាក់ថា ក្នុងការផ្អាកនេះត្រូវបានលើកលែងចំពោះការលក់ដូរអាហារ ភេសជ្ជៈដែលមិនមែនជាគ្រឿងស្រវឹងនៅតាមផ្ទះ ឬទីតាំងអាជីវកម្មជាលក្ខណៈវេចខ្ចប់ និងគោរពតាមវិធានការសុខាភិបាល ជាពិសេសគឺ វិធានការ ៣ការពារ ៣កុំ។
លិខិតអភិបាលខេត្តសរសេរថា៖ «អ្នកដែលមិនគោរពវិធានការរដ្ឋបាល ក្នុងការទប់ស្កាត់ការឆ្លងរាលដាលនៃជំងឺកូវីដ ១៩ នៅក្នុងភូមិសាស្ត្រខេត្តស្ទឹងត្រែងនឹងត្រូវពិន័យអន្តរការណ៍ដូចមានចែងក្នុងប្រកាសអន្តរក្រសួងលេខ ១ ០៤៤ ចុះថ្ងៃទី ៨ ខែមេសា ឆ្នាំ ២០២១ របស់ក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ និងសេចក្តីសម្រេចលេខ ០៣៦/២១ ចុះថ្ងៃទី ១៥ ខែមេសា ឆ្នាំ ២០២១ របស់រដ្ឋបាលខេត្ត»។
ចំណែករដ្ឋបាលខេត្តកំពង់ស្ពឺសម្រេចបន្តការអនុវត្តវិធានការរដ្ឋបាលជាបណ្តោះអាសន្នរយៈពេល ២ សប្តាហ៍ទៀតក្នុងភូមិសាស្ត្រខេត្តគិតចាប់ពីថ្ងៃទី ១៥ កក្កដា ដល់ថ្ងៃទី ២៨ កក្កដានេះ ដើម្បីទប់ស្កាត់ការឆ្លងរីករាលដាលជំងឺកូវីដ ១៩។
លោក វ៉ី សំណាង អភិបាលខេត្តកំពង់ស្ពឺសរសេរក្នុងសេចក្តីសម្រេចចុះថ្ងៃទី ១៤ កក្កដាថា៖ «នាយករដ្ឋបាលសាលាខេត្ត រដ្ឋបាលស្រុកគងពិសី មន្ទីរ អង្គភាពពាក់ព័ន្ធព្រមទាំងម្ចាស់រោងចក្រ អេហ្វ យូ ជី ហ្គាម៉ិន (ខេមបូឌា) F.U.G GARMENT CO.,LTD ត្រូវ ទទួលបន្ទុកអនុវត្តសេចក្តីសម្រេច នេះឱ្យមានប្រសិទ្ធភាព»។
រីឯនៅខេត្តរតនគិរី រដ្ឋបាលខេត្តណែនាំគណៈបញ្ជាការឯកភាពគ្រប់ ក្រុង-ស្រុក អាជ្ញាធរគ្រប់លំដាប់ថ្នាក់ សមត្ថកិច្ចពាក់ព័ន្ធទាំងអស់ត្រូវយកចិត្តទុកដាក់ខ្ពស់និងអនុវត្តឱ្យបានម៉ឺងម៉ាត់នូវកិច្ចការចាំបាច់ ដូចជា បន្តការផ្សព្វផ្សាយឱ្យបានទូលំទូលាយបន្ថែមទៀតដល់ប្រជាពលរដ្ឋនៅគ្រប់មូលដ្ឋានអំពីហានិភ័យនៃជំងឺកូវីដ ១៩ ពិសេសទប់ស្កាត់រាល់ការជួបជុំនានា។
លោក ថង សាវុន អភិបាលខេត្តរតនគិរី សរសេរក្នុងលិខិតណែនាំពីម្សិលមិញថា៖ «ការចលនាមនុស្សពីតំបន់មួយទៅតំបន់មួយទៀត ជាកត្តានាំយកនូវមេរោគទៅចម្លងដល់សហគមន៍។ អាជ្ញាធរមានសមត្ថកិច្ចត្រូវជំរុញពលរដ្ឋឱ្យអនុវត្តវិធានការ ៣ការពារ ៣កុំ និងទម្លាប់នៃការពាក់ម៉ាស់ បាញ់អាល់កុលជាប្រចាំ។ ជាពិសេសនៅទីប្រជុំជន ទីសាធារណៈនៅកន្លែងធ្វើការ ឬពេលចេញក្រៅផ្ទះជាដើម»។
លោកបញ្ជាក់ថា គ្រប់អង្គភាពទាំងអស់ ចាំការនៅចំណុចព្រំប្រទល់ខេត្តត្រូវបន្តការយកចិត្តទុកដាក់ ត្រួតពិនិត្យគ្រប់អ្នកដំណើរនិ ងការដឹកទំនិញ ដោយតម្រូវឱ្យមានការត្រួតពិនិត្យតាមវិធានការសុខាភិបាលឱ្យបានហ្មត់ចត់ និងប្រាកដប្រជា ដើម្បីរួមចំណែកទប់ស្កាត់ការនាំចូលជំងឺកូវីដ ១៩ ឆ្លងចូលក្នុងសហគមន៍។
រីឯខេត្តកំពង់ធំ រដ្ឋបាលខេត្តសម្រេចបិទទីតាំងមួយចំនួនក្នុងស្រុកបារាយណ៍ ដូចជាតូបលក់បាយ និងយានដ្ឋានជួសជុលរថយន្តក្នុងភូមិទួលដំណាក់ ឃុំចុងដូង និងការដ្ឋានថ្មក្នុងភូមិវាលធំ ឃុំគគីរធំ បន្ទាប់ពីរកឃើញអ្នកវិជ្ជមានកូវីដ ១៩ នៅទីតាំងទាំងនោះ ដើម្បីស្រាវជ្រាវរកអ្នកពាក់ព័ន្ធ និងធ្វើតេស្តរហ័សរកមេរោគកូវីដ។
លិខិតរបស់រដ្ឋបាលខេត្តកំពង់ធំចុះថ្ងៃទី ១៤ កក្កដា សរសេរថា៖ «រដ្ឋបាលខេត្តសូមអំពាវនាវដល់អ្នកដែលធ្លាប់មានការពាក់ព័ន្ធផ្ទាល់នឹងបុគ្គលវិជ្ជមាន ឬធ្លាប់ទៅទីតាំងទាំងអស់ខាងលើ សូមរួសរាន់ទៅផ្តល់សំណាកដើម្បីវិភាគរកមេរោគកូវីដ ១៩ នៅមន្ទីរពេទ្យបង្អែកបារាយណ៍សន្ទុក ឬមណ្ឌលចត្តាឡីស័កវិទ្យាល័យជាស៊ីមកំពង់ថ្ម។ ចំពោះបងប្អូន ដែលធ្លាប់មានការពាក់ព័ន្ធដោយប្រយោល ហើយមានការសង្ស័យ សូមពិនិត្យតាមដានសុខភាព ដោយផ្ទាល់ជាប្រចាំ និងត្រូវសម្រាកនៅផ្ទះដាច់តែឯង»៕
