ភ្នំពេញ/កណ្តាល/កំពង់ស្ពឺៈ ភ្លៀងលាយឡំខ្យល់កន្ត្រាក់កាលពីរសៀលថ្ងៃទី ១៩ ខែកក្កដា បានបង្កការខូចខាតផ្ទះជាង ៥០ ខ្នងនៅខេត្តចំនួន ២ គឺ ខេត្តកំពង់ស្ពឺ និងខេត្តកណ្ដាល ព្រមទាំងបាក់រលំបង្គោលអគ្គិសនី ចំនួន ២៣ ដើម ក្នុងភូមិសាស្ត្រខណ្ឌពោធិ៍សែនជ័យ រាជធានីភ្នំពេញ ប៉ុន្តែគ្មានពលរដ្ឋណាម្នាក់រងគ្រោះថ្នាក់នោះទេ។ នេះបើតាមការអះអាងរបស់អាជ្ញាធរមូលដ្ឋាន។
លោក វ៉ី សំណាង អភិបាលខេត្តកំពង់ស្ពឺ ប្រាប់ ភ្នំពេញ ប៉ុស្តិ៍ នៅថ្ងៃទី ២០ កក្កដាថា ផ្ទះប្រជាពលរដ្ឋចំនួន ៤៨ ខ្នង នៅស្រុកគងពិសី និងស្រុកបសេដ្ឋបានដួលរលំ និងប៉ើងរបើកដំបូល បន្ទាប់ពីមានភ្លៀងលាយឡំខ្យល់កន្ត្រាក់កើតឡើងកាលរសៀលថ្ងៃចន្ទ។ ក្នុងនោះផ្ទះ ១៥ ខ្នងរបស់ពលរដ្ឋនៅស្រុកគងពិសីបានបាក់រលំរាបដល់ដី ខណៈផ្ទះ ៣៣ ខ្នងទៀតរបស់ប្រជាពលរដ្ឋនៅស្រុកបសេដ្ឋ បានប៉ើងរបើកដំបូល។
លោកបានបញ្ជាក់ថា៖ «ប៉ុន្តែគ្មានពលរដ្ឋណាម្នាក់រងគ្រោះថ្នាក់នៅក្នុងហេតុការណ៍នោះទេ»។
លោកអភិបាលខេត្តប្រាប់ឲ្យដឹងដែរថា នៅព្រឹកថ្ងៃពុធនេះ លោកនឹងដឹកនាំមន្ត្រីកាកបាទក្រហមខេត្ត និងកម្លាំងបញ្ជាការឯកភាពខេត្តមួយចំនួនចុះទៅសួរសុខទុក្ខ និងផ្ដល់អំណោយសង្គ្រោះបឋមដល់គ្រួសាររងគ្រោះ ដោយខ្យល់កន្ត្រាក់ទាំងនោះ ដើម្បីជួយសម្រួលការលំបាកក្នុងជីវភាពប្រចាំថ្ងៃ។
ចំណែកលោក ស៊ឹម ឃាង អធិការស្រុកកោះធំ ប្រាប់ ភ្នំពេញ ប៉ុស្តិ៍ថា ភ្លៀងលាយឡំខ្យល់កន្ត្រាក់ កាលពីរសៀលថ្ងៃទី ១៩ ខែកក្កដា ក៏បានបង្កការខូចខាតផ្ទះប្រជាពលរដ្ឋសរុបចំនួន ៨ ខ្នងផងដែរ ដោយក្នុងនោះ ផ្ទះ ៥ ខ្នង បានរងការខូចខាតមធ្យម ដោយបានប៉ើងរបើកដំបូល និង ៣ ខ្នងទៀតរលំធ្លាក់ពីកំណល់ជើងតាង។ ប៉ុន្តែគ្មាននរណាម្នាក់រងគ្រោះថ្នាក់នោះឡើយ។
លោក ស៊ឹម ឃាង បាននិយាយថា៖ «នៅរសៀលថ្ងៃទី ២០ ខែកក្កដា ឆ្នាំ ២០២១ នេះ ក៏មានភ្លៀងខ្យល់កើតឡើងបណ្ដាលឲ្យរលំបាក់ដើមឈើនៅតាមដងផ្លូវក្នុងភូមិមួយចំនួនផងដែរ ប៉ុន្តែមិនប៉ះពាល់ដល់ផ្ទះអ្នកភូមិនោះទេ»។
ដោយឡែកនៅរាជធានីភ្នំពេញ បង្គោលអគ្គិសនីចំនួន២៣ដើម ស្ថិតក្នុងភូមិសាស្ត្រ សង្កាត់សំរោងក្រោម ខណ្ឌពោធិ៍សែនជ័យ បានបាក់ដួលរលំ បន្ទាប់ពីមានភ្លៀងលាយឡំខ្យល់កន្ត្រាក់កើតឡើង កាលពីរសៀលថ្ងៃទី ១៩ ខែកក្កដា ដែលធ្វើឲ្យលំនៅឋានប្រជាពលរដ្ឋមួយចំនួននៅក្នុងខណ្ឌនេះត្រូវបានកាត់ផ្ដាច់ចរន្តអគ្គិសនីជាបណ្ដោះអាសន្ន។ នេះបើតាម លោក តុល សុគុណ នាយនគរបាលប៉ុស្តិ៍សង្កាត់សំរោងក្រោម។
លោកថ្លែងថា៖ «ក្រោយពីទទួលបានដំណឹងពីប្រជាពលរដ្ឋ អំពីការបាក់រលំបង្គោលអគ្គិសនី នៅតាមបណ្ដោយវិថីឈ្នះឈ្នះខ្ញុំ និងក្រុមការងារ បានចុះទៅពិនិត្យហើយឃើញមានបាក់រហូតដល់ ២៣ ដើម។ បង្គោលភ្លើងទាំងនោះ បានបាក់ដួលរលំ និងធ្លាក់ខ្សែភ្លើងរាយប៉ាយពេញដី។ ចំណែកដើមឈើមួយចំនួន ក៏បានដួលរលំផងដែរ។ ប៉ុន្តែមិនបង្កគ្រោះថ្នាក់ដល់អ្នកដំណើរឆ្លងកាត់តំបន់នោះទេ។ បន្ទាប់មកខ្ញុំក៏បានរាយការណ៍ប្រាប់ទៅមន្ត្រីអគ្គិសនី ឲ្យចុះមកពិនិត្យ»។
លោកបន្ថែមថា បើតាមការអះអាងរបស់ក្រុមមន្ត្រីអគ្គិសនី ដែលចុះមកពិនិត្យទីតាំងបាក់រលំបង្គោលអគ្គិសនីនោះ គឺការជួសជុល និងផ្លាស់ប្ដូរដាំបង្គោលអគ្គិសនីជាថ្មីឡើងវិញត្រូវចំណាយពេលប្រមាណ ២ ទៅ ៣ ថ្ងៃទៀតទើបអាចរួចរាល់។
ចាប់ពីថ្ងៃទី ២៣-២៧ កក្កដា ឆ្នាំ ២០២១ ខាងមុខនេះ តំបន់វាលទំនាបកណ្ដាល និងតំបន់ជួរភ្នំដងរែក និងខ្ពង់រាបឦសាន នៃប្រទេសកម្ពុជា នឹងមានភ្លៀងធ្លាក់ច្រើន លាយឡំខ្យល់កន្ត្រាក់បក់ខ្លាំង ដែលបណ្ដាលមកពីឥទ្ធិពលខ្យល់មូសុងនិរតីកម្រិតខ្លាំង ប្រព័ន្ធសម្ពាធទាបភ្ជាប់និងព្យុះទី៧ សេមប៉ាកា (CEMPAKA) និងប្រព័ន្ធសម្ពាធទាប។ នេះបើយោងតាមសេចក្ដីជូនដំណឹងអំពីស្ថានភាពអាកាសធាតុ របស់ក្រសួងធនាធនទឹក និងឧតុនិយម នាថ្ងៃទី ២០ ខែ កក្កដា ឆ្នាំ ២០២១។
ជាមួយគ្នានេះក្រសួងធនធានទឹកនិងឧតុនិយមក៏បានព្រមានអំពីលទ្ធភាពដែលអាចកើតមានជំនន់ទឹកភ្លៀងនៅបណ្ដាខេត្តជាប់មាត់សមុទ្រផងដែរ។ ក្រសួងព្យាករថា តំបន់មាត់សមុទ្រមានភ្លៀងធ្លាក់ច្រើនលាយលំខ្យល់កន្ត្រាក់បក់បោកខ្លាំងក្នុងល្បឿនលឿន ដែលអាចបង្កជាជំនន់ទឹកភ្លៀង និងមានរលកសមុទ្រធំៗនិងមានកំពស់ចន្លោះពី ១,៥ ម៉ែត្រទៅ ២ ម៉ែត្រ អាចបង្កគ្រោះថ្នាក់ដល់អ្នកដំណើរតាមសមុទ្រ៕