ភ្នំពេញៈ យោងតាមការបង្ហាញនៅក្នុងគោលការណ៍ណែនាំទូទៅស្តីពីការគ្រប់គ្រង និងប្រើប្រាស់ តេស្តរហ័សរកអង់ទីហ្សែនកូវីដ ១៩ ដែលរាជរដ្ឋាភិបាលសម្រេចដាក់ឱ្យប្រើប្រាស់ កាលពីថ្ងៃទី ១៥ ខែកក្កដា បានឱ្យដឹងថា តាមការប៉ាន់ស្មាន ក្នុងខែមិថុនា ឆ្នាំ ២០២១ នេះ នៅទូទាំងប្រទេសកម្ពុជា ការប្រើប្រាស់តេស្តរហ័សរកអង់ទីហ្សែនកូវីដ ១៩ មានប្រមាណ ៦០% នៃចំនួនតេស្តដែលបានធ្វើសរុប។
យោងតាមទិន្នន័យរបស់វិទ្យាស្ថានជាតិសុខភាពសាធារណៈ ចំនួនអ្នកផ្ទុកមេរោគកូវីដ១៩ ដែលបានរកឃើញតាមរយៈការប្រើប្រាស់តេស្តរហ័ស រកអង់ទីហ្សែនកូវីដ ១៩ មានប្រមាណ ៧៥% នៃចំនួនករណី វិជ្ជមានសរុបដែលត្រូវបានរកឃើញក្នុងខែមិថុនា ឆ្នាំ ២០២១ កន្លងមកនេះ។
ទិន្នន័យនេះបង្ហាញថា ការប្រើប្រាស់ តេស្តរហ័សរកអង់ទីនហ្សែនកូវីដ ១៩ មានសមត្ថភាពអាចជួយចែករំលែក បន្ទុករបស់ម៉ាស៊ីនតេស្ត PCR ក្នុងការកំណត់រុករកអ្នកផ្ទុកមេរោគកូវីដ ១៩ ដែលជាកាលានុវត្តភាពថ្មីមួយបន្ថែមទៀត ក្នុងការកាត់បន្ថយការឆ្លងរាលដាលនៃជំងឺកូវីដ១៩ នៅក្នុងសហគមន៍ នាពេលបច្ចុប្បន្ន។
តេស្តរហ័សរកអង់ទីហ្សែនកូវីដ ១៩ គឺជាប្រភេទតេស្តមួយ ដែលអាចផ្តល់លទ្ធផលអំពីវត្តមាន មេរោគកូវីដ ១៩ ចំពោះអ្នកជំងឺដែលគ្មានរោគសញ្ញា និងមានបរិមាណមេរោគកូវីដ១៩ ក្នុងកម្រិតខ្ពស់ ផ្ទុកក្នុងខ្លួន ហើយលទ្ធភាពនៃការចម្លងពីអ្នកផ្ទុកមេរោគកូវីដ ១៩ នោះ ទៅបុគ្គលផ្សេងទៀត កំពុងតែខ្លាំងក្លា (ជាទូទៅ នៅចន្លោះពី ០១ ទៅ ០៣ ថ្ងៃមុនចេញរោគសញ្ញា និងក្នុងអំឡុងពេល ០៥ ទៅ ០៧ ថ្ងៃដំបូងបន្ទាប់ពីចេញរោគសញ្ញា)។
បន្ថែមពីលើនេះ លទ្ធផលនៃតេស្តនេះ នឹងត្រូវបានបង្ហាញក្នុងរយៈពេលដ៏ខ្លីពី ១៥ ទៅ ៣០ នាទី អាស្រ័យលើប្រភេទផលិតផលតេស្ត និងមិនតម្រូវឱ្យមានអ្នកជំនាញ ឬការធ្វើតេស្តនៅមន្ទីរ ពិសោធន៍ឡើយ។
ទោះជាយ៉ាងនេះក្តី ឧបករណ៍តេស្គរហ័សទាំងនេះ មិនមានភាពត្រឹមត្រូវ (Accuracy Rate) ខ្ពស់ ដូចការធ្វើតេស្ត PCR នោះទេ។
យោងតាមអនុសាសន៍របស់អង្គការសុខភាពពិភពលោក ជាទូទៅ ឧបករណ៍តេស្តរហ័ស ដែលអាចយកមកប្រើប្រាស់បាន ត្រូវមានអត្រាកំណត់ភាពជាក់លាក់ (Specificity) យ៉ាងតិច ៩៧% (មានសមត្ថភាពកំណត់ករណីអវិជ្ជមានពិត យ៉ាងតិច ៩៧%) និងអត្រាកំណត់ភាព រំញោច (Sensitivity) យ៉ាងតិច ៨០% (មានសមត្ថភាពផ្តល់លទ្ធផលវិជ្ជមានពិត យ៉ាងតិច ៨០%) ។
អត្រាកំណត់ភាពរំញោចត្រឹម ៨០% នេះមានន័យថា ឧបករណ៍តេស្តរហ័សទាំងនេះ អាចមើលរំលងករណីវិជ្ជមានពិតប្រាកដ ចំនួនប្រមាណ ២០ % ដែលអាស្រ័យទៅលើកត្តាមួយចំនួន ដូចជា៖ រយៈពេលនៃការឆ្លងរាលដាលនៃជំងឺកូវីដ១៩, កំហាប់មេរោគនៅក្នុងសំណាក, គុណភាព និងភាពត្រឹមត្រូវ នៃការយកសំណាក, អង្គធាតុមេរោគនៃសំណាក, និងប្រសិទ្ធភាពនៃឧបករណ៍តេស្តរហ័ស៕