ស្ទឹងត្រែងៈ អភិបាលខេត្តស្ទឹងត្រែងលោក ម៉ុម សារឿន អនុញ្ញាតឲ្យដំណើរការឡើងវិញនូវសកម្មភាពលក់ដូររបស់អាជីវករផ្នែកខាងក្នុង “ផ្សារសាមគ្គី ស្ទឹងត្រែង” ស្ថិតនៅភូមិត្រពាំងព្រីង សង្កាត់ស្ទឹងត្រែង ក្រុងស្ទឹងត្រែង ចាប់ពីថ្ងៃទី ១៩ ខែកក្កដា ឆ្នាំ ២០២១ តទៅ។
សេចក្តីជូនដំណឹងលោក ម៉ុម សារឿន ចុះថ្ងៃទី ១៦ ខែកក្កដានេះ បានឱ្យដឹងថា អំឡុងពេលបើកផ្សារឡើងវិញនេះ ដើម្បីពង្រឹងប្រសិទ្ធភាពការគ្រប់គ្រងសណ្តាប់ធ្នាប់ របៀបរៀបរយលក់ដូរ និងការទប់ស្កាត់ បង្ការ ការពារទៅនឹងការឆ្លងរាលដាលនៃជំងឺកូវីដ ១៩ នៅផ្សារសាមគ្គីស្ទឹងត្រែង និងក្នុងមូលដ្ឋានខេត្ត អាជ្ញាធរមានសមត្ថកិច្ចនៃរដ្ឋបាលក្រុងស្ទឹងត្រែង ផ្នែកជំនាញមានសមត្ថកិច្ច គណៈអាជីវករផ្សារ និងផ្នែកពាក់ព័ន្ធត្រូវចាត់ចែងអនុវត្តវិធានការឱ្យបានខ្ជាប់ខ្ជួន។
សេចក្តីជូនដំណឹងបន្តថា៖ «ត្រូវអនុវត្តវិធានការសុខាភិបាល ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ ឲ្យបានខ្ជាប់ខ្ជួន និងមានប្រសិទ្ធភាពខ្ពស់ ធានាគ្រប់គ្រងសន្តិសុខ សណ្តាប់ធ្នាប់ របៀបរៀបរយក្នុងផ្សារ និងជុំវិញផ្សារ ឲ្យបានល្អប្រសើរ បញ្ចៀសបាននូវបញ្ហានៃការកកស្ទះចរាចរណ៍ធ្វើដំណើរចេញចូលទៅមករបស់ប្រជាពលរដ្ឋ»។
សេចក្តីជូនដំណឹងបន្តថា៖ «គណៈអាជីវករផ្សារត្រូវសហការជាមួយមន្ទីរជំនាញរៀបចំឲ្យមានការបាញ់ថ្នាំសម្លាប់មេរោគ ដើម្បីរួមចំណែកបង្ការ ការឆ្លងរាលដាលនៃជំងឺកូវីដ ១៩»។
អាជ្ញាធរមូលដ្ឋានត្រូវណែនាំដល់អាជីវករទាំងអស់ឱ្យតាមដានសុខភាពជាប់ជាប្រចាំក្នុងករណីសង្ស័យ មានការប៉ះពាល់ ឬពាក់ព័ន្ធនឹងជំងឺកូវីដ ១៩ ត្រូវពិនិត្យសំណាកវត្ថុវិភាគឲ្យបានទាន់ពេលវេលា ឬ/និង អនុវត្តវិធានការចត្តាឡីស័កឲ្យបានត្រឹមត្រូវតាមគោលការណ៍កំណត់ជាធរមាន។
ក្នុងករណីចាំបាច់ គណៈអាជីវករផ្សារ និងអាជ្ញាធរមានសមត្ថកិច្ចអាចជូនដំណឹង និងស្នើសុំ អនុវត្តវិធានការផ្សេងទៀតតាមការជាក់ស្ដែង។
សូមជម្រាបថា ផ្សារសាមគ្គីស្ទឹងត្រែងស្ថិតនៅភូមិត្រពាំងព្រីង សង្កាត់ស្ទឹងត្រែង ក្រុងស្ទឹងត្រែងត្រូវបានផ្អាកសកម្មភាពលក់ដូរកាលពីថ្ងៃទី ២៦ ខែមិថុនា ឆ្នាំ ២០២១៕