.jpg)
ទណ្ឌិតចូលរួមក្នុងកិច្ចប្រជុំ នាពេលកន្លងទៅ។ រូបថត ក្រសួងយុត្តិធម៌
ភ្នំពេញ៖ ក្រសួងយុត្តិធម៌បានដាក់ឱ្យអនុវត្តប្រកាសស្តីពីបែបបទនៃការឃ្លាំមើលតាមដាន ការត្រួតពិនិត្យ និងការបញ្ចូលទៅក្នុងសង្គមវិញ នៃទណ្ឌិតដែលត្រូវបានដោះលែងដោយមានលក្ខខណ្ឌក្នុងគោលបំណង ដើម្បីធានាការអនុវត្ត និងការដោះលែងដោយមានលក្ខខណ្ឌឱ្យមានប្រសិទ្ធភាព សំដៅធ្វើសមាហរណកម្មទណ្ឌិតនោះឱ្យចូលទៅរួមរស់នៅក្នុងសង្គមវិញ។
ប្រកាសស្តីពីបែបបទនៃការឃ្លាំមើលតាមដាន ការត្រួតពិនិត្យ និងការបញ្ចូលទៅក្នុងសង្គមវិញនៃទណ្ឌិតដែលត្រូវបានដោះលែងដោយមានលក្ខខណ្ឌរបស់ក្រសួងយុត្តិធម៌ចុះថ្ងៃទី ១៦ ខែកក្កដានេះ បានឱ្យដឹងថា ការដោះលែងដោយមានលក្ខខណ្ឌ គឺជាសមត្ថកិច្ចរបស់ប្រធានសាលាដំបូងនៃទីកន្លែងឃុំខ្លួនទណ្ឌិត។
ប្រធានសាលាដំបូង សម្រេចអំពីការដោះលែងដោយមានលក្ខខណ្ឌតាមដីកាសម្រេចដោយមានសំអាងហេតុ បន្ទាប់ពីទទួលបានយោបល់ពីគណៈកម្មការជាតិដោះលែងដោយមានលក្ខខណ្ឌ ស្របតាមមាត្រា ៥១៤ មាត្រា ៥១៥ និងមាត្រា ៥១៦ នៃក្រមនីតិវិធីព្រហ្មទណ្ឌ។
ប្រធានសាលាដំបូង មិនជាប់ជំពាក់នឹងយោបល់របស់គណៈកម្មការជាតិនោះទេ។
ប្រកាសបន្តថា លក្ខខណ្ឌ បែបបទ និងនីតិវិធីនៃការដោះលែងដោយមានលក្ខខណ្ឌ ព្រមទាំងការបញ្ចប់ការដោះលែងដោយមានលក្ខខណ្ឌមានចែងចាប់ពីមាត្រា ៥១២ ដល់មាត្រា ៥២២ នៃក្រមនីតិវិធីព្រហ្មទណ្ឌ។
នៅក្នុងដីកាសម្រេចដោះលែង ដោយមានលក្ខខណ្ឌប្រធានសាលាដំបូងត្រូវកំណត់អំពីបែបបទនៃការអនុវត្ត និងរយៈពេលនៃការសាកល្បងដែលមិនអាចលើសពីថិរវេលានៃទោសដែលនៅសល់ មិនទាន់បានទទួលឡើយ។
ប្រធានសាលាដំបូង សម្រេចដោះលែងទណ្ឌិត ដោយមានភ្ជាប់លក្ខខណ្ឌជាកាតព្វកិច្ចមួយ ឬច្រើន។
កាតព្វកិច្ចជាអាទិ៍ទាំងនោះរួមមាន ទណ្ឌិតត្រូវបំពេញសកម្មភាពខាងវិជ្ជាជីវៈ ទទួលការបង្ហាត់បង្រៀន ឬទទួលការបណ្តុះបណ្តាលវិជ្ជាជីវៈ រស់នៅក្នុងទីកន្លែងណាមួយជាកំណត់។
ប្រធានសាលាដំបូង ត្រូវបញ្ជាក់អំពីសកម្មភាពដែលហាមឃាត់ដូចជា មិនត្រូវសេពគប់ជាមួយបុគ្គលខ្លះ ពិសេស ចារី សហចារី អ្នកផ្ដើមគំនិត អ្នកសមគំនិត ឬជនរងគ្រោះនៃបទល្មើស។
មិនត្រូវកាន់កាប់ ឬយកតាមខ្លួននូវអាវុធ គ្រឿងផ្ទុះ និងគ្រាប់រំសេវគ្រប់ប្រភេទ។
ប្រកាសបានគូសបញ្ជាក់ថា ក្នុងករណីទណ្ឌិតមិនអនុវត្តតាមដីកាសម្រេចស្តីពីការដោះលែងដោយមានលក្ខខណ្ឌប្រធានសាលាដំបូង អាចដកហូតដីកាសម្រេចនោះ និងអាចបង្គាប់ឱ្យចាប់ខ្លួនទណ្ឌិតនោះមកអនុវត្តទោស ដែលនៅសេសសល់។
ប្រកាសបន្តទៀតថា ក្រៅពីការអនុវត្តកាតព្វកិច្ចទាំងនេះ ទណ្ឌិតអាចត្រូវដាក់ឱ្យស្ថិតក្រោមវិធានការត្រួតពិនិត្យរបស់អាជ្ញាធរមានសមត្ថកិច្ច ដោយត្រូវគោរពកាតព្វកិច្ចមួយ ឬច្រើនដូចជាត្រូវគោរពតាមដីកាកោះរបស់ព្រះរាជអាជ្ញា ឬការកោះហៅរបស់បុគ្គលដែលព្រះរាជអាជ្ញាបានប្រគល់អំណាចឱ្យ។
ត្រូវជូនដំណឹងដល់ព្រះរាជអាជ្ញា អំពីការផ្លាស់ប្ដូរមុខរបររបស់ខ្លួន និងត្រូវមានការអនុញ្ញាតពីព្រះរាជអាជ្ញា មុនពេលធ្វើដំណើរទៅបរទេស។
ព្រះរាជអាជ្ញានៃសាលាដំបូងដែលបានចេញដីកាសម្រេចដោះលែងដោយមានលក្ខខណ្ឌ ប្រើប្រាស់ សិទ្ធិអំណាចរបស់ខ្លួនតាមច្បាប់ ដើម្បីធានាដល់ការអនុវត្តដីកាសម្រេចដោះលែងដោយមានលក្ខខណ្ឌ ព្រមទាំងអាចចាត់វិធានការចាំបាច់នានា ដើម្បីឃ្លាំមើល តាមដាន និងត្រួតពិនិត្យការអនុវត្តដីកាសម្រេចនោះ។
គណៈកម្មការជាតិដោះលែងដោយមានលក្ខខណ្ឌ ត្រូវបានប្រគល់ភារកិច្ច ដើម្បីសហការជាមួយស្ថាប័នសាធារណៈ ស្ថាប័នឯកជន អង្គការមិនមែនរដ្ឋាភិបាល ឬស្ថាប័នពាក់ព័ន្ធផ្សេងទៀត សំដៅជួយដល់ការធ្វើសមាហរណកម្មទណ្ឌិតដែលត្រូវបានដោះលែងដោយមានលក្ខខណ្ឌឱ្យចូលទៅរួមរស់នៅក្នុងសង្គមវិញ។
ប្រកាសដដែលបន្តទៀតថា នាយកខុទ្ទកាល័យ អគ្គលេខាធិការ នៃអគ្គលេខាធិការដ្ឋាន គ្រប់អគ្គនាយក នៃអគ្គនាយកដ្ឋាន អគ្គាធិការ អគ្គាធិការដ្ឋានកិច្ចការតុលាការ និងប្រធានគ្រប់អង្គភាពចំណុះក្រសួងយុត្តិធម៌ ត្រូវទទួលបន្ទុកអនុវត្តប្រកាសនេះ តាមភារកិច្ចរៀងៗខ្លួន ចាប់ពីថ្ងៃចុះហត្ថលេខាតទៅ៕
វីដេអូ៖
