The Phnom Penh Post Search

Search form

Logo of Phnom Penh Post newspaper Phnom Penh Post - រាជរដ្ឋាភិបាល​សម្រេច​បង្កើត​ក្រុម​ការងារ​ដឹក​នាំ និង​ប្រតិបត្តិ​លើ​ការ​សិក្សា​ការ​ចាក់​វ៉ាក់សាំង​កូវីដ១៩

រាជរដ្ឋាភិបាល​សម្រេច​បង្កើត​ក្រុម​ការងារ​ដឹក​នាំ និង​ប្រតិបត្តិ​លើ​ការ​សិក្សា​ការ​ចាក់​វ៉ាក់សាំង​កូវីដ១៩

Content image - Phnom Penh Post
មន្ត្រីសុខាភិបាល​ចុះ​បញ្ជីរ​ឈ្មោះ​អ្នក​បាន​ចាក់​វ៉ាក់សាំង​កូវីដ​១៩។ រូបថត រ៉ាហ៊ីម

រាជរដ្ឋាភិបាល​សម្រេច​បង្កើត​ក្រុម​ការងារ​ដឹក​នាំ និង​ប្រតិបត្តិ​លើ​ការ​សិក្សា​ការ​ចាក់​វ៉ាក់សាំង​កូវីដ១៩

ភ្នំពេញៈ រាជរដ្ឋាភិបាល​សម្រេច​បង្កើត​ក្រុម​ការងារ​ដឹក​នាំ និង​ប្រតិបត្តិ​លើ​ការ​សិក្សា​ការ​ចាក់​វ៉ាក់សាំង​កូវីដ១៩ ដើម្បី​ផ្តល់​ប្រឹក្សា​យោបល់ និងតម្រង់​ទិស​ការងារ​ដល់​ការ​សិក្សា​វាយ​តម្លៃ​ទាក់​ទង​ការ​ចាក់​វ៉ាក់សាំង​កូវីដ​១៩ ផ្តល់​យោបល់​លើ​ពិធី​សារ​សិក្សា និង​វាយ​តម្លៃ​ទាក់​ទង​និង​ការចាក់​វ៉ាក់សាំង​ជាដើម។

លិខិត​របស់​រាជ​រដ្ឋាភិបាល​ចេញ​ថ្ងៃ​ទី​១៦ ខែ​កក្កដា បាន​សម្រេច​បង្កើត​ក្រុម​ការងារ​ដឹក​នាំ និង​ប្រតិបត្តិ​លើ​ការ​សិក្សា​ការ​ចាក់​វ៉ាក់​សាំង​កូវីដ១៩ ដែល​មាន​ក្រុម​ប្រឹក្សា​នាយក និង​ក្រុម​ការងារ​ប្រតិបត្តិ​លើ​ការ​សិក្សា​ការ​ចាក់​វ៉ាក់​សាំង​កូវីដ​១៩។ ក្នុង​នោះ​លោកស្រី ឱ វណ្ណឌីន រដ្ឋលេខាធិការ​ក្រសួង​សុខាភិបាល​ជា​ប្រធាន​ក្រុម​ប្រឹក្សា​នាយក លោកស្រី ពេជ ចន្ទមុន្នី អនុប្រធាន​ក្រុម​ប្រឹក្សា​ភិបាល​សមាគម​គ្រូ​ពេទ្យ​ស្ម័គ្រចិត្ត​យុវជន​សម្តេច​តេជោ (TYDA) ជា​អនុប្រធាន និង​មាន​សមាជិក ៣នាក់។

ចំណែក​ក្រុម​ការងារ​ប្រតិបត្តិ​លើ​ការ​សិក្សា​ការ​ចាក់​វ៉ាក់​សាំង​កូវីដ​១៩ គឺ​ជា​សេនាធិការ​ឱ្យ​ក្រុម​ប្រឹក្សា​នាយក ដែល​មាន​លោក​បណ្ឌិត លាង ឬទ្ធា ប្រធាន​កម្មវិធី​ជាតិ​ប្រយុទ្ធ​នឹង​ជំងឺ​គ្រុន​ឈាម​ជា​ប្រធាន លោក​សាស្ត្រាចារ្យរង អ៊ា ប៉ នាយក​រ​ងវិទ្យា​ស្ថាន​ជាតិ​សុខាភិបាល​សាធារណៈ ជា​អនុប្រធាន លោក បណ្ឌិត បូរី សុថ្ថាវីរៈ ប្រធាន​ការិយាល័យ​ស្រាវជ្រាវ និង​ផែនការ​នៃ​មហាវិទ្យាល័យ​ឱសថសាស្ត្រ ជា​អនុប្រធាន និងមាន​សមាជិក ៦​នាក់។

តាម​សេចក្តី​សម្រេច​របស់​រាជរដ្ឋាភិបាល ក្រុម​ការងារ​ប្រតិបត្តិ​លើការ​សិក្សា​ការ​ចាក់​វ៉ាក់សាំង​កូវីដ១៩ មាន​ផ្នែក​គាំទ្រ​លើ​ការ​សិក្សា និង​វាយតម្លៃ​លើ​ការ​ចាក់​វ៉ាក់សាំង​កូវីដ១៩ ចំនួន ៤​ដូចជា ផ្នែក​ការងារ​ស្រាវជ្រាវ​ឯកសារ និង​សរសេរ​ពិធី​សារ​ដឹក​នាំ​ដោយ​លោក​បណ្ឌិត លាង ឬទ្ធា ផ្នែក​ការងារ​ទទួល​បន្ទុក​ការងារ​មន្ទីរ​ពិសោធន៍ ដឹក​នាំ​ដោយ​លោក ជិន សាវុធ ផ្នែក​ការងារ​ទទួល​បន្ទុក​ប្រមូល និង​វិភាគ​ទិន្នន័យ ដឹក​នាំដោយ​លោក​បណ្ឌិត បូរី សុថ្ថាវីរៈ និង​ផ្នែក​ការងារ​សរសេរ​របាយ​ការណ៍ ដឹក​នាំ​ដោយ​លោក​សាស្ត្រាចារ្យ​រង អ៊ា ប៉។

សេចក្តី​សម្រេច​សរសេរ​ថា «សមាសភាព​ជាក់​ស្តែង​របស់​ផ្នែក​ទាំង ៤​នេះ ត្រូវ​កំណត់​ដោយ​សេចក្តី​សម្រេច​ដោយ​ឡែក​របស់​គណៈកម្មការចំពោះ​កិច្ចការ​ចាក់​វ៉ាក់​សាំង​កូវីដ​១៩ ក្នុង​ក្រប​ខ័ណ្ឌ​ទូទាំង​ប្រទេស»។

ក្រុម​ការងារ​ដឹក​នាំ និង​ប្រតិបត្តិការ​លើ​ការ​សិក្សា​ការ​ចាក់​វ៉ាក់សាំង​កូវីដ​១៩ មាន​ភារ​កិច្ច ផ្តល់​ប្រឹក្សា​យោបល់ និង​តម្រង់​ទិស​ការងារ​ដល់​ការសិក្សា​វាយ​តម្លៃ​ទាក់​ទង​ការ​ចាក់​វ៉ាក់​សាំង​កូវីដ១៩ ផ្តល់​ប្រឹក្សា​យោបល់​លើ​ពិធី​សារ​សិក្សា និង​វាយ​តម្លៃ​ទាក់​ទង​និង​ការ​ចាក់​វ៉ាក់សាំង​កូវីដ១៩ ពិនិត្យ​ផ្តល់​ប្រឹក្សា និង​អនុម័ត​លើ​របាយការណ៍​នៃ​ការ​សិក្សា និង​វាយ​តម្លៃ។

បង្កើត​ពិធី​សារ​សិក្សា និង​វាយ​តម្លៃ​ទាក់​ទង​នឹង​ការ​ចាក់​វ៉ាក់សាំង​កូវីដ​១៩ រួម​មាន រៀបចំ​វិធីសាស្ត្រ ឧបករណ៍​ប្រមូល-វិភាគ​ទិន្នន័យ​សិក្សា និង​វាយ​តម្លៃ​ទាក់​ទង នឹង​ការ​ចាក់​វ៉ាក់សាំង​កូវីដ​១៩ ដឹក​នាំ​និង​សម្រេច​សម្រប​សម្រួល​ការងារ​សិក្សា និង​វាយ​តម្លៃ​ទាក់​ទង​នឹង​ការ​ចាក់​វ៉ាក់សាំង​កូវីដ១៩ វិភាគ​និង​រៀប​ចំ​របាយការណ៍​សិក្សា និង​វាយ​តម្លៃ​ទាក់​ទង​នឹង​ការ​ចាក់​វ៉ាក់សាំង​កូវីដ១៩ អនុវត្ត​ការងារ​ផ្សេង​ទៀត តាម​ការប្រគល់​ភារកិច្ច​របស់​ប្រធាន​ក្រុម​ប្រឹក្សា​នាយក។

ក្នុងសេចក្តី​សម្រេច​សរសេរ​ថា «ក្រុម​ការងារ​នេះ អាច​អញ្ជើញ​តំណាង​ក្រសួង ស្ថាប័ន​ពាក់​ព័ន្ធ មន្ត្រី​ជំនាញ អ្នក​ឯកទេស ឬ​ផ្នែក​ឯកជន​ចូលរួម​ប្រជុំ និង​ប្រឹក្សា​យោបល់​ទៅ​តាម​តម្រូវ​ការ​ចាំ​បាច់»។

រាល់ការ​ចំណាយ​ពាក់​ព័ន្ធ​ការ​សិក្សា ការ​ចាក់​វ៉ាក់​សាំង​កូវីដ១៩ ប្រើ​កញ្ចប់​ថវិកា​ជាតិ ដោយ​រៀប​ចំ​សំណើ​ដាក់​ជូន​ប្រធាន​គណៈ​ប្រចាំ​ការ​នៃ គ.ប.ក ដែល​ជា​ឧបនាយក​រដ្ឋ​មន្ត្រី និង​ជា​រដ្ឋ​មន្ត្រី​ក្រសួង​សេដ្ឋកិច្ច​និង​ហិរញ្ញវត្ថុ ដើម្បី​ពិនិត្យ និង​សម្រេច។

សេចក្តី​សម្រេច​រាជ​រដ្ឋាភិបាល​បញ្ជាក់​ថា អនុប្រធាន និង​សមាជិក​ទាំង​អស់​នៃ​ក្រុម​ប្រឹក្សា​នាយក ព្រម​ទាំង​ប្រធាន អនុប្រធាន និង​សមាជិក នៃ​ក្រុម​ការងារ​ប្រតិបត្តិ​លើ​ការ​សិក្សា​ការ​ចាក់​វ៉ាក់​សាំង​កូវីដ១៩ ត្រូវ​ចូល​រួម​ប្រជុំ​ក្រុម​ការងារ​ដឹក​នាំ និង​ប្រតិបត្តិ​លើ​ការ​សិក្សា​ការ​ចាក់​វ៉ាក់សាំងកូវីដ​១៩ តាម​ការ​អញ្ជើញ​របស់​ប្រធាន​ក្រុម​ប្រឹក្សា​នាយក។ ក្នុង​ករណី​ប្រធាន​ក្រុម​ប្រឹក្សា​នាយក​អវត្តមាន ឬមានធុរៈ អនុប្រធាន​ក្រុម​ប្រឹក្សានាយក​ដែល​បាន​ទទួល​សិទ្ធិ​ពី​ប្រធាន អាច​កោះប្រ​ជុំ និង​ដឹក​នាំ​កិច្ច​ប្រជុំ​ជំនួស​បាន៕

អត្ថបទគួរចាប់អារម្មណ៍