.jpg)
ទិដ្ឋភាពវត្តបទុមនៅក្នុងខណ្ឌដូនពេញ ត្រូវបានបិទខ្ទប់ពីម្សិលមិញ។ ហេង ជីវ័ន
ភ្នំពេញៈ ក្រសួងធម្មការ និងសាសនាឱ្យដឹងថា ក្នុងរយៈពេល ៦ ខែ ឆ្នាំ ២០២១ នេះមានព្រះសង្ឃ ព្រះពុទ្ធសាសនា សាសនិកអ៊ិស្លាម និងសាសនិកគ្រិស្ត ដែលឆ្លងជំងឺកូវីដ ១៩ នៅទូទាំងប្រទេសសរុបចំនួន ៤៤៥ អង្គ/នាក់ និងមានអ្នកស្លាប់/សុគត សរុប ៨ អង្គ/នាក់។
របាយការណ៍របស់ក្រសួងធម្មការ និងសាសនា ដែលភ្នំពេញប៉ុស្តិ៍ទទួលបានម្សិលមិញបានឱ្យដឹងថា គិតត្រឹមឆមាសទី ១ ដើមឆ្នាំ ២០២១ នេះស្ថិតិព្រះសង្ឃ សាសនិកអ៊ិស្លាម និងសាសនិកគ្រិស្ត ដែលឆ្លងជំងឺកូវីដ ១៩ នៅទូទាំងប្រទេសសរុប ៤៤៥ អង្គ/នាក់ ក្នុងនោះព្រះសង្ឃចំនួន ២៣៩ អង្គ សាសនិកអ៊ិស្លាមចំនួន ២០៣ នាក់ និងសាសនិកគ្រិស្តចំនួន ៣ នាក់។
ចំណែក អ្នកជំងឺកំពុងសម្រាកព្យាបាលសរុបចំនួន ៣០៩ អង្គ/នាក់ ព្រះសង្ឃ ១៧១ អង្គ សាសនិកអ៊ិស្លាម ១៣៥ នាក់ សាសនិកគ្រិស្តចំនួន ៣ នាក់។ ចំនួនអ្នកជាសះស្បើយសរុប ១២៨ អង្គ/នាក់ ព្រះសង្ឃ ៦៦ អង្គ សាសនិកអ៊ិស្លាម ៦២ នាក់ ហើយចំនួនអ្នកស្លាប់/សុគតសរុប ៨ អង្គ/នាក់ក្នុងនោះ ព្រះសង្ឃ ២ អង្គ និងសាសនិកអ៊ិស្លាម ៦ នាក់។
អ្នកនាំពាក្យក្រសួងធម្មការ លោក សេង សុមុនី ប្រាប់ ភ្នំពេញ ប៉ុស្តិ៍ថា ក្នុងចំណោមព្រះសង្ឃ ដែលមានវិជ្ជមានជំងឺកូវីដ ១៩ នៅទូទាំងប្រទេស ភាគច្រើននៅភ្នំពេញ ខណៈក្រុមការងារកំពុងបន្តស្រង់ស្ថិតិអ្នកឆ្លងបន្តទៀត។
ជាមួយគ្នានេះដែរ អាជ្ញាធរខណ្ឌដូនពេញសម្រេចបិទខ្ទប់ការចេញ-ចូលវត្តបទុមវតីក្នុងសង្កាត់ចតុមុខ ១៤ ថ្ងៃ ចាប់ពីថ្ងៃទី ២០ កក្កដា តទៅ ក្រោយពីរកឃើញព្រះសង្ឃ និងអ្នកស្នាក់នៅក្នុងវត្ត វិជ្ជមានកូវីដ ២០ អង្គ/នាក់។
អភិបាលខណ្ឌដូនពេញលោក សុខ ពេញវុធ កាលពីម្សិលមិញបានសហការជាមួយសាលាសង្កាត់ចតុមុខ និងប៉ុស្តិ៍រដ្ឋបាលចតុមុខ ដោយបានចុះប្រតិបត្តិការបិទខ្ទប់វត្តបទុមវតីបណ្តោះអាសន្នរយៈពេល ១៤ ថ្ងៃ ចាប់ពីថ្ងៃទី ២០ ខែ កក្កដា ឆ្នាំ ២០២១។
មន្ត្រីប្រចាំការនៅប៉ុស្តិ៍នគរបាលរដ្ឋបាលចតុមុខ សុំមិនបញ្ចេញឈ្មោះប្រាប់ភ្នំពេញប៉ុស្តិ៍ថា ការបិទខ្ទប់នេះ ក្រោយពីក្រុមគ្រូពេទ្យបានធ្វើសំណាកចំនួន ៤០២ អង្គ/នាក់ ចំពោះព្រះសង្ឃ យាយជី តាជី និស្សិត និងជាងសំណង់ ហើយរកឃើញវិជ្ជមាន ២០ អង្គ/នាក់ក្នុងនោះព្រះសង្ឃ ១០ អង្គ និងនិស្សិត ១០ នាក់។
មន្ត្រីប្រចាំការបន្តថា ការយកសំណាកលើកទី ១ នៅវត្តបទុមវតីកាលពីរសៀលថ្ងៃទី ១៩ ខែកក្កដា ធ្វើឡើងដោយក្រុមគ្រូពេទ្យស្ម័គ្រចិត្តរបស់លោកនាយករដ្ឋមន្ត្រី (TYDA) សហការជាមួយគណៈបញ្ជាការឯកភាពខណ្ឌដូនពេញ។ អ្នករកឃើញវិជ្ជមានកូវីដត្រូវបានគ្រូពេទ្យបញ្ជូនទៅសម្រាកព្យាបាលនៅមណ្ឌលព្យាបាលទួលពង្រ ។ ចំណែកព្រះសង្ឈ តាជី យាយជី និងអ្នកពាក់ព័ន្ធផ្សេងទៀត ដែលអវិជ្ជមានកូវីដតម្រូវឱ្យធ្វើចត្តាឡីស័កនៅក្នុងវត្តជាបន្តរហូតគម្រប់ ១៤ ថ្ងៃ។
បន្ថែមពីនេះ អនុគណៈកម្មការស្រាវជ្រាវជំងឺកូវីដ ១៩ ឱ្យដឹងថា ព្រះសង្ឃ និងឧបាសក ៤៣ អង្គ/នាក់ ត្រូវបានធ្វើតេស្តរកឃើញវិជ្ជមាន កូវីដ ១៩ នៅ វត្តទួលទំពូង ក្នុងខណ្ឌចំការមន។
ចំណែក វត្តព្រែកលៀបក្នុងសង្កាត់ព្រែកលៀប ខណ្ឌជ្រោយចង្វារ និង វត្តសំរោងអណ្តែត ស្ថិតនៅសង្កាត់ភ្នំពេញថ្មី ខណ្ឌសែនសុខ ត្រូវបានក្រុមគ្រូពេទ្យធ្វើតេស្តរហ័សរកឃើញវិជ្ជមានកូវីដ ១៩ ជាច្រើនអង្គ/នាក់ផងដែរ។
ជាមួយគ្នានេះ រដ្ឋបាលក្រុងដូនកែវ ខេត្តតាកែវ បានចេញសេចក្តីជូនដំណឹងមួយចុះថ្ងៃទី ១៩ ខែកក្កដា ថាព្រះសង្ឃគង់នៅវត្តសីហរតនារាម ស្ថិតនៅសង្កាត់រកាក្នុង ក្រុងដូនកែវ ដែលត្រូវបានក្រុមគ្រូពេទ្យ ពិនិត្យ និងធ្វើសំណាកចំនួន ១៨ អង្គ ជាលទ្ធផលរកឃើញវិជ្ជមានចំនួន ១០ អង្គ ហើយត្រូវបញ្ជូនទៅព្យាបាលនៅ សាលាគរុកោសល្យខេត្ត។
រដ្ឋបាលក្រុងដូនកែវ អំពាវនាវដល់ប្រជាពលរដ្ឋ ពុទ្ធបរិស័ទ យាយជី តាជី ដែលបានមកសមាទានសីល ឬប្រាស្រ័យជាមួយព្រះសង្ឃគង់នៅវត្តសីហរតនារាម សូមចូលមកធ្វើសំណាកនៅមណ្ឌលសាលាគរុកោសល្យខេត្តព្រមទាំងដាក់ខ្លួនឱ្យនៅដាច់ដោយឡែកពីក្រុមគ្រួសារ ១៤ ថ្ងៃ៕
វីដេអូ៖
