ភ្នំពេញៈ ក្រុមការងារអន្តរាគមន៍បង្ក្រាបបទល្មើសចលនាសត្វបានស្ទាក់ឃាត់រថយន្ត ១ គ្រឿង ដែលដឹកសត្វជ្រូករស់ចំនួន ៦០ ក្បាល ដែលពុំមានវិញ្ញាបនបត្របញ្ជាក់សុខភាព ហើយបើទោះបីជាជ្រូកទាំងនេះ គឺជាជ្រូកចិញ្ចឹមក្នុងស្រុក ប៉ុន្តែបើពិនិត្យឃើញមានបញ្ហាសុខភាពនឹងត្រូវតែដុតកម្ទេចចោល។
កាលពីយប់ថ្ងៃទី ១៧ ខែ កក្កដា ឆ្នាំ ២០២១ ក្រុមការងារអន្តរាគមន៍បង្ក្រាបបទល្មើសចលនាសត្វនៃអគ្គនាយកដ្ឋានសុខភាពសត្វ និងផលិតកម្មសត្វ ក្រសួងកសិកម្មបានស្ទាក់ឃាត់រថយន្ត ១ គ្រឿង ដែលដឹកសត្វជ្រូករស់ចំនួន ៦០ ក្បាល នៅចំណុចផ្លូវជាតិលេខ ២ សង្កាត់ចាក់អង្រែក្រោម ខណ្ឌមានជ័យ ដែលពុំមានវិញ្ញាបនបត្របញ្ជាក់សុខភាពសត្វពីការិយាល័យផលិតកម្ម និងបសុព្យាបាលនៃមន្ទីរកសិកម្មនោះទេ។
ជ្រូកដែលត្រូវបានស្ទាក់ចាប់បាន គឺដឹកតាមរថយន្ត ១ គ្រឿង ម៉ាក SSANG YONG ISTANA ពណ៌ស ពាក់ស្លាកលេខភ្នំពេញ ២Z-៥៣៩៤ ចេញដំណើរមកពីផ្សារប៉័ងសី ភូមិស្វាយទង ឃុំខ្វាវ ស្រុកសំរោង ខេត្តតាកែវ ឆ្ពោះមកភ្នំពេញ ហើយក៏ត្រូវមន្ត្រីជំនាញឃាត់តែម្តង។ បច្ចុប្បន្នក្រុមការងារបានបញ្ជូនវត្ថុតាងបទល្មើសខាងលើនេះទៅរក្សាទុកនៅទីតាំងចត្តាឡីស័កសត្វរបស់អគ្គនាយកដ្ឋានសុខភាពសត្វ ដើម្បីចាត់ការបន្តតាមនីតិវិធី។
ក្រោយពីបានស្រាវជ្រាវលោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វបានប្រាប់ភ្នំពេញប៉ុស្តិ៍នៅថ្ងៃទី ១៩ កក្កដាថា ជ្រូកនេះត្រូវបានដឹងថា គឺជាជ្រូកចិញ្ចឹមក្នុងស្រុក។ ប៉ុន្តែដោយសារតែ ជ្រូកទាំងនេះគ្មានលិខិតបញ្ជាក់ពីបញ្ហាសុខភាព ដូច្នេះលោកថា មន្ត្រីបានយកសំណាកជ្រូកទាំងនេះទៅពិសោធ ដោយបារម្ភខ្លាចមានជំងឺប៉េស្តជ្រូកអាហ្វ្រិក។
លោក តាន់ ផាន់ណារ៉ា បានអះអាងថា បើសិនជាក្នុងករណីលទ្ធផលពិនិត្យឃើញថា មិនមានជំងឺនោះ ម្ចាស់ជ្រូកនឹងមិនទទួលរងការពិន័យនោះទេ គឺគ្រាន់តែធ្វើកិច្ចសន្យា ហើយប្រគល់ជ្រូកទាំងនោះត្រឡប់ទៅវិញ។
ប៉ុន្តែលោកសង្កត់ធ្ងន់ថា បើសិនក្នុងករណីជ្រូកទាំងនេះមានជំងឺប៉េស្តជ្រូកអាហ្វ្រិក បើទោះជាជ្រូកទាំងនេះចិញ្ចឹមក្នុងស្រុក ក៏ត្រូវតែធ្វើការដុតកម្ទេចចោល ដើម្បីបង្ការការឆ្លងជំងឺទៅជ្រូកដទៃផងដែរ។ «ខ្ញុំបានសួរជំនាញខ្ញុំថា ជ្រូកនេះគឺជាជ្រូកចិញ្ចឹមក្នុងស្រុក គ្រាន់តែគាត់ដឹកមិនមានលិខិតស្នាមអ្វីទាំងអស់ ហើយមិនដឹងមកពីប្រភពណា»។
ជាមួយនឹងករណីនេះ លោក តាន់ ផាន់ណារ៉ា អំពាវនាវដល់អ្នកចិញ្ចឹមជ្រូក និងអ្នកប្រកបអាជីវកម្មជ្រូកក្នុងស្រុកទាំងអស់ត្រូវគោរពទៅតាមច្បាប់ និងគោលការណ៍ណែនាំ ជុំវិញការធ្វើចរាចរណ៍ជ្រូកពីតំបន់ ១ ទៅតំបន់ ១ ដែលត្រូវមានលិខិតវិញ្ញាបនបត្របញ្ជាក់សុខភាពសត្វពីការិយាល័យផលិតកម្ម និងបសុព្យាបាលថ្នាក់ខេត្ត ដើម្បីប្រាកដថា ជ្រូកដែលលោកអ្នកដឹកជញ្ជូន គឺមានសុខភាពល្អ និងអាចធ្វើការដឹកជញ្ជូនដោយត្រឹមត្រូវ។
លោកបញ្ជាក់ថា៖ «បើលើកនេះ មិនបញ្ហាអ្វី គឺយើងគ្រាន់តែណែនាំគាត់ ឱ្យធ្វើកិច្ចសន្យា ហើយលើកក្រោយត្រូវមានលិខិតបញ្ជាក់ពីសុខភាពសត្វជ្រូកនេះចេញពីថ្នាក់ខេត្ត ព្រោះថ្នាក់ខេត្ត គេនឹងចេញលិខិតបញ្ជាក់ជូនអាជីវករនៅពេលពិនិត្យឃើញថា ជ្រូកនេះមានសុខភាពល្អ»។
ជំងឺប៉េស្តជ្រូកអាហ្វ្រិកជាជំងឺឆ្លងធ្ងន់ធ្ងរ បង្កដោយវីរុសលើជ្រូក និងអាចឆ្លងរាលដាលយ៉ាងឆាប់រហ័សនៅក្នុងហ្វូងជ្រូកតាមរយៈការចម្លងដោយផ្ទាល់ និងដោយប្រយោល ខណៈជំងឺនេះមិនមានថ្នាំបង្ការ ឬថ្នាំព្យាបាលនោះទេ។
ផ្អែកតាមរបាយការណ៍អង្គការ FAO កាលពីឆ្នាំ ២០១៩ ជំងឺនេះបានឆ្លងចូលកម្ពុជា ដែលបណ្តាលឱ្យជ្រូកចិញ្ចឹមក្នុងស្រុកចំនួន ៣ ក្បាលបានងាប់ និងត្រូវសម្លាប់ជិត ៣ ០០០ ក្បាល។ លោក តាន់ ផាន់ណារ៉ា សង្កត់ធ្ងន់ថា កម្ពុជាត្រូវតែគ្រប់គ្រងការចរាចរជ្រូកទាំងក្នុងស្រុក និងនាំចូលឱ្យបានល្អប្រសើរ ព្រោះតាមរយៈបទពិសោធដែលកម្ពុជាបានជួបប្រទះកន្លងទៅ បានធ្វើឱ្យកម្ពុជាជួបប្រទះការខ្វះខាតជ្រូកសម្រាប់ផ្គត់ផ្គង់ក្នុងស្រុក៕
វីដេអូ៖