ព្រៃវែងៈ រដ្ឋបាលខេត្តព្រៃវែង បានសម្រេចបិទខ្ទប់ភូមិ ព្រៃស្ទរ ឃុំស្មោងជើង ស្រុកកំចាយមារ ជាបណ្ដោះអាសន្ន រយៈពេល ១៤ថ្ងៃ ចាប់ពីថ្ងៃទី១៥ ខែកក្កដា រហូតដល់ថ្ងៃទី២៨ ខែកក្កដា ឆ្នាំ ២០២១ ក្រោយរកឃើញករណីឆ្លងជំងឺកូវីដ១៩ ច្រើន ចូលក្នុងភូមិនេះ។
សេចក្តីជូនដំណឹងចុះហត្ថលេខាដោយលោក ជា សុមេធី អភិបាលខេត្តព្រៃវែង បានឱ្យដឹងថា កាលពីថ្ងៃទី១០ ខែកក្កដា មានកម្មកររោងចក្រកាត់ដេរ អរិន មេនូហ្វេកធឺរីង (ខ្មែរ) ឆ្លងជំងឺកូវីដ ១៩ និងបានឆ្លងចូលក្នុងសហគមន៍ក្នុងស្រុកកំចាយមារ ដែលអាជ្ញាធរ ឃុំ ស្រុក កំពុងស្រាវជ្រាវរកអ្នកពាក់ព័ន្ធផ្ទាល់ និងប្រយោល ចាត់វិធានការណ៍ទប់ស្កាត់កុំឱ្យមានការឆ្លងរាលដាល។
ដោយឡែក ចំពោះភូមិព្រៃស្ទរ ឃុំស្មោងជើង មានចំនួនប្រជាពលរដ្ឋឆ្លងជំងឺកូវីដ ១៩ ច្រើនគួរឱ្យកត់សម្គាល់ ដែលតម្រូវអាជ្ញាធរ និងជំនាញពាក់ព័ន្ធត្រូវចាត់វិធានការជាបន្ទាន់។
សេចក្តីជូនដំណឹងបន្តថា វិធានការបិទខ្ទប់នេះ ដើម្បីបង្ការទប់ស្កាត់ និងកាត់ផ្តាច់នូវការចម្លងនៃជំងឺកូវីដ ១៩ ពីសហគមន៍មួយទៅសហគមន៍មួយទៀត ក៏ដូចជាដើម្បីការពារអាយុជីវិតប្រជាពលរដ្ឋ សុខភាពសាធារណៈ និងសណ្តាប់ធ្នាប់សង្គម៕