.jpg)
សមត្ថកិច្ចពេលចុះបង្ក្រាបករណីស្ដុកឈើខុសច្បាប់នៅខេត្តសៀមរាប កាលពីថ្ងៃទី ៩ ខែកក្កដា ឆ្នាំ ២០២១ ។ រូបថត ប៉ូលិស
ភ្នំពេញៈ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានប្រកាសនៅលើបណ្ដាញសង្គមរបស់លោកកាលពីម្សិលមិញថា ការគ្រប់គ្រងធនធានធម្មជាតិ ជាពិសេសការបង្ក្រាបបទល្មើសព្រៃឈើ និងជលផល មិនស្ថិតក្នុងដែនសមត្ថកិច្ច ឬជាបន្ទុកផ្ដាច់មុខរបស់ក្រសួងកសិកម្មនោះទេ ខណៈការងារនេះបានប្រគល់ឱ្យថ្នាក់ក្រោមជាតិហើយនោះ។
ការប្រកាសនេះបានធ្វើឡើង បន្ទាប់ពីមានប្រព័ន្ធផ្សព្វផ្សាយ និងសាធារណជនមួយចំនួនបានចុះផ្សាយអត្ថបទរិះគន់ដាក់បន្ទុកមកលើក្រសួងនេះ ពាក់ព័ន្ធនឹងការងារគ្រប់គ្រងធនធានធម្មជាតិ ជាពិសេសការងារបង្ក្រាបបទល្មើសព្រៃឈើ និងជលផលដោយមិនបានតាមដាន និងសិក្សាឱ្យបានច្បាស់លាស់ពីដំណើរការធ្វើកំណែទម្រង់របស់ប្រមុខរាជរដ្ឋាភិបាលដែលធ្វើឱ្យសាធារណជនទូទៅ មានការយល់ច្រឡំមកលើក្រសួងកសិកម្ម រុក្ខាប្រមាញ់ និងនេសាទ។
ដោយយោងតាមអនុក្រឹត្យលេខ ១៥៦ ចុះថ្ងៃទី ៣ ខែ មីនា ឆ្នាំ ២០១៤ ស្តីពីការរៀបចំ និងការប្រព្រឹត្តទៅនៃគណៈបញ្ជាការឯកភាពរដ្ឋបាលរាជធានី-ខេត្ត ក្រុង-ស្រុក-ខណ្ឌ និងសារាចរណែនាំរបស់រាជរដ្ឋាភិបាលលេខ ០៥ ស្តីពីវិធានការចាំបាច់នានាក្នុងការពង្រឹងការគ្រប់គ្រងធនធានធម្មជាតិចុះថ្ងៃទី ២២ ខែកញ្ញា ឆ្នាំ ២០១៦ លោក វេង សាខុន បានគូសបញ្ជាក់ថា៖ «ការគ្រប់គ្រងធនធានធម្មជាតិ ជាពិសេសការបង្ក្រាបបទល្មើសព្រៃឈើ និងជលផល គឺជាកាតព្វកិច្ចទទួលខុសត្រូវរបស់រដ្ឋបាលរាជធានី-ខេត្តក្រុង-ស្រុក-ខណ្ឌ ព្រោះក្រសួងបានធ្វើប្រតិភូកម្មអំណាចទៅឱ្យរដ្ឋបាលមូលដ្ឋានជាអ្នកអនុវត្តការគ្រប់គ្រង ការអភិរក្ស និងការចាត់វិធានការ ការពារទប់ស្កាត់ និងស្រាវជ្រាវបង្ក្រាបបទល្មើសដោយផ្ទាល់»។
បើតាមអនុក្រឹត្យ និងសារាចរណែនាំទាំង ២ ខាងលើនេះ រដ្ឋបាលរាជធានី-ខេត្ត ក្រុង-ស្រុក-ខណ្ឌ មានតួនាទីពេញលេញនៅក្នុងការអនុវត្តការងារគ្រប់គ្រងរាល់សិប្បកម្មកែច្នៃ និងអាជីវកម្មធនធានព្រៃឈើ និងជលផលដែលមានច្បាប់អនុញ្ញាត ព្រមទាំងទប់ស្កាត់ និងលុបបំបាត់សិប្បកម្មកែច្នៃ និងអាជីវកម្មធនធានព្រៃឈើ និងជលផលដែលគ្មានច្បាប់អនុញ្ញាត។
បើតាមលោក វេង សាខុន ដើម្បីធានាបាននូវការអនុវត្តការងារគ្រប់គ្រងធនធានធម្មជាតិឱ្យមានប្រសិទ្ធភាព និងប្រកបដោយបរិយាប័ន្ន រដ្ឋបាលរាជធានី-ខេត្ត ក្រុង-ស្រុក-ខណ្ឌ ចាំបាច់ត្រូវពង្រឹងការត្រួតពិនិត្យ និងចាត់វិធានការលុបបំបាត់ការដឹកជញ្ជូន និងការស្ដុកឈើគ្រប់ប្រភេទដែលគ្មានការអនុញ្ញាតត្រឹមត្រូវតាមច្បាប់នៅក្នុងដែនសមត្ថកិច្ចរបស់ខ្លួន ចាត់វិធានការទប់ស្កាត់ និងលុបបំបាត់ការនាំចេញឈើ និងផលិតផលកែច្នៃពីឈើគ្រប់ប្រភេទព្រមទាំងសត្វព្រៃដែលគ្មានការអនុញ្ញាតត្រឹមត្រូវតាមច្បាប់ ទៅក្រៅប្រទេសតាមច្រកព្រំដែន និងតាមច្រករបៀងនានា។
លោកបានបន្តថា មិនតែប៉ុណ្ណោះត្រូវដឹកនាំសម្របសម្រួល អធិការខណ្ឌ ផ្នែក សង្កាត់រដ្ឋបាលព្រៃឈើ អធិការ ខណ្ឌ ផ្នែក សង្កាត់ រដ្ឋបាលជលផល មន្ទីរបរិស្ថាន និងកម្លាំងមានសមត្ថកិច្ចពាក់ព័ន្ធ ដើម្បីធានាបាននូវការប្រើប្រាស់កម្លាំងសរុប និងមធ្យោបាយចាំបាច់ក្នុងការថែរក្សា និងការពារធនធានធម្មជាតិ ព្រមទាំងទប់ស្កាត់ និងបង្ក្រាបសកម្មភាពបទល្មើសនៅក្នុងតំបន់ការពារ និងអភិរក្សធម្មជាតិក្នុងដែនសមត្ថកិច្ចរបស់ខ្លួនឱ្យមានប្រសិទ្ធភាព។
ជាមួយនេះត្រូវធ្វើរបាយការណ៍បូកសរុប ដែលស្ថិតនៅក្នុងដែនសមត្ថកិច្ចរបស់ខ្លួនជូនក្រសួងបរិស្ថាន និងក្រសួងកសិកម្ម រុក្ខាប្រមាញ់ និងនេសាទ ដោយត្រូវចម្លងជូនក្រសួងមហាផ្ទៃ មេបញ្ជាការកងរាជអាវុធហត្ថលើផ្ទៃប្រទេស។ ចំណែកក្រសួងបរិស្ថាន និងក្រសួងកសិកម្ម រុក្ខា ប្រមាញ់ និងនេសាទត្រូវបូកសរុបរបាយការណ៍ទាំងនេះ ដើម្បីរាយការណ៍ជូនប្រមុខរាជរដ្ឋាភិបាល។
លោក វេង សាខុន បានបញ្ជាក់បន្ថែមថា៖ «តាមរយៈការដាក់ឱ្យអនុវត្ត អនុក្រឹត្យ និងសារាចរណែនាំខាងលើ ក្រសួងកសិកម្ម រុក្ខា ប្រមាញ់ និងនេសាទ បាននិងកំពុងខិតខំអនុវត្តឱ្យបានពេញលេញនូវអ្វីដែលជាភារកិច្ចរបស់ខ្លួនដែលប្រមុខរាជរដ្ឋាភិបាលបានប្រគល់ជូន ហើយមានក្តីសង្ឃឹមថា សាធារណជន ជាពិសេសសារព័ត៌មានបានយល់ពីអ្វីជាការសម្រេចរបស់ប្រមុខរាជរដ្ឋាភិបាលក្នុងការបន្តធ្វើកំណែទម្រង់យ៉ាងមុតស្រួចកន្លងមក»។
ជុំវិញករណីនេះ លោក ពិត ភិរក្ស នាយរងខណ្ឌរដ្ឋបាលព្រៃឈើខេត្តបាត់ដំបងបានប្រាប់ ភ្នំពេញ ប៉ុស្តិ៍ កាលពីម្សិលមិញថា ចាប់តាំងពីក្រសួងបានធ្វើប្រតិភូកម្មអំណាចមកថ្នាក់កណ្ដាល និងថ្នាក់ក្រោមជាតិ ការងារបង្ការទប់ស្កាត់ និងបង្ក្រាបបទល្មើសព្រៃឈើ និងសត្វព្រៃ ក៏ដូចជាបទល្មើសជលផល គឺជាបន្ទុកទទួលខុសត្រូវរបស់បញ្ជាការឯកភាពនៃរដ្ឋបាលរាជធានី ខេត្ត នីមួយៗដោយមានមន្ទីរអង្គភាពជំនាញពាក់ព័ន្ធជាសេនាធិការ។
លោកបានបញ្ជាក់ថា៖ «ជាក់ស្ដែងក្នុងឆមាសទី១ ឆ្នាំ ២០២១នេះ ខណ្ឌរដ្ឋបាលព្រៃឈើខេត្តបាត់ដំបង ក្រោមការដឹកនាំរបស់បញ្ជាការឯកភាពនៃរដ្ឋបាលខេត្តបាត់ដំបងបានចុះស្រាវជ្រាវ និងបង្ក្រាបបទល្មើសព្រៃឈើបានជាច្រើនករណីដោយបានចាប់បញ្ជូនជនសង្ស័យចំនួន ៦ នាក់ ទៅឱ្យតុលាការចាត់វិធានការបន្តតាមនីតិវិធីច្បាប់ និងចាប់រឹបអូសវត្ថុតាងគោយន្ត ៣ គ្រឿង និងឈើជាច្រើនម៉ែត្រគុប និងបានផាកពិន័យអន្តការណ៍ចំនួន ១២ ករណីផងដែរ»៕
