.jpg)
កិច្ចប្រជុំរវាងមន្ត្រីរដ្ឋាភិបាល និងមន្ត្រី WFP ជុំវិញការដាក់ឱ្យដំណើរការបណ្តាញធុរកិច្ចថ្មីកាលពីថ្ងៃ ១៤ កក្កដា។រូប WFP
ភ្នំពេញៈ រាជរដ្ឋាភិបាលកម្ពុជា និងកម្មវិធីស្បៀងអាហារពិភពលោក (WFP) នៅថ្ងៃទី ១៤ ខែកក្កដា ប្រកាសដាក់ឱ្យដំណើរការនូវបណ្តាញធុរកិច្ចថ្មីមួយដែលប្រមូលចងក្រងអាជីវកម្ម ដើម្បីលើកកម្ពស់អាហារូបត្ថម្ភឱ្យបានកាន់តែប្រសើរឡើងនៅកម្ពុជា ខណៈបញ្ហាកង្វះអាហារូបត្ថម្ភ និងកង្វះមីក្រូសារជាតិនៅតែជាបន្ទុកធ្ងន់មួយ។
សេចក្ដីប្រកាសព័ត៌មានរបស់ WFP ស្ដីពីការប្រកាសដាក់ឱ្យដំណើរការនូវបណ្តាញធុរកិច្ចថ្មីនេះឱ្យដឹងថា គំនិតផ្តួចផ្តើមបង្កើតបណ្តាញធុរកិច្ចនៃចលនាបង្កើនអាហារូបត្ថម្ភនៅកម្ពុជា SUN Business Network Cambodia (SBN Cambodia) នេះ បានប្រមូលផ្ដុំនូវអាជីវកម្មក្នុងវិស័យស្បៀងអាហារដែលមានទស្សនវិស័យវែងឆ្ងាយសម្រាប់អនាគត ដើម្បីពន្លឿនវឌ្ឍនភាព អាហារូបត្ថម្ភនៅទូទាំងប្រទេសកម្ពុជា។
បណ្តាញធុរកិច្ចនេះត្រូវបានបង្កើតឡើងដោយក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ (CARD) ដោយមានការគាំទ្រពី WFP ដើម្បីជំរុញកិច្ចសហការ និងការគាំទ្រគ្នាទៅវិញ-ទៅមក រវាងវិស័យឯកជន សមាគមធុរកិច្ច រដ្ឋាភិបាល សង្គមស៊ីវិល និងដៃគូអភិវឌ្ឍន៍ ដើម្បីចូលរួមចំណែកក្នុងការជំរុញឱ្យមានរបបអាហារសុខភាព និងការអនុវត្តទម្លាប់សុខភាពប្រកបដោយនិរន្តរភាព។
ក្នុងនោះអាជីវកម្មចំនួន ២០ បានចុះឈ្មោះជាមួយបណ្ដាញធុរកិច្ចនេះក្នុងនាមជាសមាជិកស្ថាបនិកនៃចលនាបង្កើនអាហារូបត្ថម្ភនៅកម្ពុជា។
សេចក្ដីប្រកាសព័ត៌មានឱ្យដឹងថា ថ្វីដ្បិតតែសេដ្ឋកិច្ចកម្ពុជាមានកំណើនក្នុងរយៈពេលប៉ុន្មានឆ្នាំចុងក្រោយក៏ដោយ ក៏បញ្ហាកង្វះអាហារូបត្ថម្ភ និងកង្វះមីក្រូសារជាតិនៅតែជាបន្ទុកធ្ងន់មួយ។ កុមារអាយុក្រោម ៥ ឆ្នាំចំនួន ១០% ស្គមស្គាំង និង ៣២% ក្រិសក្រិននៅឆ្នាំ ២០១៤។
លោក សុខ ស៊ីឡូ អគ្គលេខាធិការក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទថ្លែងថា៖ «យើងមានមោទនភាពចំពោះវឌ្ឍនភាពក្នុងអំឡុងទសវត្សរ៍កន្លងមកនេះ ក្នុងការកែលម្អស្ថានភាពអាហារូបត្ថម្ភ ជាពិសេសសម្រាប់កុមារ។ ទោះយ៉ាងណាក៏ដោយនៅមានកិច្ចការជាច្រើនទៀតដែលយើងត្រូវធ្វើ ដើម្បីលុបបំបាត់បញ្ហាអាហារូបត្ថម្ភ»។
លោកបន្តថា អាជីវកម្មក្នុងស្រុកគឺជាតួអង្គដែលមិនអាចខ្វះបានក្នុងការលើកកម្ពស់គុណភាពអាហារសម្រាប់ប្រជាជនកម្ពុជា។ លោកសម្តែងក្តីសង្ឃឹមថា ការបើកឱ្យដំណើរការនូវបណ្តាញធុរកិច្ចនៃចលនាបង្កើនអាហារូបត្ថម្ភនៅកម្ពុជានេះ រួមជាមួយនឹងការគាំទ្រជាបន្តបន្ទាប់ទៅលើវិស័យឯកជននឹងសបញ្ជាក់ឱ្យឃើញច្បាស់នូវសារៈសំខាន់ និងតម្លៃនៃតួនាទីរបស់អាជីវកម្មក្នុងស្រុក។
លោកស្រី ក្លែរ កូណាន់ តំណាងរបស់កម្មវិធីស្បៀងអាហារពិភពលោកប្រចាំនៅកម្ពុជាបានថ្លែងអំណរគុណដល់រាជរដ្ឋាភិបាល ដែលបានបង្កើតនូវបណ្តាញធុរកិច្ចនេះ និងទន្ទឹងរង់ចាំការសហការជាមួយសមាជិកស្ថាបនិកទាំងចាស់ទាំងថ្មីនាពេលអនាគត។
លោកស្រីថ្លែងថា៖ «ពួកយើងជឿជាក់ថា ការកែលម្អសមាសធាតុអាហារូបត្ថម្ភផលិតផលអាហារ គឺជាជម្រើសឈ្នះ-ឈ្នះ សម្រាប់អតិថិជនផង និងសម្រាប់អាជីវកម្មផង។ ពីព្រោះអាជីវកម្មណាដែលផ្តល់នូវអាហារូបត្ថម្ភល្អ នឹងនាំឱ្យអាជីវកម្មនោះមានលក្ខណពិសេសប្លែកពីអាជីវកម្មដទៃ ដូច្នេះនាំឱ្យមានកំណើននៃការលក់ និងប្រាក់ចំណេញ»។
លោក លាង ឡេង ម្ចាស់ផលិតកម្មត្រី និងទឹកស៊ីអ៊ីវ និងជាសមាជិកស្ថាបនិករបស់បណ្ដាញធុរកិច្ច SBN កម្ពុជាថ្លែងថា៖ «ខ្ញុំជឿជាក់ថា បណ្ដាញធុរកិច្ច SBN នឹងបង្កើតនូវគំនិត និងទំនាក់ទំនងថ្មីៗជាច្រើន ក៏ដូចជាអប់រំដល់សាធារណជនអំពីសារៈសំខាន់នៃអាហារូបត្ថម្ភ។ កត្តានេះនឹងបង្កើននូវតម្រូវការខ្ពស់ជាងមុន»។
តាមសេចក្ដីប្រកាសព័ត៌មាន ការបង្កើត បណ្ដាញធុរកិច្ច SBN នៅកម្ពុជា គឺជាព្រឹត្តិការណ៍ជាតិដ៏សំខាន់ក្នុងការគាំទ្រដល់ចលនាបង្កើនអាហារូបត្ថម្ភសកល ដែលមានគោលដៅលុបបំបាត់បញ្ហាអាហារូបត្ថម្ភទូទាំងពិភពលោកត្រឹមឆ្នាំ ២០៣០។ ចលនានេះទទួលស្គាល់នូវតួនាទីដ៏សំខាន់របស់វិស័យឯកជនក្នុងការកែលម្អអាហារូបត្ថម្ភ និងចូលរួមចំណែកដល់ការអភិវឌ្ឍសេដ្ឋកិច្ចប្រកបដោយចីរភាព។
អ្នកចូលរួមបានពិភាក្សាអំពីការចូលរួមរបស់វិស័យឯកជនក្នុងការកាត់បន្ថយបញ្ហាអាហារូបត្ថម្ភ និងលើកកម្ពស់ប្រព័ន្ធស្បៀងប្រកបដោយចីរភាព ដោយអនុវត្តនូវសសរស្តម្ភយុទ្ធសាស្ត្រទាំង ៥ នៃចក្ខុវិស័យរបស់បណ្ដាញធុរកិច្ចនេះ។ សសរស្តម្ភ យុទ្ធសាស្ត្រទាំង ៥ មានដូចជាការបង្កើតឡើងនូវបណ្តាញធុរកិច្ចមួយដ៏រឹងមាំ លើកកម្ពស់ការយល់ដឹង និងតម្រូវការអាហារូបត្ថម្ភ។ បង្កើនការផ្គត់ផ្គង់អាហារ ដែលសម្បូរជីវជាតិ និងអាហារ ដែលមានបញ្ចូលមីក្រូសារជាតិ។ ពង្រឹងបរិយាកាសអំណោយផលសម្រាប់លើកកម្ពស់សុខភាព និងអាហារូបត្ថម្ភនៅក្នុងសហគមន៍ និងនៅកន្លែងធ្វើការ៕
