.jpg)
អ្នកជំនាញកំពុងពិនិត្យជ្រូកដែលនាំចូលពីថៃកាលខែពីកុម្ភៈ។ រូប សហការី
ភ្នំពេញៈ អគ្គនាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្ម រុក្ខាប្រមាញ់ និងនេសាទ ច្រានចោលការចុះផ្សាយព័ត៌មានមួយចំនួនដែលថា ក្រសួងកសិកម្មផ្តល់សិទ្ធិផ្តាច់មុខទៅឱ្យក្រុមហ៊ុនឯកជនក្នុងការនាំចូលជ្រូករស់ពីប្រទេសថៃ។
សេចក្តីប្រកាសព័ត៌មានរបស់អគ្គនាយកដ្ឋានសុខភាពសត្វ និងផលិតកម្មសត្វ ចុះថ្ងៃទី ១៨ ខែកក្កដា បានឱ្យដឹងថាថ្មីៗនេះមានសារព័ត៌មានមួយចំនួនបានចុះផ្សាយអត្ថបទខុសពីការពិតពាក់ព័ន្ធនឹងការធ្វើពាណិជ្ជកម្មជ្រូកនៅកម្ពុជា។ ការផ្សាយនេះមិនបានសិក្សាច្បាស់លាស់ធ្វើឱ្យសាធារណជនមានការយល់ច្រឡំមកលើក្រសួងកសិកម្ម រុក្ខាប្រមាញ់ និងនេសាទ។
សេចក្តីប្រកាសបញ្ជាក់ថា៖ «ឆ្លើយតបចំពោះករណីនេះ អគ្គនាយកដ្ឋានសុខភាពសត្វ និងផលិតកម្មសត្វ ក៏ដូចជាក្រសួងកសិកម្ម រុក្ខាប្រមាញ់ និងនេសាទរហូតមកដល់ពេលបច្ចុប្បន្ននេះ ពុំដែលបានផ្ដល់សិទ្ធិផ្តាច់មុខដល់ក្រុមហ៊ុននាំចូលជ្រូករស់ពីប្រទេសថៃឡើយ។ ពោលក្រុមហ៊ុនដែលមានបំណងចង់ធ្វើពាណិជ្ជកម្មនាំចូលជ្រូករស់អាចដាក់ពាក្យស្នើសុំ»។
សេចក្តីប្រកាសបន្តថា ក្រុមហ៊ុនចង់ធ្វើពាណិជ្ជកម្មនាំចូលជ្រូករស់ពីថៃត្រូវបំពេញតាមវិធានការដែលតម្រូវឱ្យអនុវត្តនីតិវិធី និងវិធានបច្ចេកទេសចំនួន ១២ ចំណុចរវាងអគ្គនាយកដ្ឋានសុខភាពសត្វ និងផលិតកម្មសត្វនៃកម្ពុជា ជាមួយនាយកដ្ឋានអភិវឌ្ឍន៍ការចិញ្ចឹមសត្វ (DLD) នៃប្រទេសថៃ។ អគ្គនាយកដ្ឋានសុខភាពសត្វបានឱ្យដឹងដែរថា សព្វថ្ងៃមានក្រុមហ៊ុនចំនួន ៦ ដែលកំពុងទទួលបានគោលការណ៍នាំជ្រូករស់ចូលមកក្នុងកម្ពុជា និងមានចំនួន ៤ ក្រុមហ៊ុនទទួលគោលការណ៍នាំឆ្លងកាត់។
អគ្គនាយកដ្ឋានសុខភាពសត្វបញ្ជាក់ថា៖ «ប្រទេសជិតខាងយើងក៏បាននិងកំពុងជួបវិបត្តិនៃការរីករាលដាលនៃជំងឺកូវីដ ១៩ ខ្លាំងក្លា ដែលធ្វើឱ្យបាត់បង់ទីផ្សារក្នុងស្រុករបស់ខ្លួនបានធ្វើឱ្យមានការកកស្ទះនូវផលិតផលសត្វ»។
«ទន្ទឹមនឹងនេះក៏មានឈ្មួញខិលខូចមួយចំនួនតូចបានប្រើប្រាស់កលល្បិចគ្រប់យ៉ាង ដើម្បីមានឱកាសយកផលិតផលកកស្ទះពីស្រុកគេមកចាក់នៅកម្ពុជា ដោយមិនបានគិតពីការប៉ះពាល់ដល់ការខាតបង់របស់អ្នកវិនិយោគនៅកម្ពុជា និងសុខភាពសាធារណៈឡើយ»។ អគ្គនាយកដ្ឋានបញ្ជាក់បន្ថែម។
ការច្រានចោលនេះ បន្ទាប់ពីសារព័ត៌មានក្នុងស្រុកមួយចំនួនបានចុះផ្សាយថា មានមន្ត្រីមានអំណាច ១ រូបកំពុងនៅពីក្រោយខ្នងនៃការរកស៊ីនាំចូលជ្រូកផ្តាច់មុខមកកម្ពុជា។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាគាំទ្រចំពោះចំណាត់ការរបស់អគ្គនាយកដ្ឋានសុខភាពសត្វ ដែលចេញមុខច្រានចោលព័ត៌មាននេះ ដើម្បីកុំឱ្យសាធារណជនមានការភាន់ច្រឡំ ។
លោកថា៖ «ខ្ញុំធ្លាប់ចូលកិច្ចប្រជុំច្រើនពាក់ព័ន្ធរឿងនេះ កន្លងមកក្រុមហ៊ុនផ្សេងៗទៀតនិយាយគ្នាស្តាប់អត់បានទេ បើក្រសួងកសិកម្មអនុញ្ញាតឱ្យនាំចូល ១ ពាន់ក្បាល គាត់នាំចូល ២ ពាន់។ បើឱ្យគាត់នាំចូល ២ ពាន់ គាត់នាំចូល ៥ ពាន់ក្បាល។ ដូច្នេះធ្វើឱ្យប៉ះពាល់ដល់វិស័យចិញ្ចឹមសត្វនៅក្នុងប្រទេសកម្ពុជា»។
«ដូច្នេះក្រសួងកសិកម្មជ្រើសរើសក្រុមហ៊ុន ក ខ គ ឃ ...អ៊ីចឹងទៅ ចំណែក ៦ ក្រុមហ៊ុនទៀតដកចេញ។ បញ្ហា ៦ ក្រុមហ៊ុននេះឯងដែលអត់មានកូតានាំចូលជ្រូក ដោយសារគាត់នាំចូលអត់គិត។ ដល់ពេលក្រសួងដកគាត់ចេញ បាត់បង់ផលចំណេញ គាត់ក្តៅក្រហាយ អ៊ីចឹងគាត់ឆ្កឹះឆ្កៀល បំប៉ោងព័ត៌មាននាំឱ្យមានការភាន់ច្រឡំ»។ លោក ស្រ៊ុន ពៅ បញ្ជាក់។
បើតាមលោក ស្រ៊ុន ពៅ ជាអ្នកធ្វើការក្នុងវិស័យចិញ្ចឹមសត្វនៅកម្ពុជាលោកមើលឃើញថា ការចិញ្ចឹមជ្រូកនាពេលបច្ចុប្បន្នមានការអភិវឌ្ឍគួរឱ្យកត់សម្គាល់ ខណៈមានកសិដ្ឋានជាច្រើនបានបើកដំណើរការជាបន្តបន្ទាប់ ហើយអាចឈានដល់ការនាំចេញជ្រូកនាពេលខាងមុខនេះ។
អគ្គនាយកដ្ឋានសុខភាពសត្វ ឱ្យដឹងថា ថ្លៃដើមផលិតជ្រូកបានប្រែប្រួលក្នុងរង្វង់ពី ៧ ៥០០ រៀល ទៅ ៩ ០០០ រៀល ក្នុង ១ គីឡូក្រាម មុនវិបត្តិកូវីដ ១៩។ បច្ចុប្បន្នថ្លៃដើមផលិតបានកើនឡើងប្រមាណពី ១០ ៥០០ រៀលទៅ ១២ ០០០ រៀល ក្នុង ១ គីឡូក្រាម។ ការប្រែប្រួលថ្លៃដើមផលិតជ្រូកសាច់នេះ ដោយសារតម្លៃវត្ថុធាតុដើម ដូចជា ពោត ដំឡូងក្រៀម កាកសណ្ដែកសៀង ម្សៅត្រី និងសារធាតុបន្ថែម សម្រាប់ផ្សំចំណីសត្វកើនឡើងប្រមាណពី ២០ ទៅ ៣០ ភាគរយ។
ដោយឡែកតម្លៃដឹកជញ្ជូនតាមផ្លូវទឹកកើនឡើងប្រមាណ ៣ ដងម្យ៉ាងទៀត កូនជ្រូកពូជសាច់ក៏បានឡើងថ្លៃពី ៧០ ទៅ ១០០ ដុល្លារ ក្នុង ១ ក្បាល ព្រមទាំងការចំណាយបន្ថែមលើការលើកកម្ពស់ជីវសុវត្ថិភាពនៅកន្លែងចិញ្ចឹមសត្វ ដើម្បីការពារជំងឺឆ្លងសត្វ ជាពិសេសជំងឺប៉េស្តជ្រូកអាហ្វ្រិក។
បើតាមអគ្គនាយកដ្ឋាននេះ ទោះបីជានៅកម្ពុជាកំពុងស្ថិតក្នុងស្ថានភាពជួបវិបត្តិសកលជំងឺកូវីដ ១៩ ក៏តម្លៃជ្រូករស់ក្នុងស្រុកមិនប្រែប្រួលខ្លាំងនោះឡើយ គឺចន្លោះពី ១២ ៥០០ រៀល ទៅ ១៣ ៦០០ រៀលក្នុង ១ គីឡូក្រាម អាស្រ័យទៅតាមតំបន់នីមួយៗ។ តម្លៃជ្រូកសាច់នាំចូលលក់ថោកជាងជ្រូកក្នុងស្រុក ចន្លោះពី ១០០ រៀល ទៅ ២០០ រៀលក្នុង ១ គីឡូក្រាម។ ចំពោះតម្លៃសាច់ជ្រូកនៅលើទីផ្សារបានប្រែប្រួលចន្លោះពី ២៣ ៥០០ រៀលទៅ ២៦ ៣០០ រៀលក្នុង ១ គីឡូក្រាម។
អគ្គនាយកដ្ឋាននេះឱ្យដឹងថា ក្នុងរយៈពេល ៦ ខែដើមឆ្នាំ ២០២១ នេះ ការសុំបង្កើតកសិដ្ឋានចិញ្ចឹមជ្រូកនៅកម្ពុជាមាន ៦១ កន្លែង ក្នុងនេះកសិដ្ឋានចិញ្ចឹមពូជជ្រូកចំនួន ៧ កន្លែង និងកសិដ្ឋានចិញ្ចឹមជ្រូកសាច់ចំនួន ៥៤ កន្លែង៕
វីដេអូ៖
