.jpg)
គ.ជ.ប. បិទបញ្ជីឈ្មោះសម្រាប់បោះឆ្នោត ជ្រើសរើសក្រុមប្រឹក្សាក្រុងបូកគោ នាពេលកន្លងទៅ។ រូបថត គ.ជ.ប
កំពត៖ យុទ្ធនាការឃោសនាបោះឆ្នោតជ្រើសរើសក្រុមប្រឹក្សាក្រុងបូកគោ នៃខេត្តកំពត នាថ្ងៃដំបូង មានគណបក្សនយោបាយចំនួន ២ ក្នុងចំណោមគណបក្សនយោបាយទាំង ៤ ដែលបានចេញធ្វើសកម្មភាពឃោសនាស្វែងរកសំឡេងឆ្នោត។ នេះបើតាម គណៈកម្មាធិការជាតិរៀបចំការបោះឆ្នោត ។
សេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោតចុះថ្ងៃទី ១៦ ខែកក្កដានេះ បានឱ្យដឹងថា ថ្ងៃទី ១ នៃការឃោសនាបោះឆ្នោតជ្រើសរើសក្រុមប្រឹក្សាក្រុងបូកគោ នៃខេត្តកំពត មានគណបក្សចំនួន ២ បានចេញធ្វើយុទ្ធនាការឃោសនាបោះឆ្នោតរួមមាន គណបក្សប្រជាជនកម្ពុជា មានអ្នកចូលរួម ២០០ នាក់ មានរថយន្តចំនួន ៧០ គ្រឿង និងម៉ូតូ ចំនួន ៣០ គ្រឿង។
ចំណែក គណបក្សសញ្ជាតិកម្ពុជាមានអ្នកចូលរួមសរុបចំនួន ២០ នាក់ មានរថយន្តចំនួន ២ គ្រឿង និងម៉ូតូចំនួន ៥ គ្រឿង។
ប្រធានគណៈកម្មការរៀបចំការបោះឆ្នោតខេត្តកំពត លោក តែ ជិនណារិទ្ធ ដែលបានចូលរួមឃ្លាំមើលសកម្មភាពឃោសនានៅថ្ងៃនេះបានឱ្យដឹងថា អ្នកចូលរួមក្នុងយុទ្ធនាការឃោសនាបោះឆ្នោតបានអនុវត្ត និងគោរពតាមវិធានការបង្ការការឆ្លងរាលដាលនៃជំងឺកូវីដ ១៩ តាមសេចក្ដីណែនាំរបស់ក្រសួងសុខាភិបាលបានយ៉ាងល្អ។
លោកបានបន្តថា៖ «សកម្មភាពឃោសនាប្រព្រឹត្តទៅដោយរលូន មានសណ្តាប់ធ្នាប់ និងបានទៅដល់គោលដៅដែលបានកំណត់ដោយសន្តិវិធី»។
ការឃោសនាបោះឆ្នោតមានរយៈពេល ៨ ថ្ងៃ គឺចាប់ផ្តើមពីថ្ងៃទី ១៦ ដល់ថ្ងៃទី ២១ ខែ កក្កដា ឆ្នាំ ២០២១ ចាប់ពីម៉ោង ៦:០០ ព្រឹក ដល់ម៉ោង ១០:០០ យប់ ហើយគ្រប់សកម្មភាពឃោសនាបោះឆ្នោតត្រូវបញ្ចប់ ២៤ ម៉ោង មុនថ្ងៃបោះឆ្នោត។
សូមជម្រាបថា ការបោះឆ្នោតជ្រើសរើសក្រុមប្រឹក្សាក្រុងបូកគោ នៃខេត្តកំពត មានគណបក្សនយោបាយចំនួន ៤ ដែលនឹងចូលរួមប្រកួតប្រជែងរួមមានគណបក្សប្រជាជនកម្ពុជា គណបក្សសញ្ជាតិកម្ពុជា គណបក្សយុវជនកម្ពុជា និងគណបក្សហ៊្វុនស៊ិនប៉ិច៕
