ភ្នំពេញៈ ក្រសួងសាធារណការ និងដឹកជញ្ជូននឹងបញ្ជូនឯកសារពាក់ព័ន្ធកម្មវិធីដកពិន្ទុបណ្ណបើកបរ និងពិន័យបទល្មើសចរាចរណ៍ផ្លូវគោកទៅរដ្ឋមន្ត្រីក្រសួងមហាផ្ទៃលោក ស ខេង នៅចុងខែកក្កដានេះ មុនពេលដាក់ឱ្យដំណើរការជាផ្លូវការដែលគ្រោងធ្វើនៅដើមឆ្នាំ ២០២២ ខាងមុខនេះ។
គម្រោងបញ្ជូនឯកសារនេះ បន្ទាប់ពីក្រុមការងារជំនាញនៃក្រសួងសាធារណការ និងដឹកជញ្ជូន និងក្រុមការងារនៃអគ្គស្នងការដ្ឋាននគរបាលជាតិក្រសួងមហាផ្ទៃបានបើកកិច្ចប្រជុំស្តីពីវឌ្ឍនភាពការងារនៃការរៀបចំកម្មវិធីដកពិន្ទុបណ្ណបើកបរ និងពិន័យបទល្មើសចរាចរណ៍ផ្លូវគោកកាលពីថ្ងៃទី ១៤ ខែកក្កដា ឆ្នាំនេះ។
អគ្គនាយកដ្ឋានដឹកជញ្ជូនផ្លូវគោកនៃក្រសួងសាធារណការ និងដឹកជញ្ជូន លោក ឈួន វ៉ន់ បានថ្លែងថា ដៃគូពាក់ព័ន្ធបាននិងកំពុងពន្លឿនការរៀបចំនីតិវិធីអនុវត្តការដកពិន្ទុលើបណ្ណបើកបរតាមរយៈកម្មវិធីទូរស័ព្ទដៃស្មាតហ្វូន ដើម្បីពង្រឹងការអនុវត្តច្បាប់ចរាចរណ៍ផ្លូវគោក។
លោកបានបន្តថា៖ «បច្ចុប្បន្នយើងកំពុងរៀបចំឯកសារពាក់ព័ន្ធ និងតភ្ជាប់ប្រព័ន្ធ ដើម្បីឱ្យកម្មវិធីដកពិន្ទុបណ្ណបើកបរ និងពិន័យបទល្មើសចរាចរណ៍ផ្លូវគោកឱ្យរួចរាល់ មុននឹងរាយការណ៍ជូនសម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកនៅចុងខែកក្កដា ឆ្នាំ ២០២១ និងទិសដៅប្រើប្រាស់ផ្លូវការនៅដើមឆ្នាំ ២០២២។
លោកស្រី លឹម សុខជា ទីប្រឹក្សាជាន់ខ្ពស់អង្គការសម្ព័ន្ធ ដើម្បីសុវត្ថិភាពចរាចរណ៍ផ្លូវគោក (CRY) បានថ្លែងថា ការដាក់ឱ្យដំណើរការកម្មវិធីដកពិន្ទុបណ្ណបើកបរនឹងរួមចំណែកកាត់បន្ថយគ្រោះថ្នាក់ចរាចរណ៍ និងជួយពង្រឹងស្មារតីដល់អ្នកបើកបរនៅតាមដងផ្លូវសាធារណៈ។
លោកស្រីថា៖ «ប្រសិនបើឈានដល់ការអនុវត្តនៅដើមឆ្នាំ ២០២២ វាជាផ្នែក ១ ជំរុញឱ្យមានសុវត្ថិភាពអ្នកបើកបរ ព្រោះអ្នកបើកបរនឹងចាប់ផ្តើមយកចិត្តទុកដាក់ក្នុងការបើកបរដោយប្រយ័ត្នប្រយែង បើគាត់មានកំហុសគាត់នឹងប្រឈមការដកពិន្ទុ ឬអស់ពិន្ទុហើយគាត់ត្រូវចំណាយពេលច្រើន ដើម្បីរៀនសូត្រឡើងវិញ ហើយអ្នកខ្លះនឹងអាចអស់ពិន្ទុដោយស្វ័យប្រវត្តិអ្នកដែលមានកំហុសធំដុំ»។
លោកស្រីបានបន្តថា នៅពេលកម្មវិធីនេះចូលជាធរមានដាក់ឱ្យប្រើប្រាស់ជាផ្លូវការនឹងជួយដាស់ស្មារតីដល់អ្នកបើកបរឱ្យមានការប្រុងប្រយ័ត្នខ្ពស់ ខណៈបច្ចុប្បន្នមានពលរដ្ឋមួយចំនួនខ្វះការប្រុងប្រយ័ត្នទៅលើការបើកបរ។
លោកស្រីថ្លែងថា៖ «នៅបណ្តាប្រទេសអាស៊ាន យើងឃើញថា កិច្ចការនេះគេអនុវត្តរួចហើយ ចំណែកប្រជាពលរដ្ឋយើងភាគច្រើនអត់សូវយកចិត្តទុកដាក់លើរឿងនេះទេភាគច្រើននៅលើដងផ្លូវនៅពេលយើងមានគ្រោះថ្នាក់យើងអត់សូវបានឆែករកបណ្ណបើកបរគាត់ ដូច្នេះបើគេអនុវត្តដកពិន្ទុបណ្ណបើកបរ នោះគាត់នឹងបារម្ភ បើអត់មានបណ្ណ គាត់ម៉េចហ៊ានបើកបរ ហើយគាត់ម៉េចហ៊ានបើកបរលឿនខ្លាចគេដកពិន្ទុ ទាំងនេះវាជួយបន្ថយបញ្ហាគ្រោះថ្នាក់ផ្សេងៗទៀតបាន»។
យ៉ាងណាក៏ដោយ លោកស្រី ស្នើដល់អាជ្ញាធរពាក់ព័ន្ធគួរផ្សព្វផ្សាយពីកម្មវិធីដកពិន្ទុបណ្ណបើកបរឱ្យបានទូលំទូលាយដល់សាធារណជនទូទៅ មុនឈានដល់ការអនុវត្ត ឬផាកពិន័យ។
បើតាមក្រសួងសាធារណការកម្មវិធីដកពិន្ទុបណ្ណបើកបរ និងពិន័យបទល្មើសចរាចរណ៍ផ្លូវគោកអាចចាប់យករូបភាពយានយន្តដែលបើកបរល្មើសច្បាប់ដោយការស្កេនលើបណ្ណបើកបរ ដើម្បីកាត់បន្ថយពិន្ទុចំពោះអ្នកបើកបរយានយន្តខុសច្បាប់ទៅតាមស្ថាននៃបទល្មើសរួមមាន មិនពាក់ខ្សែក្រវាត់សុវត្ថិភាព បើកបរលើសល្បឿនកំណត់ បើកបរក្នុងស្ថានភាពស្រវឹង ផ្ទុកមនុស្សលើសកំណត់ ឬល្មើសភ្លើងសញ្ញា ជាដើម។
យោងតាមច្បាប់ស្តីពីចរាចរណ៍ផ្លូវគោកបានកំណត់ឱ្យគ្រប់បណ្ណបើកបរត្រូវមានពិន្ទុសរុប ១២ ពិន្ទុ ហើយចំនួនពិន្ទុនេះត្រូវកាត់បន្ថយទៅតាមស្ថាននៃការប្រព្រឹត្តបទល្មើសចរាចរណ៍ចាប់ពី ១ ពិន្ទុដល់ ៦ ពិន្ទុ ហើយក្នុងករណីអស់ពិន្ទុ គឺបណ្ណបើកបរនោះត្រូវទុកជាមោឃៈ។
ក្នុងករណីអ្នកបើកបរចង់បានបណ្ណបើកបរថ្មីគឺត្រូវរៀន និងប្រឡងយកបណ្ណបើកបរជាថ្មីឡើងវិញ ក្នុងរយៈពេលយ៉ាងតិច ៦ ខែ គិតចាប់តាំងពីថ្ងៃដែលបណ្ណបើកបរត្រូវទុកជាមោឃៈ៕
វីដេអូ៖