.jpg)
អាជីវកម្មនៅតាមផ្ទះនៅខេត្តស្វាយរៀងត្រូវបានបិទ កាលពីថ្ងៃទី១៥ កក្កដា ដើម្បីទប់ស្កាត់ការឆ្លងកូវីដ១៩។ រូបថត រដ្ឋបាលខេត្តស្វាយរៀង
ស្វាយរៀងៈ រដ្ឋបាលខេត្តស្វាយរៀង បន្តបិទផ្សាររដ្ឋ ផ្សារឯកជន ភោជនីយដ្ឋាន និងផ្អាកការលក់ដូរគ្រឿងស្រវឹងគ្រប់ប្រភេទ ចាប់ពីថ្ងៃទី ១៩ ខែកក្កដា ដល់ថ្ងៃទី ២៥ ខែកក្កដា ឆ្នាំ ២០២១ នៅក្នុងភូមិសាស្ត្រខេត្ត ដើម្បីគ្រប់គ្រងស្ថានការណ៍ និងទប់ស្កាត់ការឆ្លងរាលដាលជំងឺកូវីដ ១៩ ឱ្យមានប្រសិទ្ធភាព។
សេចក្តីជូនដំណឹងចុះហត្ថលេខាដោយលោកម៉ែន វិបុល ថ្ងៃទី ១៨ ខែកក្កដានេះ បានឱ្យដឹងថា ដោយសារស្ថានភាពនៃការឆ្លងរាលដាលនៃជំងឺកូរីដ ១៩ ក្នុង “ព្រឹត្តិការណ៍សហគមន៍២០កុម្ភៈ” ក្នុងខេត្តស្វាយរៀង នៅមិនទាន់ទប់ស្កាត់បានទាំងស្រុងនៅឡើយ និងកំពុងមានការឆ្លងរាលដាលជាបន្តបន្ទាប់ទៀត ដូចនេះរដ្ឋបាលខេត្តសម្រេចផ្អាកលក់គ្រឿងស្រវឹងជាបណ្តោះអាសន្ន ដើម្បីធានាការពារអាយុជីវិតបងប្អូនប្រជាពលរដ្ឋ និងសុខភាពសាធារណៈ។
សេចក្តីជូនដំណឹងបន្តថា៖«បន្តផ្អាកការលក់ដូរគ្រឿងស្រវឹងគ្រប់ប្រភេទនៅក្នុងភូមិសាស្ត្រខេត្តស្វាយរៀង។ គ្រប់ផ្សាររដ្ឋ ផ្សារឯកជន ផ្សារម៉ាត ភោជនីយដ្ឋាន អាហារដ្ឋាន តូបលក់អាហារ ហាងកាហ្វេ ហាងភេសជ្ជៈ ទីតាំងអាជីវកម្មផ្នែកអាហារ ភេសជ្ជៈ និងដេប៉ូចែកចាយគ្រឿងស្រវឹង ត្រូវផ្អាកនូវការលក់ដូរគ្រឿងស្រវឹងគ្រប់ប្រភេទ ជាបណ្ដោះអាសន្ន ចាប់ពីថ្ងៃទី ១៩ ខែកក្កដា ដល់ថ្ងៃទី ២៥ ខែកក្កដា ឆ្នាំ ២០២១»។
លោកម៉ែន វិបុល ក៏បានណែនាំដល់ រដ្ឋបាលក្រុង ស្រុក ឃុំ សង្កាត់ ត្រូវផ្សព្វផ្សាយនិងណែនាំដល់ប្រជាពលរដ្ឋ ហាមឃាត់ជាដាច់ខាត ចំពោះការជួបជុំប្រមូលផ្តុំគ្នាច្រើនពីផ្ទះមួយទៅផ្ទះមួយ ដើម្បីពិសាគ្រឿងស្រវឹង ។
សេចក្តីជូនដំណឹងដដែលបន្តថា គណៈបញ្ជាការឯកភាពរដ្ឋបាលខេត្ត មន្ទីរ-អង្គភាពពាក់ព័ន្ធ និងរដ្ឋបាលក្រុង ស្រុក ឃុំ សង្កាត់ ត្រូវធ្វើការណែនាំស្តីពីការហាមឃាត់ និងទប់ស្កាត់ការជួបជុំការលក់ដូរ និងពិសាគ្រឿងស្រវឹងគ្រប់ប្រភេទ។
សេចក្តីជូនដំណឹងបញ្ជាក់ថា៖ «ក្នុងករណី បង ប្អូនប្រជាពលរដ្ឋ អ្នកគ្រប់គ្រងផ្សារ ម្ចាស់ដេប៉ូចែកចាយ ម្ចាស់ហាង ម្ចាស់តូបលក់ដូរក៏ដូចជាម្ចាស់ទីតាំង អាជីវកម្មពាក់ព័ន្ធនឹងការលក់ដូរគ្រឿងស្រវឹង មិនអនុវត្តតាមការណែនាំនេះនឹងត្រូវទទួលទណ្ឌកម្មស្របតាមវិធានការរដ្ឋបាល»។
សេចក្តីជូនដំណឹងឱ្យដឹងដែរថា គិតត្រឹមថ្ងៃទី ១៧ ខែកក្កដា ឆ្នាំ២០២១ ខេត្តស្វាយរៀងមានអ្នកឆ្លងជំងឺកូវីដ១៩ សរុបចំនួន៣ ៧៩០នាក់ ព្យាបាលជាសះស្បើយចំនួន ២ ៨៨៦ នាក់ កំពុងសម្រាកព្យាបាលចំនួន ៨៤៣នាក់ និងករណីអ្នកស្លាប់ដោយសារជំងឺនេះមានចំនួន ៦០ នាក់៕
