.jpg)
អាជ្ញាធរខេត្តសៀមរាប ចុះរៀបចំទីតាំងចាក់វ៉ាក់សាំងជូនពលរដ្ឋ នៅស្រុកប្រាសាទបាគង កាលពីថ្ងៃទី ១៤ ខែ កក្កដា ឆ្នាំ ២០២១។ រូបថត សហការី
ឧត្តរមានជ័យ/សៀមរាបៈ រដ្ឋបាលខេត្តឧត្តរមានជ័យ សម្រេចបិទខ្ទប់ខ្នងផ្ទះ និងមីនីម៉ាតចំនួន ៤ ទីតាំងជាបណ្តោះអាសន្ន នៅក្រុងសំរោងខណៈរដ្ឋបាលខេត្តសៀមរាប សម្រេចបិទតូបផ្សារជាង ១០ តូប ស្ថិតនៅស្រុកពួក បន្ទាប់ពីរកឃើញវិជ្ជមានកូវីដ ១៩។
សេចក្តីជូនដំណឹងចុះហត្ថលេខាដោយអភិបាលខេត្តឧត្តរមានជ័យលោក ប៉ែន កុសល្យ ចុះថ្ងៃទី ១៩ ខែកក្កដា បានសម្រេចបិទខ្ទប់ជាបណ្តោះអាសន្នទីតាំងចំនួន ៤ កន្លែង ស្ថិតនៅសង្កាត់សំរោង ក្រុងសំរោង ខេត្តឧត្តរមានជ័យ ចាប់ពីថ្ងៃទី ១៨ ខែ កក្កដា ឆ្នាំ ២០២១ រហូតដល់មានការសម្រេចជាថ្មី ដោយមូលហេតុ ទីតាំងមានការពាក់ព័ន្ធនឹងករណីអ្នកជំងឺកូវីដ ១៩ ។
សេចក្តីជូនដំណឹងបន្តថា ទីតាំងដែលត្រូវបានបិទជាបណ្តោះអាសន្នរួមមាន ហាងមីនីម៉ាតឈ្មោះ វ័ន្ត ធីតា ស្ថិតនៅភូមិឈូក និងបីទីតាំងផ្សេងទៀត ជាផ្ទះរបស់ប្រជាពលរដ្ឋដែលរស់នៅភូមិផ្សេងគ្នាតែស្ថិតនៅក្រុងសំរោងតែមួយ។
សេចក្តីជូនដំណឹងបន្តទៀតថា ក្នងអំឡុងពេលនៃការបិទខ្ទប់ជាបណ្តោះអាសន្ននេះ រដ្ឋបាលក្រុងសំរោង បានហ៊ុមព័ទ្ធទីតាំងចំនួន ៤ កន្លែនេះ ដោយផ្អាកការចេញ-ចូល និងត្រូវស្រាវជ្រាវរកអ្នកពាក់ព័ន្ធផ្ទាល់ ឬប្រយោល ដើម្បីធ្វើចត្តាឡីស័ក និងយកវត្ថុសំណាក និងណែនាំឲ្យម្ចាស់ទីតាំងត្រូវគោរពអនុវត្តឲ្យបានម៉ឺងម៉ាត់តាម វិធានការសុខាភិបាលរបស់រាជរដ្ឋាភិបាល និងវិធានការនានារបស់រដ្ឋបាលខេត្តដែលមានជាធរមាន។
សេចក្តីជូនដំណឹងឱ្យដឹងទៀតថា ចំពោះបងប្អូនប្រជាពលរដ្ឋដែលមានការពាក់ព័ន្ធដោយផ្ទាល់ ឬ ប្រយោលក្នុងព្រឹត្តិការណ៍ខាងលើ ត្រូវដាក់ខ្លួនដាច់ដោយឡែករយៈពេល ១៤ ថ្ងៃ តាមវិធានសុខាភិបាល ឬបើមានរោគសញ្ញា ផ្តាសាយ ហៀរសំបោរ ឈឺបំពង់ក ថប់ដង្ហើម ក្តៅខ្លួនខ្លាំង ឬរោគសញ្ញាសង្ស័យផ្សេងៗទៀត សូមធ្វើការទាក់ទង ក្រុមការងារប្រចាំការ និងយកសំណាកដែលមានទីតាំងស្ថិតនៅមន្ទីរពេទ្យបង្អែកខេត្ត ឬទំនាក់ទំនងសាក សួរព័ត៌មានផ្សេងៗតាមរយៈលេខទូរស័ព្ទ ០១២ ៤៩៩ ១៩២។
ប្រធានមន្ទីរខេត្តឧត្តរមានជ័យលោក ផល លឹម ប្រាប់ ភ្នំពេញ ប៉ុស្តិ៍ថា គិតត្រឹមថ្ងៃទី ១៨ ខែកក្កដា ខេត្តឧត្តរមានជ័យ មានអ្នកវិជ្ជមានកូវីដ ១៩ ចំនួន ២ ៧៧៦ នាក់ ករណីនាំចូលចំនួន ២៥ ៨៥ នាក់ និងករណីពាក់ព័ន្ធព្រឹត្តិការណ៍ សហគមន៍ ២០ កុម្ភៈ ចំនួន ១៩១ នាក់ ព្យបាលជាសះស្បើយសរុបចំនួន ៥២៨ នាក់ ករណីស្លាប់ចំនួន ៦ នាក់ និងកំពុងសម្រាកព្យាបាលចំនួន ២២ ៤២ នាក់។
ជាមួយគ្នានេះដែរ អាជ្ញាធរស្រុកថ្មពួក ខេត្តសៀមរាប កាលពីយប់ថ្ងៃទី ១៨ ខែកក្កដា បានសម្រេចបិទតូបផ្សារជាង ១០ តូប ក្រោយរកអាជីវករវិជ្ជមាននកូវីដ ១៩។
ប្រធានមន្ទីរព័ត៌មានខេត្តសៀមរាបលោក លីវ សុខុន បានថ្លែងថា ដោយសារមានផលប៉ះពាល់តិចតួច អាជ្ញាធរស្រុកមិនបានបិទផ្សារទាំងមូលនោះទេ គឺបិទតូបមួយចំនួនដែលមានការជាប់ពាក់ព័ន្ធដោយផ្ទាល់ ឬដោយប្រយោល។
លោកថា ៖«គឺអាជ្ញាធរបានបិទតូបផ្សារ ១១ ឬ ១២ តូបអីហ្នឹង អត់មានបិទផ្សារទាំងមូលនោះទេ ហើយអត់មានវិធានការប្រមូលសំណាកទេ តែតម្រូវឱ្យអ្នកពាក់ព័ន្ធធ្វើចត្តាឡីស័កខ្លួនឯងនៅផ្ទះ ១៤ ថ្ងៃ និងតាមដានអាការៈជាប្រចាំ ក្នុងករណីមិនស្រួលខ្លួន អាចទំនាក់ទំនងតាមលេខទូរស័ព្ទដែលអាជ្ញាធរបានណែនាំ ដើម្បីធ្វើសំណាក»។
លោកបន្តថា៖ «ក្នុងផ្សារនោះរកឃើញអ្នកឆ្លងមានតែ ២ នាក់ ទី១ គឺម្តាយជាអាជីវករលក់ក្នុងផ្សារ ទី២ កូនមានវិជ្ជមានកូវីដ ១៩ ចឹងប្រហែលជាម្តាយឆ្លងពីកូន ព្រោះកូនតេស្តទៅវិជ្ជមាន ហើយ យកទៅកន្លែងសម្រាកព្យាបាលហើយ ក្រោយមកតេស្តម្តាយឃើញវិជ្ជមានកូវីដដែរ ទើបអាជ្ញាធរគេសម្រេចបិទតូបគាត់ និងតូបពាក់ព័ន្ធ»។
លោក លីវ សុខុន បន្តថា បច្ចុប្បន្ននេះ អាជ្ញាធរបានយកខ្សែហ៊ុមព័ទ្ធទីតាំងតូបដែលត្រូវបានបិទទាំងនោះ ចំណែកតូបផ្សារដទៃទៀតដែលមិនជាប់ពាក់ព័ន្ធនៅបើកលក់ធម្មតា។
រដ្ឋបាលខេត្តសៀមរាប បានឱ្យដឹងថា គិតត្រឹមថ្ងៃទី ១៨ ខែកក្កដានេះ មានអ្នកវិជ្ជមានកូវីដ ១៩ ចំនួន ៣ ១១៧ នាក់ ព្យាបាលជាសះស្បើយចំនួន ១ ៣៦១ នាក់ ស្លាប់ ២៦ នាក់ និង ១ ៧៣០ នាក់ កំពុងសម្រាកព្យាបាល៕
