បន្ទាយមានជ័យៈ នគរបាលប្រឆាំងការជួញដូរមនុស្ស និងការពារអនីតិជន ខេត្តបន្ទាយមានជ័យបានបញ្ជូនយុវជនម្នាក់ទៅសាលាដំបូងខេត្តបន្ទាយមានជ័យនៅថ្ងៃទី ១៩ កក្កដា បន្ទាប់ពីឃាត់ខ្លួន ១ ថ្ងៃ ករណីសង្ស័យរួមភេទជាមួយក្មេងស្រីអាយុ ១៤ ឆ្នាំ ប្រព្រឹត្តនៅឃុំបុស្បូវ ស្រុកព្រះនេត្រព្រះ។
លោកស្រី ឌី សុជាតិ ស្នងការរងទទួលផែនការងារនគរបាលប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តបន្ទាយមានជ័យប្រាប់នៅថ្ងៃទី ១៩ កក្កដាថា ជនសង្ស័យឈ្មោះ ព្រួញ មករា អាយុ ២០ ឆ្នាំ មានលំនៅភូមិខ្វាវ ឃុំបុស្បូវ ស្រុកព្រះនេត្រព្រះ។
ចំណែកក្មេងស្រីរងគ្រោះឈ្មោះ ម.ន អាយុ ១៤ ឆ្នាំរស់នៅឃុំ-ស្រុកព្រះនេត្រព្រះ។ លោកស្រីថ្លែងថា៖ «ជនសង្ស័យម្នាក់នេះបានឆ្លើយសារភាពប្រាប់យើង តែគាត់ថា ជាការព្រមព្រៀងគ្នាទេ។ តែយើងត្រូវតែអនុវត្តតាមច្បាប់ ព្រោះអំពើនោះជាបទល្មើសព្រហ្មទណ្ឌ»។
ពាក់ព័ន្ធករណីនេះដែរ ត្រូវបានលោក មាស ឫទ្ធី អធិការនគរបាលស្រុកព្រះនេត្រព្រះប្រាប់ភ្នំពេញប៉ុស្តិ៍ឱ្យដឹងតាមសម្តីជីតារបស់ក្មេងរងគ្រោះនៅថ្ងៃទី ១៩ កក្កដាថា កាលពីថ្ងៃទី ១៧ ខែកក្កដា មានបុរសចំណាស់ឈ្មោះ ម៉ាក់ ខាន់ បានមកប្តឹងនៅអធិការដ្ឋាន នគរបាលស្រុកព្រះនេត្រព្រះ ដោយបានអះអាងថា ឈ្មោះ ព្រួញ មករា រស់នៅភូមិខ្វាវ ឃុំបុស្បូវ បានទាក់ទងជាមួយចៅស្រីរបស់គាត់ ហើយបានបបួលចៅស្រីរបស់គាត់ចេញពីផ្ទះបាត់ ១ យប់មិនដឹងទៅណា។
លោកបន្តថា បន្ទាប់ពីលោកទទួលបានបណ្តឹងមក លោកបានចាត់កម្លាំងឱ្យចុះធ្វើការស៊ើបអង្កេតដល់ភូមិ-ឃុំដែលជនសង្ស័យរស់នៅ និងឃាត់ខ្លួនជនសង្ស័យ។
ក្រោយសាកសួរ គឺជនឈ្មោះ ព្រួញ មករា បានឆ្លើយថា រូបគេពិតជាបានរួមភេទជាមួយក្មេងស្រីពិតមែន។ ប៉ុន្តែ ពួកគេស្រឡាញ់គ្នាយូរមកហើយ។
លោកបញ្ជាក់ថា៖ «ពួកគេស្រឡាញ់គ្នា ឬត្រូវរ៉ូវគ្នាជារឿងរបស់ពួកគេ។ តែយើងក្នុងនាមកងកម្លាំងនគរបាលយុត្តិធម៌គឺយើងអនុវត្តតាមបណ្តឹង»។
លោក វ៉ាត គីមលួន មេភូមិដែលក្មេងរងគ្រោះរស់នៅបាននិយាយថា លោកមិនដឹងថា ក្មេងរងគ្រោះមានបងប្អូនប៉ុន្មាននាក់នោះទេ។ ប៉ុន្តែក្មេងរងគ្រោះម្នាក់នេះត្រូវបានម្តាយឪពុកទៅធ្វើការនៅប្រទេសថៃ ដោយទុកនាងឱ្យរស់នៅជាមួយជីតា។
លោកបន្តថា កាលពីថ្ងៃទី ១៧ កក្កដា បុរសជាជីតានោះបានមកប្រាប់លោកថា ចៅស្រីរបស់គាត់បានជិះម៉ូតូកញ្ចាស់ ១ គ្រឿងមកផ្ទះហើយគាត់ (ជីតា) បានប្រាប់ឱ្យចៅស្រីរបស់គាត់យកម៉ូតូនោះទៅឱ្យជនល្មើសវិញ។
ប៉ុន្តែគាត់បានបង្គាប់ឱ្យចៅស្រីយកខ្សែកប្លាទីនប្រមាណជាទម្ងន់ ១ ជីមកវិញ ព្រោះគាត់មិនឃើញចៅស្រីរបស់គាត់ពាក់។ លោកបន្តថា ចាប់តាំងពីថ្ងៃ (ថ្ងៃទី ១៧ កក្កដា) ដែលគាត់បង្គាប់ឱ្យចៅស្រីទៅយកខ្សែកពីជនសង្ស័យមកវិញ គឺនាងចេញពីផ្ទះបាត់រហូត។
លោកនិយាយថា៖ «តាមក្មេងរងគ្រោះប្រាប់ខ្ញុំថា បើចៅស្រីគាត់យកខ្សែកពីជនសង្ស័យមកវិញ គឺគាត់មិនប្តឹងអីទេ ហើយគាត់បានឱ្យខ្ញុំថតម៉ូតូនោះទុកដែរ តែខ្ញុំមិនដឹងថា គាត់ទៅប្តឹងប៉ូលិសទេ»៕