ឧត្តរមានជ័យៈ លោកឧត្តមសេនីយ៍ឯក ហ៊ុន ម៉ាណែត មេបញ្ជាការកងទ័ពជើងគោកកាលពីម្សិលមិញបានចុះពិនិត្យទីតាំង ដើម្បីរៀបចំជាមណ្ឌលព្យាបាលជំងឺកូវីដ ១៩ កម្រិតស្រាល និងមន្ទីរពេទ្យព្យាបាលកម្រិតធ្ងន់ នៅខេត្តឧត្តរមានជ័យ សម្រាប់បងប្អូនប្រជាពលរដ្ឋខ្មែរដែលវិលត្រលប់ពីប្រទេសថៃ។
ការចុះពិនិត្យទីតាំងនេះស្របពេលដែលខេត្តឧត្តរមានជ័យ គឺជាច្រកព្រំដែនអន្តរជាតិមួយ ដែលមានពលករខ្មែរវិលត្រឡប់ពីប្រទេសថៃមកស្រុកកំណើតវិញមានចំនួនច្រើន គួរឱ្យព្រួយបារម្ភដោយក្នុងមួយថ្ងៃចន្លោះពី ២០០ ទៅ៤០០ នាក់។
ជាមួយគ្នានេះដែរ លោក ហ៊ុន ម៉ានិត ប្រធានអនុគណៈកម្មការគ្រប់គ្រងច្រកទ្វារចេញ-ចូលប្រទេសរួមនឹងលោក ប៉ែន កុសល្យ អភិបាលខេត្តឧត្ដរមានជ័យកាលពីថ្ងៃទី ១៣ ខែកក្កដា បានចុះពិនិត្យ ទីតាំងមណ្ឌលចត្តាឡីស័កពហុកីឡដ្ឋានខេត្ត និងត្រៀមពង្រីកមណ្ឌលចត្តាឡីស័កចំនួន ២ បន្ថែមទៀត។
សូមជម្រាបជូនថា គិតត្រឹមថ្ងៃទី ១៥ ខែកក្កដានេះ ខេត្តឧត្តរមានជ័យមានអ្នកជំងឺកូវីដ ១៩ សរុបចំនួន ២ ៣១៩ នាក់ ករណីនាំចូលពីបរទេសចំនួន ២ ១៥៧ នាក់ និងករណីពាក់ព័ន្ធព្រឹត្តិការណ៍ “សហគមន៍ ២០ កុម្ភៈ” ចំនួន ១៦២ នាក់ បានព្យាបាលជាសះស្បើយចំនួន ៤៩០ នាក់ ករណីស្លាប់ចំនួន ៦ នាក់ និងកំពុងសម្រាកព្យាបាលចំនួន ១ ៨២៣ នាក់។
ដោយឡែក ចំនួនពលករចំណាកស្រុកពីប្រទេសថៃ តាមច្រកអន្តរជាតិខេត្តឧត្តរមានជ័យនៅថ្ងៃទី ១៥ ខែកក្កដាមានចំនួន ១៧៧ នាក់ក្នុងនោះស្រី ៧៥ នាក់៕