.jpg)
លោក ឌុច សុវណ្ណារី រដ្ឋលេខាធិការក្រសួងទំនាក់ទំនងរដ្ឋសភា-ព្រឹទ្ធសភា និងអធិការកិច្ច ថ្លែងនាពេលកន្លងទៅ។ រូបថត រដ្ឋបាលខេត្តកំពង់ធំ
ភ្នំពេញ៖ លោកនាយករដ្ឋមន្រ្តី ហ៊ុន សែន បានប្រកាសពីការដកតំណែង លោក ឌុច សុវណ្ណារី រដ្ឋលេខាធិការក្រសួងទំនាក់ទំនងរដ្ឋសភា-ព្រឹទ្ធសភា និងអធិការកិច្ច ក្រោយពីមន្ត្រីរូបនេះ បានបង្ហោះសារផ្ចាញ់ផ្ចាលមន្រ្តីជាន់ខ្ពស់មួយរូប ដែលទើបតែបានទទួលមរភាព។
លោកនាយករដ្ឋមន្រ្តី បានបង្ហោះសារលើបណ្តាញសង្គមហ្វេសប៊ុករបស់លោកនៅថ្ងៃទី ១៦ ខែកក្កដានេះថា៖ «ខ្ញុំបានចូលរួមរំលែកទុក្ខតាមរយៈលោកជំទាវ ម៉ែន សំអន ចំពោះមរណភាព បង ហុង ថែម ដែលជាមន្ត្រីមួយរូប បានរួមចំណែកកសាងប្រទេសតាំងពីបាតដៃទទេនាឆ្នាំ ១៩៧៩»។
លោកបន្តថា៖ «ខ្ញុំមិននឹកស្មានដល់សោះថា ខ្ញុំមានមន្ត្រីមួយរូប ថ្នាក់រដ្ឋលេខាធិការបង្ហោះសារផ្ចាញ់ផ្ចាលចំពោះសព សូម្បីតែលោកជំទាវ ម៉ែន សំអន សុំឱ្យដកចេញក៏មិនព្រមដកដែរ»។
លោក ហ៊ុន សែន បញ្ជាក់ថា៖ «ខ្ញុំមិនអាចទុក លោក ឌុច សុវណ្ណារី ឱ្យនៅជារដ្ឋលេខាធិការក្រសួងបានតទៅទៀតទេ គឺត្រូវដកចេញពីតំណែង ព្រោះលោកមិនស័ក្ដិសមជាមន្ត្រីដឹកនាំទៀតដោយខ្វះគុណធម៌»។
ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា លោកស្រី ម៉ែន សំអន បានចូលរួមបុណ្យសពលោក ហុង ថែម ស្ថិតក្នុងខណ្ឌទួលគោក រាជធានីភ្នំពេញ នាព្រឹកថ្ងៃព្រហស្បតិ៍ ទី ១៥ ខែ កក្កដា ឆ្នាំ ២០២១។
នៅលើទំព័រហ្វេសប៊ុករបស់លោកស្រី ម៉ែន សំអន បានបង្ហោះសារថា៖ «ឯកឧត្តម ហុង ថែម ទីប្រឹក្សាក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ឋានៈស្មើរដ្ឋលេខាធិការ ដែលបានទទួលមរណៈភាពកាលពីថ្ងៃទី ១៤ ខែ កក្កដា ឆ្នាំ ២០២១ ក្នុងជន្មាយុ ៨៦ ឆ្នាំ ដោយជរាពាធ»។
លោកស្រីបន្តថា មរណភាពរបស់លោក ហុង ថែម គឺជាការបាត់បង់នូវថ្នាក់ដឹកនាំប្រកបដោយចំណេះដឹង បទពិសោធន៍ ដែលបានរួមចំណែកក្នុងការកសាងស្ថាប័ន បម្រើជាតិ មាតុភូមិ រហូតសម្រេចបាននូវស្នាដៃជាច្រើនក្នុងក្របខ័ណ្ឌការងារជំនាញជាបន្តបន្ទាប់៕
វីដេអូ៖
