.jpg)
បុរសសង្ស័យដែលរួមភេទជាមួយក្មេងស្រីអាយុ ១៣ ឆ្នាំ។ រូបថត នគរបាល
បាត់ដំបងៈ នគរបាលប្រឆាំងការជួញដូរមនុស្ស និងការពារអនីតិជន ខេត្តបាត់ដំបងបានបញ្ជូនបុរសម្នាក់ទៅសាលាដំបូងខេត្តនៅរសៀលថ្ងៃ ១៥ កក្កដា បន្ទាប់ពីចាប់ខ្លួនបាននៅថ្ងៃទី ១៣ កក្កដាពាក់ព័ន្ធរួមភេទជាមួយក្មេងស្រីអាយុ ១៣ ឆ្នាំដោយផ្តល់ប្រាក់ ៤០០ បាត ប្រព្រឹត្តនៅឃុំ-ស្រុកកំរៀង ខេត្តបាត់ដំបង។
លោក ប៊ន់ វណ្ណារ៉ា នាយការិយាល័យទទួលផែនការងារនគរបាលប្រឆាំងការជួញដូរមនុស្សនៃស្នងការដ្ឋាននគរបាលខេត្តបាត់ដំបង ប្រាប់នៅថ្ងៃទី ១៥ កក្កដា ថាជនសង្ស័យឈ្មោះ សំរិទ្ធ សុំ អាយុ ៤៩ ឆ្នាំរស់នៅភូមិស្វាយវែង ឃុំកំរៀង ស្រុកកំរៀង មានរបរជាជាងធ្វើលូ ធ្វើបង់សម្រាប់អង្គុយ និងធ្វើព្រះភូមិស៊ីម៉ងត៍។
ចំណែកក្មេងស្រីរងគ្រោះឈ្មោះ ច.ល. ដ អាយុ ១៣ ឆ្នាំ រស់នៅ ឃុំអូរដា ស្រុកកំរៀង ខេត្តបាត់ដំបង។ លោកបានថ្លែងថា៖ «ខាងនគរបាលស្រុកកំរៀង បាននាំខ្លួនជនសង្ស័យមកដល់ការិយាល័យខ្ញុំ (នៅថ្ងៃទី ១៥ កក្កដា) ហើយខ្ញុំបញ្ជូនបន្តទៅតុលាការនៅរសៀលថ្ងៃដដែលនេះដែរ»។
លោកបញ្ជាក់ថា៖ «បើទោះជាក្មេងយល់ព្រមជាមួយជនសង្ស័យក៏ដោយ តែគាត់បានឱ្យលុយក្មេងជាថ្នូរនឹងការរួមភេទ ដូច្នេះនេះគឺជាបទល្មើសទិញពេស្យាចារកុមារហើយ»។
លោក ខាន់ ម៉ៅ នាយផ្នែកនៃអធិការស្រុកកំរៀងបានប្រាប់ឱ្យដឹងតាមបណ្តឹងរបស់ម្តាយក្មេងស្រីរងគ្រោះនៅរសៀលថ្ងៃទី ១៥ កក្កដាថា មុនមានការចាប់ខ្លួនគឺកាលពីថ្ងៃទី ៩ កក្កដា ឆ្នាំ ២០២១ ជនសង្ស័យបានឱ្យបុរសម្នាក់ឈ្មោះ សុខ នៅ អាយុ ៥៦ ឆ្នាំ ឌុបក្មេងស្រីរងគ្រោះទៅផ្ទះរបស់ខ្លួន។
បន្ទាប់ពីឈ្មោះ សុខ នៅ ឌុបក្មេងស្រីរងគ្រោះទៅដាក់មុខផ្ទះជនសង្ស័យ បុរសរូបនោះក៏បានជិះម៉ូតូត្រឡប់ទៅវិញបាត់ ហើយជនសង្ស័យនឹកស្មានថា ឈ្មោះនៅបានឱ្យប្រាក់ទៅក្មេងស្រីរងគ្រោះចំនួន ៤០០ បាតរួចហើយ ក៏រួមភេទជាមួយនាងបានសម្រេចចំនួន ២ ដង ហើយជនសង្ស័យបានឱ្យក្មេងរងគ្រោះត្រឡប់ទៅវិញ។
លោកបន្តថា ដោយសារតែមានការសង្ស័យ ម្តាយក្មេងស្រីរងគ្រោះបានសួរកូន (ក្មេងរងគ្រោះ) ក៏ដឹងថា ឈ្មោះ សំរិទ្ធ សុំ បានលួងលោមកូនស្រីរបស់គាត់ឱ្យប្រាក់ ៤០០ បាត ដើម្បីបានរួមភេទជាមួយនាង។
ក្រោយពីកូនស្រីរៀបរាប់ពីដំណើររឿងអស់ហើយ ម្តាយរបស់ក្មេងស្រីរងគ្រោះបានទៅដាក់ពាក្យបណ្តឹងនៅអធិការដ្ឋាននគរបាលស្រុកកំរៀង។
លោកបន្តទៀតថា ក្រោយពីទទួលបានបណ្តឹងពីម្តាយរបស់ក្មេងរងគ្រោះភ្លាម គឺសមត្ថកិច្ចលោកបានសុំយោបល់ពីលោកអធិការស្រុកកំរៀង និងស្នើសុំគោលការណ៍ពីអយ្យការអមសាលាដំបូងខេត្តបាត់ដំបង ដើម្បីចុះឃាត់ខ្លួនជនសង្ស័យនៅថ្ងៃទី ១៣ កក្កដា ហើយនាំមកអធិការដ្ឋាននគរបាលស្រុកកំរៀង ដើម្បីសាកសួរ។ បើតាមលោក ខាន់ ម៉ៅ ថា៖ «រឿងនេះគាត់សារភាពថា ពិតជាបានរួមភេទជាមួយក្មេងនោះមែន។ គាត់ឱ្យលុយទៅក្មេងរងគ្រោះចំនួន ៤០០ បាត»៕
