.jpg)
ក្រុមអ្នកប្រព្រឹត្តបទល្មើសដែលសមត្ថកិច្ចរាជធានីភ្នំពេញចាប់ខ្លួនបាន ថ្មីៗនេះ ។ រូបថត ប៉ូលិស
ភ្នំពេញៈសមត្ថកិច្ចនគរបាលរាជធានីភ្នំពេញបានឱ្យដឹងតាមរយៈរបាយការណ៍ថាសកម្មភាពបទល្មើសលួចនិងឆក់នៅរាជធានីភ្នំពេញក្នុងខែមិថុនាឆ្នាំនេះមានការថយចុះ៩ករណីដែលស្មើនឹង១៨ភាគរយបើធៀបនឹងខែឧសភាឆ្នាំ២០២១ដោយមន្ត្រីបានអះអាងថា កត្តានេះគឺដោយសារ សមត្ថកិច្ចគ្រប់គ្រងស្ថានការណ៍បានល្អ។
យោងតាមរបាយការណ៍របស់គណៈបញ្ជាការអនុវត្តផែនការសកម្មភាពបង្ការ ទប់ស្កាត់ និងបង្ក្រាបអំពើលួច ឆក់ នៅរាជធានីភ្នំពេញដែលបានចេញផ្សាយនៅថ្ងៃទី ១៨ ខែកក្កដា ឆ្នាំ ២០២១ បានបង្ហាញថា បទល្មើសជារួមកើតឡើងមានចំនួន ៤២/៥១ ករណី ថយ ៩ ករណី ស្មើនឹង ១៨ ភាគរយ ប្រៀបធៀបខែឧសភា ឆ្នាំ ២០២១ ក្នុងនោះបទល្មើសលួចមានចំនួន ៣៣/៣៦ ករណី ថយ ៣ ករណីនិងបទល្មើសឆក់ មានចំនួន ៩/១៥ករណី ថយ ៦ ករណី។
របាយការណ៍ដដែលបន្តថា កងកម្លាំងគ្រប់បណ្តាអង្គភាពដែលមានភារកិច្ចអនុវត្តផែនការសកម្មភាពបង្ការ ទប់ស្កាត់ និងបង្ក្រាបអំពើលួចឆក់ បានខិតខំប្រឹងប្រែងសហការគ្នាចូលរួមបង្ក្រាបបានចំនួនសរុប៤២ករណី ចាប់បានជនសង្ស័យ៦៧នាក់ស្មើ ១០០ភាគរយនៃបទល្មើសកើតឡើងក្នុងនោះបទលួច ៣៣ ករណីនិងបទឆក់ ៩ ករណី។ ចំពោះជនសង្ស័យក្រោយបង្ក្រាបបានរកឃើញធ្លាប់ប្រើសារធាតុញៀនចំនួន ៥៤នាក់ ស្មើនឹង ៨១ ភាគរយ ។
លោក ស៊ីម ពិសិដ្ឋ អធិការនគរបាលខណ្ឌបឹងកេងកងប្រាប់ភ្នំពេញប៉ុស្តិ៍យ៉ាងខ្លីនៅថ្ងៃទី ១៨ ខែកក្កដា ឆ្នាំ ២០២១ ថា សកម្មភាពនៃការលួច ឆក់នៅក្នុងមូលដ្ឋានរបស់លោកគ្រប់គ្រងគឺមិនមាននោះទេ ប៉ុន្តែលោកក៏មិនបានបញ្ជាក់ពីមូលហេតុនោះដែរ។
ចំណែកលោក ទៀង ច័ន្ទសា អធិការនគរបាលខណ្ឌដូនពេញបានឱ្យដឹងដែរថា អនុវត្តតាមបទបញ្ជា និងការណែនាំរបស់លោក ស ថេត ស្នងការនគរបាលរាជធានីភ្នំពេញ មន្ត្រីជំនាញនៅក្នុងអធិការនគរបាលខណ្ឌដូនពេញបានពង្រឹងនិងគ្រប់គ្រងសភាពការណ៍ បានល្អនៅក្នុងមូលដ្ឋាន ដែលជាហេតុធ្វើឱ្យបទល្មើសនានា រួមមាន ការឆក់ និងលួចមានការថយចុះជាលំដាប់ ។
លោកបានបន្តថា សមត្ថកិច្ចនៅក្នុងទីក្រុងភ្នំពេញមិនថា នៅក្នុងខណ្ឌរបស់លោកទេ បាននិងកំពុងរឹតបន្តឹងនិងគ្រប់គ្រងសភាពការណ៍រាល់បទល្មើសមិនឱ្យកើតមានឡើយ ដើម្បីផ្តល់សុវត្ថិភាព និងសន្តិសុខជូនប្រជាពលរដ្ឋដែលរស់នៅក្នុងរាជធានីភ្នំពេញ៕
