ភ្នំពេញៈ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី ១៩ ខែកក្កដា បានផ្ញើសារលិខិត ចូលរួមរំលែកទុក្ខជូន លោកស្រី Angela Merel អធិការបតី អាល្លឺម៉ង់ ចំពោះករណីគ្រោះទឹកជំនន់ ដែលបណ្តាលឱ្យស្លាប់ពលរដ្ឋអាល្លឺម៉ង់រាប់រយនាក់ និងច្រើនពាន់នាក់ទៀតកំពុងបាត់ខ្លួន។
យោងតាមសារលិខិតរបស់លោកនាយករដ្ឋមន្ដ្រីបានបញ្ជាក់ថា៖ «ខ្ញុំពិតជាមានក្តីក្រៀមក្រំយ៉ាងខ្លាំង នៅពេលបានទទួលដំណឹងអំពីគ្រោះទឹកជំនន់ដ៏ធ្ងន់ធ្ងរនៅរដ្ឋ North Rhine-Westphalla និងរដ្ឋ Rhineland-Palatinate ដែលបានបង្កឱ្យមានការបាត់បង់អាយុជីវិត ជនស្លូតត្រង់ជាច្រើនរយនាក់បាត់ខ្លួន និងបណ្តាលឱ្យមានរងរបួសរាប់ពាន់នាក់ ព្រមទាំងបានបង្កការខូចខាតផ្ទះសម្បែង និងទ្រព្យសម្បត្តិ ជាច្រើនទៀត»។
លោកនាយករដ្ឋមន្ដ្រីបានថ្លែងថា៖ «ក្នុងកាលៈទេសៈដ៏គួរឱ្យសង្វេគនេះ ក្នុងនាមរាជរដ្ឋាភិបាល និងប្រជាជនកម្ពុជាខ្ញុំសូមសម្តែងនូវក្តី អាណិតអាសូរ និងចូលរួមរំលែកទុក្ខដោយស្មោះជាមួយលោកជំទាវ និងប្រជាជនអាល្លឺម៉ង់ ជាពិសេសក្រុមគ្រួសារនៃជនរងគ្រោះ ចំពោះការបាត់បង់ដ៏ធំធេងនេះ និងសូមជូនពរដល់អ្នករងរបួសបានឆាប់ជាសះស្បើយ ហើយជនរងគ្រោះដែលកំពុងបាត់ខ្លួនឆាប់ត្រូវបានជួយសង្គ្រោះដោយជោគជ័យ»។
ទន្ទឹមគ្នានេះដែរ លោក ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជាផ្ញើលិខិតរំលែកទុក្ខជូន លោក Heiko Maas រដ្ឋមន្ត្រីការបរទេសនៃសាធារណរដ្ឋសហព័ន្ធអាល្លឺម៉ង់ ចំពោះគ្រោះទឹកជំនន់ដ៏ធ្ងន់ធ្ងរ នៅភាគខាងលិចប្រទេសអាល្លឺម៉ង់ កាលពីថ្ងៃទី ១៥ ខែ កក្កដា ឆ្នាំ ២០២១ នេះផងដែរ។
លោកបានថ្លែងថា៖ «ខ្ញុំមានការសោកសៅយ៉ាងខ្លាំងចំពោះព័ត៌មានអំពីទឹកជំនន់ដ៏ធ្ងន់ធ្ងរដែលបានវាយប្រហារនៅភាគខាងលិចប្រទេសអាល្លឺម៉ង់ នៅថ្ងៃទី ១៥ ខែកក្កដានេះ ដែលបានឆក់យកអាយុជីវិតមនុស្សជាងមួយរយនាក់និងជាច្រើននាក់ទៀតរងរបួសខណៈមនុស្សរាប់ពាន់នាក់កំពុងបាត់ខ្លួន»៕