ភ្នំពេញៈ មន្ដ្រីជំនាញនៃស្នងការដ្ឋាននគរបាលរាជធានីកំពុងយកសំណាកលើមនុស្សជិត ១០០ នាក់ចម្រុះជាតិសាសន៍គ្នា ក្រោយពីបង្ក្រាបទីតាំងកម្សាន្តមួយកន្លែងនៅក្នុងសង្កាត់បឹងរាំង ខណ្ឌដូនពេញកាលពីថ្ងៃទី ១៩ ខែកក្កដា ដែលបើកឱ្យមានការប្រមូលផ្ដុំគ្នាផ្ទុយនឹងវិធានប្រឆាំងការរីករាលដាលជំងឺកូវីដ ១៩។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ ថ្លែងប្រាប់ភ្នំពេញប៉ុស្ដិ៍ពីម្សិលមិញថា កាលពីយប់រំលងអធ្រាត្រឈានចូលថ្ងៃទី ១៩ ខែកក្កដា កងកម្លាំងនគរបាលនៃស្នងការដ្ឋាននគរបាលរាជធានីភ្នំពេញបានចុះបង្ក្រាបទីតាំងកម្សាន្តមួយកន្លែងឈ្មោះ Love Club ហើយបានឃាត់ខ្លួនមនុស្សប្រុសស្រីចម្រុះជាតិសាសន៍ជិត ១០០ នាក់យកមកសួរនាំនៅស្នងការដ្ឋាននគរបាលរាជធានីភ្នំពេញ។
លោកថ្លែងថា៖ «រហូតដល់ពេលនេះ យើងមិនទាន់អាចអនុវត្ដនីតិវិធីអ្វីចំពោះមនុស្សទាំងនេះទេ ព្រោះយើងត្រូវធ្វើសំណាកពួកគេរកមេរោគកូវីដ ១៩ សិន ក្រោយពេលធ្វើសំណាករួចទើបយើងអនុវត្ដនីតិវិធីតេស្តរកសារធាតុញៀន និងសាកសួរបន្តទៀត បើសិនជាមានវិជ្ជមានជំងឺកូវីដ ១៩ គឺយើងបញ្ជូនទៅព្យាបាល បើគ្មានជំងឺកូវីដ គឺបន្តធ្វើតេស្តរកសារធាតុញៀន ទើបឈានដល់ការសាកសួរ»។
លោក សុខសីហា បានឱ្យដឹងថា កងកម្លាំងនគរបាលនៃស្នងការដ្ឋាននគរបាលរាជធានី-ភ្នំពេញ គឺបន្តអនុវត្ដជាប្រចាំតាមសេចក្ដីណែនាំរបស់រដ្ឋបាលរាជធានីភ្នំពេញ បើសិនជាមានទីតាំងណាមួយដែលលួចប្រកបអាជីវកម្មល្មើសទៅនឹងសេចក្ដីណែនាំនឹងត្រូវបិទទីតាំង និងឃាត់អ្នកពាក់ព័ន្ធមកសាកសួរអនុវត្ដតាមច្បាប់ស្របទៅនឹងវិធានការទប់ស្កាត់ការឆ្លងរីករាលដាលជំងឺកូវីដ ១៩។
លោក សុខសីហា បញ្ជាក់ថា ក្នុងពេលថ្មីៗនេះ កងកម្លាំងនៃស្នងការដ្ឋាននគរបាលរាជធានីភ្នំពេញបានបង្ក្រាប និងបិទទីតាំងដែលលួចបើកខារ៉ាអូខេ ឬកន្លែងកម្សាន្តជាបន្តបន្ទាប់។
លោក ម៉េត មាសភក្ដី មន្ដ្រីនាំពាក្យរដ្ឋបាលរាជធានីភ្នំពេញមិនអាចទាក់ទងបានទេកាលពីម្សិលមិញ។
ក្រសួងទេសចរណ៍ និងរដ្ឋបាលរាជធានីភ្នំពេញ ក្រោយពីមានការផ្ទុះរីករាលដាលជំងឺកូវីដ ១៩ នៃព្រឹត្ដិការណ៍ ២០ កុម្ភៈបានចេញនូវសេចក្តីជូនដំណឹង និងសេចក្ដីណែនាំឱ្យបន្តបិទសកម្មភាពអាជីវកម្មកម្សាន្តដូចជា ខារ៉ាអូខេ រង្គសាល ឌីស្កូតែក និងបៀរហ្គាឌិន និងការជួបជុំមនុស្សច្រើននាក់ ដើម្បីបញ្ចៀសការឆ្លងរីករាលដាលជំងឺកូវីដ ១៩ នៅក្នុងសហគមន៍។
ទីតាំងកម្សាន្ត Love club ស្ថិតនៅអគារកម្ពស់ ១៦ ជាន់នៅតាមបណ្តោយផ្លូវ ៥៥ កែងនឹងផ្លូវ ២២២ ស្ថិតក្នុងសង្កាត់បឹងរាំង ខណ្ឌដូនពេញនោះ គឺបានធ្វើការឃាត់ខ្លួនមនុស្សចម្រុះជាតិសាសន៍ ប្រុស និងស្រីសរុបចំនួន ៨៧ នាក់ ក្នុងនោះមានស្រីចំនួន ៣៤ នាក់ និងដកហូតទូដែកចំនួនមួយ, ម្សៅស សង្ស័យជាសារធាតុញៀនមួយចំនួនតូច, រថយន្តជាច្រើនគ្រឿង រួមទាំង វត្ថុតាងជាច្រើនផ្សេងទៀត។
បច្ចុប្បន្ន មនុស្ស និងវត្ថុតាងស្ថិតនៅស្នងការដ្ឋាននគរបាលរាជធានីភ្នំពេញ៕