.jpg)
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។ រូបថត ក្រសួងកសិកម្ម
ភ្នំពេញៈ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ថ្លែងថា កម្ពុជាគាំទ្រសេចក្តីថ្លែងការណ៍រួមស្តីពី «និរន្តរភាពនៃផលិតកម្មកសិកម្ម និងប្រព័ន្ធស្បៀងអាហារ» ព្រោះស្របទៅនឹងគោលនយោបាយ និងផែនការអភិវឌ្ឍន៍វិស័យកសិកម្មកម្ពុជា ខណៈសេចក្ដីថ្លែងការណ៍រួមនេះបានផ្តួចផ្តើមឡើងដោយក្រសួងកសិកម្ម រុក្ខាប្រមាញ់ និងនេសាទនៃប្រទេសជប៉ុន។
លោក វេង សាខុន បានថ្លែងគាំទ្របែបនេះក្នុងពេលចូលរួមក្នុងកិច្ចប្រជុំតាមប្រព័ន្ធ Video Conference ជាមួយលោក Nogami Kotaro រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទនៃប្រទេសជប៉ុន និងមានការចូលរួមពីរដ្ឋមន្ត្រីក្រសួងកសិកម្មនៃបណ្តាប្រទេសសមាជិកអាស៊ានមួយចំនួនទៀតដូចជា ប្រទេសឡាវ ម៉ាឡេស៊ី ហ្វីលីពីន សិង្ហបុរី និងវៀតណាមដើម្បីពិភាក្សា និងរៀបចំសេចក្តីថ្លែងការណ៍រួមស្តីពី «និរន្តរភាពនៃផលិតកម្មកសិកម្ម និងប្រព័ន្ធស្បៀងអាហារ» (Sustainable Agriculture Productions and Food System) នេះ។
លោក វេង សាខុន បានថ្លែងអំណរគុណដល់លោក Nogami Kotaro ដែលជាអ្នកផ្តួចផ្តើមរៀបចំសេចក្តីថ្លែងការណ៍រួមនេះឡើង។
លោករដ្ឋមន្ដ្រីបានថ្លែងថា៖ «សម្រាប់ជំហររបស់ភាគីកម្ពុជា គឺគាំទ្រលើសេចក្តីថ្លែងការណ៍រួមនេះទាំងស្រុងព្រោះសេចក្តីថ្លែងការណ៍រួមនេះ ស្របទៅនឹងគោលនយោបាយ និងផែនការអភិវឌ្ឍន៍វិស័យកសិកម្មកម្ពុជា ឆ្នាំ ២០៣០»។
លោក វេង សាខុន បានឱ្យដឹងថាគោលនយោបាយ និងផែនការអភិវឌ្ឍន៍វិស័យកសិកម្មកម្ពុជាឆ្នាំ ២០៣០ បានដាក់ចេញនូវគោលនយោបាយមួយចំនួនក្នុងនោះរួមមាន ទី ១ ជំរុញផលិតកម្មកសិកម្ម ទី ២ បង្កើនប្រសិទ្ធភាព និងមានភាពប្រកួតប្រជែង និងទី ៣ ការបង្កើនផលិតកម្មកសិកម្មដោយគិតគូរដល់និរន្តរភាពបរិស្ថាន។
ក្នុងនាមជាម្ចាស់ផ្ទះ រៀបចំកិច្ចប្រជុំ ដើម្បីការពិភាក្សា និងរៀបចំសេចក្ដីថ្លែងការណ៍រួមនេះ លោក Nogami Kotaro បានថ្លែងស្វាគមន៍ និងលើកឡើងពីកិច្ចខិតខំប្រឹងប្រែង និងកិច្ចសហប្រតិបត្តិការជាមួយបណ្តាប្រទេសលើសកលលោក និងពិសេសជាមួយប្រទេសដែលជាសមាជិកអាស៊ានក្នុងការប្រយុទ្ធប្រឆាំងនឹងការប្រែប្រួលអាកាសធាតុ ដែលជាដើមហេតុធ្វើឱ្យប៉ះពាល់ដល់ផលិតកម្មកសិកម្ម និងប្រព័ន្ធស្បៀងអាហារដែលទាំងអស់គ្នាកំពុងប្រឈម។
លោក Nogami Kotaro ថ្លែងថា សេចក្តីថ្លែងការណ៍រួមនេះមានគោលបំណងទាក់ទាញចំណាប់អារម្មណ៍ឱ្យប្រទេសទាំងអស់ក្នុងសកលលោកងាកមកយកចិត្តទុកដាក់មកលើប្រទេសកសិកម្ម ជាពិសេសប្រទេសក្នុងតំបន់ខ្យល់មូសុង ព្រោះថា ការប្រែប្រួលអាកាសធាតុ គឺជាកត្តាដ៏សំខាន់ដែលជះឥទ្ធិពលដល់និរន្តរភាពនៃផលិតកម្មកសិកម្ម និងប្រព័ន្ធស្បៀងអាហាររបស់ប្រទេសសមាជិកអាស៊ាន។
លោកបានឱ្យដឹងថា សេចក្តីថ្លែងការណ៍រួមនេះនឹងដើរតួនាទីយ៉ាងសំខាន់ក្នុងការចូលរួមយ៉ាងសកម្មជាមួយប្រទេសសមាជិកដៃគូអភិវឌ្ឍន៍ វិស័យឯកជន ដើម្បីពង្រឹងកិច្ចសហប្រតិបត្តិការជាអន្តរជាតិក្នុងការជួយដល់ប្រទេសដែលពឹងផ្អែកលើផលិតកម្មកសិកម្មជាចម្បង ទាំងធនធានហិរញ្ញវត្ថុ និងបច្ចេកទេសកសិកម្មទំនើប។
លោក Nogami Kotaro បានបញ្ជាក់ថា លោកនឹងថ្លែងសេចក្តីថ្លែងការណ៍រួមស្តីពី «និរន្តរភាពផលិតកសិកម្ម និងប្រព័ន្ធស្បៀងអាហារ» នេះនៅក្នុងកិច្ចប្រជុំត្រៀមមហាសន្និបាតកំពូលពិភពលោក (Pre-Summit on Food System) នៅក្នុងខែកញ្ញា ២០២១ នៅទីក្រុងរ៉ូម ប្រទេសអ៊ីតាលី។
ដោយឡែក រដ្ឋមន្ត្រីក្រសួងកសិកម្មនៃបណ្ដាប្រទេសសមាជិកអាស៊ានផ្សេងទៀតដែលបានចូលរួមកិច្ចប្រជុំនេះក៏បានបង្ហាញនូវឆន្ទៈគាំទ្រលើសេចក្តីថ្លែងការណ៍រួមនេះផងដែរ។ នេះបើតាមការបញ្ជាក់របស់ក្រសួងកសិកម្មកម្ពុជាក្រោយបញ្ចប់កិច្ចប្រជុំនេះកាលពីម្សិលមិញ៕
