ភ្នំពេញៈ ស្ថានបេសកកម្មអចិន្ត្រៃយ៍នៃព្រះរាជាណាចក្រកម្ពុជា ប្រចាំអង្គការសហប្រជាជាតិ និងអង្គការអន្តរជាតិនានានៅទីក្រុងហ្សឺណែវបានបង្ហាញអំពីសមិទ្ធផល និងវឌ្ឍនភាពរបស់កម្ពុជាក្នុងវិស័យសិទ្ធិមនុស្ស នៅក្នុងកិច្ចប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិ។
សេចក្តីប្រកាសព័ត៌មានរបស់ស្ថានបេសកកម្មអចិន្ត្រៃយ៍នៃព្រះរាជាណាចក្រកម្ពុជា ប្រចាំអង្គការសហប្រជាជាតិបានឱ្យដឹងថា អំឡុងពេលចូលរួមកិច្ចប្រជុំរយៈពេល ៤ សប្តាហ៍នេះចាប់ពីថ្ងៃទី ២១ ខែមិថុនា ដល់ថ្ងៃទី ១៤ ខែកក្កដា ឆ្នាំ ២០២១ ស្ថានបេសកកម្មអចិន្ត្រៃយ៍កម្ពុជា ប្រចាំអង្គការសហប្រជាជាតិ បានចូលរួមថ្លែងបទអន្តរាគមន៍ចំនួន ១៧ លើក ដោយបានលើកបង្ហាញអំពីសមិទ្ធផល និងវឌ្ឍនភាពក្នុងទិដ្ឋភាពច្បាប់ គោលនយោបាយ និងការអនុវត្តជាក់ស្ដែងនានារបស់កម្ពុជាក្នុងវិស័យសិទ្ធិមនុស្ស។
នៅក្នុងអង្គប្រជុំតំណាងអចិន្ត្រៃយ៍កម្ពុជាបានលើកឡើងពីសមិទ្ធផលជាច្រើន ពាក់ព័ន្ធវិស័យសិទ្ធិមនុស្ស រួមមានការការគ្រប់គ្រងជំងឺកូវីដ ១៩ វិស័យសុខាភិបាល សិទ្ធិសេរីភាពក្នុងការបញ្ចេញមតិ ការអប់រំ និងការកាត់ទោស ចំពោះអ្នកជួញដូរគ្រឿងញៀនជាដើម។
តំណាងអចិន្ត្រៃយ៍កម្ពុជាបានថ្លែងថា ក្នុងអំឡុងពេលនៃវិបត្តិកូវីដ ១៩ គ្មាននរណាម្នាក់អាចមានសុវត្ថិភាពបានទេ លុះត្រាតែមនុស្សគ្រប់គ្នាមានសុវត្ថិភាព។
វ៉ាក់សាំងកូវីដ ១៩ ត្រូវតែជាទំនិញសាធារណៈសកល ដែលត្រូវចែកចាយក្នុងស្មារតីមនុស្សធម៌ដល់ប្រទេសទាំងអស់។
តំណាងអចិន្ត្រៃយ៍កម្ពុជាបានបញ្ជាក់ថា៖ «កម្មវិធីចាក់វ៉ាក់សាំងថ្នាក់ជាតិ ដោយឥតគិតថ្លៃនៅកម្ពុជារួមទាំងសម្រាប់ជនបរទេសផងដែរនោះ សម្រេចបានជាង ៥២% នៃប្រជាជនគោលដៅគិតត្រឹមថ្ងៃទី ១៤ ខែកក្កដា ឆ្នាំ ២០២១»។
តំណាងអចិន្ត្រៃយ៍កម្ពុជាបន្តថា ដើម្បីទ្រទ្រង់ដល់ជីវភាពគ្រួសារ ដែលរងគ្រោះខ្លាំងបំផុត រាជរដ្ឋាភិបាលកម្ពុជាបានដាក់ចេញកម្មវិធីផ្ទេរសាច់ប្រាក់សម្រាប់គ្រួសារក្រីក្រតាមរយៈប្រព័ន្ធឌីជីថល ដោយផ្អែកលើគោលការណ៍សមធម៌ សមភាព និងប្រសិទ្ធភាព។
«កញ្ចប់គាំពារសង្គមជាច្រើនទៀតកំពុងតែត្រូវបានអនុវត្ត ដើម្បីជួយសម្រួលដល់គ្រួសារដែលរងផលប៉ះពាល់នៅក្នុងតំបន់បិទខ្ទប់»។
ទាក់ទងនឹងសិទ្ធិទទួលបានលំនៅឋាន កម្ពុជាបានដាក់ចេញនូវគោលនយោបាយដីធ្លីគ្រប់ជ្រុងជ្រោយ ដូចជា ដីសម្បទានសង្គមកិច្ច ការបែងចែកដីធ្លីសម្រាប់ការអភិវឌ្ឍសង្គមនិង សេដ្ឋកិច្ច ការចុះបញ្ជីដីធ្លីជាប្រព័ន្ធ និងការចុះបញ្ជីដីសហគមន៍ជនជាតិដើមភាគតិច ក្នុងគោលបំណងលើកកម្ពស់លទ្ធភាពរបស់ប្រជាជនក្នុងការទទួលបានដី និងលំនៅឋាន ប្រកបដោយចីរភាព និងទំនួលខុសត្រូវសង្គម។
ជាមួយគ្នានេះ ស្ថានបេសកកម្មកម្ពុជាក៏បានលើកឡើងពីអត្រាជំងឺហង់សិន ឬឃ្លង់ មានកម្រិតទាបនៅប្រទេសកម្ពុជាផងដែរ ដោយការលុបបំបាត់ជំងឺនេះ នៅតែជាអាទិភាពរបស់រាជរដ្ឋាភិបាល។
មជ្ឈមណ្ឌលជាតិកម្ចាត់រោគរបង និងហង់សិនបាននិងកំពុងធ្វើការយ៉ាងជិតស្និទ្ធជាមួយភាគីពាក់ព័ន្ធ ដើម្បីព្យាបាលអ្នកជំងឺ ដោយមិនគិតថ្លៃ ជាមួយនឹងវឌ្ឍនភាពគួរឱ្យកត់សម្គាល់។
ជារដ្ឋភាគីនៃអនុសញ្ញាស្តីពី “ការលុបបំបាត់រាល់ទម្រង់នៃការរើសអើងស្ត្រីភេទ" (CEDAW) កម្ពុជាប្ដេជ្ញាលុបបំបាត់ការរើសអើងប្រឆាំងស្ត្រី និងក្មេងស្រី តាមរយៈការដាក់ចេញនូវក្របខ័ណ្ឌគាំពារសង្គមជាច្រើន ក៏ដូចជាការផ្តល់ជូនសេវាសុខភាពផ្លូវភេទ និងបន្តពូជនៅតាមកន្លែងជាច្រើន ដល់ស្ត្រី។ ដើម្បីសម្រេចគោលដៅអភិវឌ្ឍន៍ប្រកបដោយចីរភាព (SDGs) កម្ពុជាផ្តល់សារៈសំខាន់យ៉ាងខ្លាំងដល់ការលុបបំបាត់រាល់អំពើហិង្សាលើស្ត្រី និងកុមារី រួមទាំងការរំលោភសេពសន្ថវៈ។
ស្ថានបេសកកម្មអចិន្ត្រៃយ៍កម្ពុជាបានបន្តទៀតថា នៅកម្ពុជា អ្នកជួញដូរគ្រឿងញៀនត្រូវប្រឈមនឹងបទចោទ ប៉ុន្តែមិនត្រូវបានផ្តន្ទាទោសប្រហារជីវិតនោះទេ។
អ្នកប្រើប្រាស់គ្រឿងញៀនគឺជាជនរងគ្រោះ ដែលអាចទទួលបានការព្យាបាល ការប្រឹក្សាយោបល់ផ្លូវចិត្ត និងការបណ្តុះបណ្តាលវិជ្ជាជីវៈ ដោយស្ម័គ្រចិត្តនៅ មជ្ឈមណ្ឌលបន្សាប និងស្តារនីតិសម្បទា និងនៅមណ្ឌលសុខភាព។
ក្រៅពីនេះ ស្ថានបេសកកម្មអចិន្ត្រៃយ៍កម្ពុជាបានគូសបញ្ជាក់ថា៖ «ការធ្វើបាតុកម្មខុសច្បាប់ ឬបាតុកម្មស៊ីឈ្នួលដែលដាក់សម្ពាធលើប្រព័ន្ធតុលាការ ឬរំខានដល់សណ្តាប់ធ្នាប់សាធារណៈ ពុំមែនជាការអនុវត្ត សិទ្ធិសេរីភាពប្រមូលផ្ដុំដោយសន្តិវិធី ដូចមានចែងក្នុងរដ្ឋធម្មនុញ្ញឡើយ»។
ចំពោះសិទ្ធិទទួលបានការអប់រំ តំណាងអចិន្ត្រៃយ៍កម្ពុជាបានគូសបញ្ជាក់ថា ទោះបីជាជំងឺរាតត្បាតកូវីដ ១៩ បានរំខានដល់វិស័យអប់រំក៏ដោយ កម្ពុជាបានធានានូវការបន្តការសិក្សាអប់រំនៅតាមប្រព័ន្ធអនឡាញ។ «កម្ពុជាត្រូវបានអង្គការយូណេស្កូ កោតសរសើរថា ជាប្រទេសមួយក្នុងចំណោម ១៧ ប្រទេស ក្នុងពិភពលោក ដែលបានផ្ដល់អាទិភាពក្នុងការចាក់វ៉ាក់សាំងជូនដល់គ្រូបង្រៀន»។
តាមរយៈសេចក្តីប្រកាសព័ត៌មាននេះក្នុងអំឡុងសម័យប្រជុំលើកទី ៤៧ នៃក្រុមប្រឹក្សាសិទ្ធិមនុស្សអង្គការសហប្រជាជាតិ កម្ពុជាបានចូលរួមគាំទ្រ (co sponsor) សេចក្តីថ្លែងការណ៍រួមចំនួន ១១ ការសម្រេចចិត្ត (Decision) ចំនួន ០១ និងសេចក្តី សម្រេចចិត្ត (Resolution) ចំនួន ០៣ លើប្រធានបទជាច្រើនក្នុងវិស័យសិទ្ធិមនុស្ស ដូចជាសិទ្ធិ មនុស្សចាស់ សិទ្ធិជនទេសន្តរប្រវេសន៍ ការបែងចែកវ៉ាក់សាំងដោយយុត្តិធម៌ និងសមធម៌ កិច្ចសហប្រតិបត្តិការអន្តរជាតិលើវិស័យសិទ្ធិមនុស្ស ការរើសអើងជាតិសាសន៍ជាប្រព័ន្ធ ជំងឺហង់សិនការពង្រឹងការចងក្រងឯកសារនៅក្រុមប្រឹក្សាសិទ្ធិមនុស្ស ទំនាក់ទំនងរវាងការអភិវឌ្ឍ និងសិទ្ធិមនុស្សជាដើម៕